EN 
ماذا يهمس العريس فى أذن عروسه أثناء رقصة الـ «slow» ؟
يوم الزفاف يعتبر من أسعد أيام الحياة للعروسين وسط فرحة الأهل والأصدقاء .. ودائما ما تنتهي حفل الزفاف برقصة للعروسين سويا .. فماذا يهمس العريس فى أذن عروسه أثناء رقصة الـ « slow » .
صفحة «أنا وحماتي» على موقع التواصل الإجتماعي فيس بوك طرحت السؤال الذي جاءت معظم ردوده بعيدا عن ما يعتقد البعض كونها لحظة رومانسية يعبر فيها العروسان عن حبهما بصوت خافت وسط لحظات من الرومانسية والسعادة فى ليلة لن تتكرر، ولكنها كانت فى اتجاه آخر فقد جاءت معظم الردود «مش فاكرة» أو «صوت الدى جي كان عالي ما سمعتش» .. «مارقصناش أصلا» .. أو الحديث عن العشاء والنقطة ومستوي الفرح والمعازيم .
جوليا أحمد :
«شغلنا أغنية أجنبي .. قولتيله أيه الأغنية المتخلفة دي قاللي ليه دي جميلة يا حبيبتي، قولتله فاهم حاجة، قاللي لا بس باين عليها حلوة .. كنت حاسة هتشل» .
بسمة شريف :
«قاللي بطني بتوجعني وعايز أرجع» .
رانيا جلال :
«انا اتجوزت عشان أعرف بيقولوا ايه فى اللحظة دي.. وبرضه ما عرفتش»
محمود هوكا :
«قولتلها خايف أدوس على فستانك نقع فوق بعض وهيبقي شكلنا زبالة » .
منار السيد :
«كنا بنتكلم عن أن القاعة متستحقش الفلوس اللي خدوها » .
دودو :
«قاللي الصباحية والنقطة ماتدهاش لأبوكي .. أنا اللي هسدد فاهمة .. وانا عمالة أضحك» .
حلم حياتي :
«أيه رايك عملنا الحركات اللي بقلنا شهر بندرب عليها .. وانا أضحك» .
آية خالد :
«أنا اللي كنت بقوله عايز اتصور بالكوتشي .. أصلي كنت لابسة كوتشي فى فرحي» .
ميرو عاطف :
«كنت دايما قبل ما أتجوز بسأل نفسى نفس السؤال .. وأتجوزت وبرده مش فاكره قال أيه بس أكيد كان كلام حلو » .
أم أحمد :
«يا بختي الأسود .. والنبي ما رقصت» .
نونا نور :
«ما كنتش سمعاه من الدوشة» .
نسمة محمد :
«كنت بقوله شفت أمك ماسلمتش عليا أزاي » .
أم ملك :
« أنا مارقصتش بس كان هيقول يخرب بيتك ما عرفتكيش عشان فعلا أول مرة أحط ميك آب فى حياتي كان شكلي متغير جدا» .
أم عمر :
«بسبب فرق الطول بينا لم نرقص منعا للإحراج .. ولكن هذا لم يمنع أنه قال بحبك فى الميكروفون» .
همس الندا :
«كان بيقولي بحبك» .
زوجي كل حياتي :
«العدسات اللي كنت حطاها وحدة منهم وقعت على خدي .. قاللي شيليها والبسيها لم نقعد فى الكوشة» .
بلال محمد :
«مش فاكر أصلا ناس من اصحابي كانوا جمبي وماشفتهاش غير فى الفيديو» .
سارة محمد :
«اتجوزت بس مارقصتش .. مارقصتش»
فادين الخديوي :
«عاملين عشاء أيه فى البيت» .
أم ادهم :
«قاللي أمك جايبة عشا أيه» .
مي مجدي :
«لو رقصتي تاني هسيبك وأروح ».
أحمد نصر:
«قولت حسبي الله ونعم الوكيل» .
أنا وحبيبي :
«ماكنتش سمعة حاجة أصلا من الصوت بس كانت بقول ماشى وخلاص » .
أميرة :
«النقطة بالنص أبت» .
كرمة :
«أمك عاملة أكل أيه حمام بس ولا بط كمان » .
ديرو :
«كان بيقولي أفردى وشك بدل التكشيرة دي» .
آيات :
«كان بيقولي الفستان مفتوح قوي .. حاولي ما توطيش» .
هبة محمد :
«كنا بنتخانق خناقة ولعة .. والفيديو فضحنا » .
أم كنوز :
«ما قولناش حاجة كان نفسي أعرف بيقولوا ايه ومعرفتش برضوا» .
هدير :
« أتجوزت ولحد دلوقتي ما عرفش برده بيقولوا ايه» .
