حنفي بيهدد السيسي

البلد ده ما بيصعبش على حد ؟ ....سؤال دائمًا محاصرنى وبيلح عليا، كل مصرى، كل عربى، كل إفريقي، كل آسيوى، كل اوروبى، كل أمريكى، كل استرالي ، كل بنى آدم ربنا خلقه على وجه الأرض يعرف جيدا ان مصر، دولة ظروفها صعبة، واقتصادها بعافية شوية، إلا حفنة من أهلها ربنا ابتلى المصريين بيهم، وجعلهم فى أغبر أو اسود أو مالوش لون فى موقع المسئولية.

فى الوقت اللى رئيس الجمهورية وحاكم البلاد الرئيس عبدالفتاح السيسى بيتنازل عن ثروته اللى ورثها عن أهله لصندوق تحيا مصر نلاقى مسئولين آخرين قادمين من كوكب آخر، عايشين فى عالم آخر بيتعاملوا مع مصر انها أغنى دولة فى العالم، لا مدركين ظروف البلد ولا حاسين بظروف الناس والا كيف هان المال العام على المسئولين عن اللجنة الأوليمبية لينفقوا 140مليون جنيه فى سبيل الحصول على 3ميداليات برونزية، كأنه مال سايب والاغرب أن عدد المدربين والإداريين والمشرفين بالبعثة المصرية يفوق كثيرًا عدد اللاعبين،
أعتقد لو مر الأمر مرور الكرام يبقى حرام، محاسبة كل مسئول فى اللجنة الأوليمبية المصرية هو دفاع مشروع عن حق شعب قطاع منه بيعانى من الجوع.

أما حكاية وزير الأرز اللى فلوسه زى الرز، خالد حنفى وزير التموين أو المعلم حنفى أو وزير الفنادق، حكاية مستفزة ففى الوقت اللى سيادته عمال يتكلم عن الفقر والفقراء واللى يتشددوا لهم، والمفروض ان مرتبه الرسمى حوالى 32الف جنيه يقيم إقامة دائمة فى أحد الفنادق بمقابل يصل إلى نحو مائتي الف جنيه شهريًا....!!!!!

المعلم حنفى ده إما قادم من كوكب آخر أو عنده عجز حاد فى مراكز الإحساس تجعله لا يدرك ما يدار وما يثار من حوله، يجعله يتعامل على أنه وزير لدولة لديها وفرة فى كل شيء، مش دولة تنتظر معونات ودعم، وشعب بيلهث خلف رغيف العيش.

الناس دى وأقصد حنفى والاوليمبيين أخطر على البلد من داعش، من الإرهاب، أخطر على الرئيس من ابن موزة وأردوغان والقرضاوى، من ألد أعدائه، استمرارهم يهدد بانفجار شعبى لا نريده ولا تتحمله البلد..
وحسبنا الله ونعم الوكيل.