الإشراف العام
إلهام أبو الفتح
رئيس التحرير
أحمــد صبـري
الإشراف العام
إلهام أبو الفتح
رئيس التحرير
أحمــد صبـري

رنا إبراهيم تكتب .. نصائح من كوكب المتزوجين

صدى البلد


شخص رقم 1: مستنية أتجوز أوى بقي

شخص رقم 2: ماتستعجليش ياختي بكرة تضربى نفسك 100 جزمة وتقولي يا ريت اللي جرا مكان

شخص رقم 1: !!!!!!!

ليه الكآبة دى. أنا عندى نظرة مستقبلية وعارفة اني مش حبقى زي بقيت الستات اللى متجوزين.

شخص رقم 2: كلنا كنا بنقول كدة واحنا مخطوبين. أنا اهو من "كوكب المتزوجين" وبقولك هو قالب واحد وكلنا بنتحط فيه

شخص رقم 1: يا بنتي أنا عارفة خطيبي، مش زي بقية الرجالة. هو عارف أنا بحب ايه وبيعملهولي، ومستعد يعملى أي حاجة عشان يبسطنى، مثلا هو عارف اني بحب الورد و بيجيبلى كتير أوى عشان يبسطنى. وأنا عارفة إنه مش حيبطل يعمل كدة بعد الجواز.

شخص رقم 2: اتنيلي، بكرة أنت تبوسي ايده عشان يدخل عليكى بوردة واحدة ولا حيسأل فيكي. بصي هي بتبقي مراحل، أولا تتمني يجيبلك ورد فاميسألش فاتقرري أنت تدلعي نفسك وتجيبيه لنفسك فا تحبطي زيادة فا تزهدى الورد من أساسه فا يكتشف إنه لازم يعملك حاجة أنتي كنتي بتحبيها لانك بقيتى نكدية و extremely negative فا يجيبلك ورد فى الوقت اللى يكون خلاص مش فارق معاكى فامتهتميش بالورد anymore . وقيسي على كدة كل حاجة!

ناهيكي بقى عن تطبيق مقولة"مش لازم تفكريه بطلباتك كل 6 شهور" وبالنسباله انتي حتتحولى من كائن الانثي الجميلة الي الزوجة "النكدية- الزنانة- الكئيبة- التخينة" ده غير "شوفى بقية الستات مهتمة بنفسها وجوزها ازاى مش زيك"، وكلما أبدع في وصفك كلما أحس بشخصيته كزوج مصري أصيل ودائما ما يختم كلامه بجملة "فين البنت الجميلة اللى كنت خاطبها- وديتيها فين؟!".

شخص رقم 1: بلاش يا ستى، بذمتك مش أحلى حاجة فى الجواز، أنك تخلفي ويبقى عندك عيال؟ 

شخص رقم 2: مين قاللك كدة

شخص رقم 1: هم اللى بيقولوا!

شخص رقم 2: ضحكوا عليكي :/

شخص رقم 1: لييييييييييييييييييييييييه!

شخص رقم 2: الصراحة مش عارفة أقولك ايه ولا ابتديلك منين. أحكيلك عن سهر الليالى ولا حياتك اللى بتضيع وانتي بترضعى وتغيري وتصوتي وتطبطي! وتشدى فى شعرك من كل اللي حواليكي، وتلملمي فى لعب مرمية فى كل حتة وتقعدى بالايام نفسك تستحمى ومش عارفة  ولا لما تيجي نازلة وتقعدى تحضري قبلها ب 4 ساعات عشان تلبسي وتلبّسي الكائن الفسل اللى بيجريكى وراه عشان تلبسوا! و تجهزى فى ببرونات وماية وأكل وبلاوي زرقة.

شخص رقم 1: اممممم عندك حق. بشوفهم كتير الامهات الغلابة دول!

شخص رقم 2: بكرة ياختي تيجي معانا فى الصف!

شخص رقم 1: بس عارفة، رغم ده كله أنا عارفة ان جوزى حيساعدنى. أكيد مش حيسيبنى فى الهم ده لوحدى.... مش كدة؟!

شخص رقم 2: أه طبعا هو مش حيسيبك فى الهم ده فعلا... هو حيجيبلك هم من برة ويحطلك على همك همين تلاتة :P

شخص رقم 1: علي فكرة بقى، مش كل الرجالة وحشة. أنت بس اللى متشائمة! أنت شوفتي الكلمة اللى قالها Ryan Gosling فى الجولدن جلوب لمراته! ايه الحلاوة دى.

شخص رقم 2: عارفة رايان ده اللى فرحانالي بيه ومثل فيلم The Notebook وكان طالع بيحب Rachel McAdams كانوا فى الحقيقة ضاربين بعض بالجزم ومش طايقين بعض. ده ممثل يا بنتى والتمثيل ده جين اساسي فى خلايا كائن "الرجل".

شخص رقم 1: بس دى زميلته فى الشغل لاكن هو بيتكلم عن مراته!

شخص رقم 2: حبيبتي It’s man - women relationship مالهاش دعوة بمراته ولا أمه ولا خالته!
لا بلاش أمه عشان أمه غير كل الستات بالنسبة له. أصلها هي تعبت فيه وفى تربيته لكن بقية الامهات ماتعبتش!!!

شخص رقم 1: طيب كلامك ده بيخليني جديا أفكر أني أفسخ خطوبتي وأعيش سنجل!

شخص رقم 2: لا لا سنجل ايه بس إحنا ما صدقنا لاقينالك راجل :D

أقولك على حاجة! مهما كانت الدنيا صعبة والجواز مسئولية والرجالة متعبة، بس كل واحدة فينا متعرفش تعيش مع حد تاني غير جوزها ده. لا حتعرفي تتقبلي عيوب حد تانى غيره ولا حتبقي محتاجة حب وحنان الا منه هو. يا بنتي الصدام المتبادل ما بين الراجل وزوجته هو ده اللى بيعمل للعلاقة قيمة وبيوطد الروابط الزوجية.

حبي جوزك كاpackage كله على بعضه ومتفكريش فى وحشه بس، كلنا وحشين! الشطارة إنك تستحملوا وحاشة بعض و تدعموا بيها حلاوتكم. ماتقرنيش علاقتكم بحد. كل couple وليه ظروفه وحياته ورا بابهم الف حكاية وحكاية ماتعرفيش هي مخلية علاقتهم عاملة إيه. وابعد عن قصص واسئلة الجروبات بتاعة الـFacebook دى عشان بتجيب المرض وتعلي الضغط :D
حبى "أمه" وعمليها على إنها فعلا ست واجب إحترامها وتقديرها وبلاش صورة "ماري منيب" النمطية اللى عندنا كلنا دى  صدقينى الخير بيقعدلك فى الدنيا،فــ "إتَّقِ اللَّهَ حَيْثُمَا كُنْتَ وَأَتْبِعِ السَّيِّئَةَ الْحَسَنَةَ تَمْحُهَا وَخَالِقِ النَّاسَ بِخُلُقٍ حَسَنٍ".
#قواعد_التعايش_كزوجة