نهى أباظة تكتب : بلد البرقوق

بلد البرقوق, بلد فيها الحلو مسروق ... والمستوى محروق..
والجو حابب ناسها ..وناسها مش بتروق..
وحتروق على ايه ..اذا كان
فرحتهم حوسة .. ولمتهم حاجة وعوزة...
حتى لبسهم قميص وبلوزة
قلبهم اخضر خيار وشعارهم طبق كوسة
والكوسة فى البلد... خلت اهلها منحوسة...
والبلد سوق..
تجرب وتتمنى.. تشوف .. بس ماينفعش تدوق..
ويوم ما تدوق. .تدوق الخيبة.. تدوق الضحك على الدقون ..
دقون اصلية.. دقون عيرة.. اللمة فيها بذم وسيرة..
وسيرتك دايما بالكسرة مجرورة .. في بلد ناسها كلها عايزة تكون مشهورة...
تعمل من الوقعة.. ميت حكاية بقلم.. ومن النزلة خيبة راكبة جمل .
ايوه راكبة جمل .. ويوم ما تتعلم تسوق ..
تسوق الهبل .. تسوق العباطة ..تضحك على ناسها اخرها بطاطا.. وبرضه ما بتعرفش تضحك..عارف ليه ؟؟
عشان انت فيها مخلوق الكل بيضحك عليك .. ولو مااضحكش عليك.. تضحك فيها على نفسك ..
تقول انا مبسوط كالعاة... مش ناقصنى حاجة وبلدنا ولادة...
الصوم فيها عبادة.. والشغل بالنية.... والنية فى القلب بزيادة..
والزيادة ..الزيادة مش بتيجى فى كل حاجة.. بتيجى فى حاجة وحاجة..
بتيجى.. بس زى الطبلة فى ايد آلاتى... بتيجى بس اجره .مش ملاكى..
ايوة ملاكى .
بس الملاكى. كاش مش تقسيط .. واللى يفكر حياخد منها حاجة.. يبقى عبيط
..وعشان العبيط
متساق ومش بيسوق..وما ينفعش حتى يدوق..
توصل مهما توصل.. انت فى بلد البرقوق