الحاجة «سبيلة» المتبرعة بثروتها لتحيا مصر: «حضنت الريس وقالى ادعي لمصر».. صور

على خطى الحاجة "زينب" التى تبرعت بقرطها الذهبى ومن المحافظة ذاتها تبرعت الحاجة "سبيلة" بثروتها والتى تبلغ 200 ألف جنيه لصندوق "تحيا مصر" والتقت الرئيس السيسى الذى أعرب عن تقديره واعتزازه بها قائلاً: "هكذا كانت وستكون الأم المصرية دائماً".

تحدثت الحاجة سبيلة لـ "صدى البلد" قائلة "أنا مش مصدقة وفرحانة أوى إنى قابلت الرئيس السيسى.. فرحانة عشان قابلت واحد بيحب البلد وعارف يعنى إيه مصر، ربنا يكرمه يارب ويحفظه لمصر ياااااه أخيرًا شفت الريس مش مصدقة الحمد لله عشت وشفته".

وواصلت: "لدى 7 من الأبناء أربعة أولاد و3 بنات جلال ويعمل فنى بمحطة أجا، حمودة مهندس زراعى بالإدارة الزراعية بأجا وأحمد ويعمل فنى صيانة بالوحدة المحلية بميت العامل وطارق صاحب مكتب استيراد وتصدير ولديها أيضا إيمان وحنان وأمل وتوفى زوجى الحاج محمد رسلان منذ 20 سنة وربيتهم وعلمتهم يعنى إيه مصر وإزاى نخاف عليها.

وتابعت: "بعت رسالة للرئاسة من 20 يوم وقلت عايزة أشوفه ولقيتهم باعتين ليا إنى هحضر تكريم أهالى الشهداء والأم المثالية وشفت الرئيس وخدته بالحضن وقلت ليه بنحبك والله أوى انت ابنى الكبير اللى مش خلفته".

وتابعت: "الريس قالى مش عايزة أى حاجة أؤمرينى قلت ليه عايزاك سعيد يارب وتبقى أحسن رئيس فى كل الدنيا وعايزة كل سنة أشوفك.. انت عايز تعمل كل حاجة حلوة للبلد وهتعمل.. عايزة بس كل سنة أشوفك وأسلم عليك لو ربنا إدانى العمر.. ورد وقال: "عنيا".. وسلمى على كل أم فى البلد وقولى ليها تدعى لمصر ".

فيما قال نجلها "طارق": "أمى سعيدة أوى أول مرة أشوفها فرحانة كده، عشان شافت الريس بتدعيله دايما وبتحب مصر أوى ودايما تقولنا حب بلدكم وعلمتنا يعنى إيه حب الوطن".