نهى أباظة تكتب: رمانة متقشرة

الدنيا رمانة متقشرة ... ريحتها من بره معطرة ... وميتها من جوه معكرة
ناسها فيها متفرطين .. كل ماتحاول تلمهم .. تلاقيهم مش شايفين
كل واحد يارب نفسي ... تمشى تمشى لو حتى عكسي
عكسي وماله بس تمشى
فيها مين كان ليه أصل .. كل اللى يعدى عليك كسر
كسر من اللى كسروه زمان .. كسر من اللى نسوه الأمان
كسر من اللى علموه ان الفرصة ما تجيش غير بالخيانة .. واللقمة ماتجيش غير بالإهانة
وعشان توصل بالسلامة
لازم تطاطي ... لازم تسلم ... تقابل الكره بكدبة بيضا وابتسامة
ويا سلام لما تلاقى الدنيا فى ايديك ... تفتكرها دايمه ليك
كل ماتعلا فيها تتغر... تنسى الخير .. تفتكر الشر
اه  صحيح هتفلت من جنانها ... بس في يوم هتشبك فيك
حقك منها مش هتخده غير حصة ... ونصيبك تخده اتاوى... واللى يعدى منها بالفهلوة والحلاوة
يمكن ساعات تكون على ادك متفصلة ... وايام معاك تكون مش مقصرة
بس اوعى يغرك في يوم .. لو لقيتها مسكرة ... وافتكر ان اصلها رمانة مقشرة
وعجبى!