السيسي: «والله العظيم لم أحابي أحدًا حتى أولادي في شغلهم».. فيديو

كشف الرئيس عبد الفتاح السيسي، عن أنه يقوم بإرسال خطاب شهريا إلى رئاسة الوزراء، منعا للمجاملات والمحسوبية، قائلا: "مافيش مجاملة، باطلع كل شهر جواب من الرئاسة للوزراء إن مافيش مجاملات ومحسوبية لحد، وأتفاجئ إن قريب فلان واخته.. ماينفعش"، مُضيفًا: "والله العظيم لم أحابي أحدا حتى أولادي في شغلهم".

وتابع "السيسي"، خلال كلمته باحتفالية الأوقاف اليوم، الخميس، بالمولد النبوي الشريف: "من فضلكم كل مسئول في وزارة ومؤسسة ألاقي الرقابة بتقبض على مدعي وسكرتير.. في الرياسة سكرتير ياخد 100 ألف عشان يعمل حاجة وهو مش عندنا.. أنا لو عاوز منكم حاجة هكلمكم شخصيا".

وقال، موجها حديثه للمسئولين: "إزاي تقبلوا كده على نفسكم.. إزاي المسئول يقبل إنه يجامل ويحابي لحد.. مافيش الكلام ده"، مُضيفًا: "لو سمحتم مافيش مخلوق يتجامل في وظيفة، ده فساد.. يعني إيه حد قريب من وزير يتجامل.. مافيش حد أعلى من حد كلنا زي بعض وكله ياخد حقه بس مش أكتر من كده.. أرجو الرسالة تكون واضحة لينا كلنا".

يحضر الاحتفالية المهندس شريف إسماعيل، رئيس مجلس الوزراء، والدكتور أحمد الطيب، شيخ الأزهر الشريف، والدكتور علي عبد العال، رئيس مجلس النواب، والدكتور شوقي علام، مفتي الجمهورية، والدكتور محمد مختار جمعة، وزير الأوقاف، ورئيس المجلس الأعلى للشئون الإسلامية، والوزراء وبعض المحافظين وسفراء الدول الإسلامية والعربية بالقاهرة وكبار رجال الدولة والأزهر والأوقاف وبعض أعضاء مجلس النواب.