نهى أباظة تكتب: أبو غزلان لتوظيف العمالة فى أفغانستان

قفلت فى وشك خلاص ..والكل ضربها طناش
مش بس طناش ..انت لاعارف تاكل ولا تشرب ولاتنام
والنور بقي يقطع حتى في المنام..
انت لسه بتفكر
سيبها وعيش ...اطلع بره وماتقعدش على مفيش
بس للاسف
محتار تسافر فين ,ومش لاقى مكان يلمك ولا يهمك
لاسن ولا خبره بيهمنا , متعلم , مش متعلم , كله بيسافر عندنا
اوعى تبقى زعلان ابو غزلان حيشغلك فى افغانستان
وهناك ياجمالك واكل , شارب ,محارب على حسابهم , مش على حسابك
لا وايه حتخد مسدس وبندقيه ,وقنبله يدويه .تحميك من اى غارة جويه
ومعاهم بدل سكن, خيمه حرب يدويه,وكريم هديه , يحميك من التشوهات الناريه
كل ده حيبقى ملكك طول العمر , ده لو كان ليك عمر
ولفترة محدوده
لو قدرت تكمل هناك شهرين ومعاك اى كليه , حتخد الجنسيه الافغانيه, وتبقى علمت على الحكومه الامريكيه
مش كده وبس , محدش حيسألك على التأشيرة الاصليه ,ده انت عشان ترجع مصر محتاج معجزة ألهيه
استنوا ولسه المفاجأه الكبيرة :
لو كنت فافى ومدلع وملكش فى الافغان , ابو غزلان حيسفرك اليابان
وابو غزلان حيولعها نار , القبض هناك بالدولار
وبالين اليابانى , يعنى سافر وانشاالله تشتغل معدى على الكبارى
والعرض لسه مانتهاش
مع تأشيرة اليابان عرض جنان
زوجه يابانيه , بتوكلك وبتشربك وتسكنك فى عمارة , ولو زعلتها, مش حتبلغ عليك السفارة
الزوجه يابانيه , مش لوحدها, عيالها حيسكنوا معاك و معاها ,خدهم واعتبرهم عيالك , يلا ياعم امك داعيالك
مع ابو غزلان , هو ده الكلام