ربة منزل تطهو «قناديل البحر» وتثير استغراب الرواد.. صور

"رب ضارة نافعة" جملة اقتنعت بها ربة منزل مصرية تدعى "منار" وطبقتها باستغلال تواجد "قناديل البحر" بكثافة على شواطئ البحر فى مناطق الساحل والإسكندرية ومرسى مطروح، وحضرت "طبخة" من نوع مختلف لتفاجئ الكثير من حولها وعبر مواقع التواصل أيضًا.

ونشرت "منار" تجربتها التى أثارت دهشة الكثيرين عبر موقع التواصل الاجتماعى "فيس بوك" بالصور وطريقة الطهى الغريبة فقالت: "لما جيت الشاطئ السنة دي لاقيت قناديل كتير أوي، وكأي ست مصرية قولت معقول كل القناديل دي هتترمي من غير فايدة، فقررت أدخل على النت وأشوف طريقة عمل وجبة من القناديل، أهو يبقى تغيير وتجرِبة جديدة". 

وتابعت: "دخلت جبت وصفة من الهند ووصفة من هونج كونج واتضح أنها وجبة شعبية في شوارع الهند، بعت العيال اصطادولي شوية قناديل صابحة من على البلاج، وروحت البيت عملتها".

وعن طريقة طهى "القناديل" قالت "منار": "القنديل عامل زي الطبق كده نازل منه شراشيب هي الرجلين، لبست جوانتي وشيلت الشراشيب دي كلها خالص بمعلقة ويتكحت لحد ميتبقى الطبق بس، مسكت الطبق نقعته في ميه وخل وليمون ربع ساعة، وبعدين عملت تتبيله السمك بتاعته، كمون وتوم وملح وزي مبتحبيها، قطعته جزل بس لازم تكون عريضة وكبيرة شوية لأنه بيكش في الزيت جدا، وتبلته في الدقيق والبقسماط زي السبيط بالضبط يتقلي لحد ما لونه يبقى ذهبيا، هيبقى مقرمش خااالص وطعمه أجمل من السبيط بجد".

وعن ردة فعل أسرة "منار" عند رؤية القناديل المطهية قائلت: "في الأول كانوا خايفين ياكلوه لحد ما جربوه وبعدين شوية بقوا يتخانقوا عليه، وعلى فكرة عجب الكلاب كمان خليكوا في القناديل الشفافة بلاش المنقطة لأني سمعت أنها ممكن تكون سامة، وكل سنة وإحنا والقناديل طيبين، ربنا ميقطعلهاش عادة وتزورنا كل سنة، على فكرة في الهند وهونج كونج بيعملوها كمان طواجن".