ﻣﻮﻗﻊ ﺻﺪﻱ اﻟﺒﻠﺪ

صدى البلد
الإشراف العام
إلهام أبو الفتح
رئيس التحرير
أحمــد صبـري
مدير التحرير
صفاء نوار

د. أشجان نبيل تكتب: الخلاصة

الإثنين 17/يوليه/2017 - 09:06 ص
صدى البلد
موضوع من أهم أولويات الحياة ومع الأسف فاهمينه بشكل خاطئ وبالأخص الشباب، مافيش شك أبدا إن كل إنسان بيحلم يبقى ناجح ويوصل لكل أهدافه، ومع ذلك وإحنا بنحلم بنشوف صورة الحلم بشكل مش مظبوط وده نظرا للمفاهيم المغلوطة اللي بيرددها الكثير وبيصدرها للغير وبقوة.
 
أي شاب لما بييجي ينزل سوق العمل بيعتقد إن الشهادة أو الواسطة (الكوسة) هي اللي هتكون فارقة معاه وتجيب من الآخر كده، مع احترامي ليك يا عزيزي إنت غلط والموضوع ده بيمثل نسبة لا تتعدى الـ20%، طبعا حضرتك هتستغرب وتسألني آمال الـ80% فين بقى؟؟؟
تعالى معايا بقى شويتين كدة وأنا أقولك هما فين وبالعقل وبالراحة كده.

أغلب أصحاب العمل والشركات في أي مكان في العالم بيدوروا على 80% ودول بيكونوا عبارة عن حاجة اسمها المهارات والقدرات الشخصية، واللى على أساسها حضرتك بتروح بتعمل المقابلة الشخصية وأحيانا بعد المقابلة دي كتير من الشباب بتقول إن المقابلة كانت منظر أو اللي بيسأل مش فاهم حاجة وآراء تانية من هذا القبيل.
 
مع احترامي ليك برده حضرتك غلط للمرة التانية لأن أصحاب العمل بيدوروا على المعايير والمهارات دي في شخصيتك بس بشكل غير مباشر.
 
طيب تعالوا نعرف مع بعض كده إيه هي المهارات دي
● التحفيز: لنفسك ولزملائك في العمل.
● التواصل: قدرتك على التواصل الجيد والفعال سواء مع العملاء أو الزملاء وكل الدواير المحيطة بيك.
● تكوين الثقة: إزاي تبني جسر من الثقة والاحترام مع بيئة العمل الخاصة بيك
● اتخاذ القرار: مع نفسك أولا ثم مع اللي حواليك وتكون مسئول عن النتائج بالكامل
● التفاوض: هتستغرب المهارة دي لكنها مهمة جدا وأول حاجة بتستخدمها فيها إنك بتتفاوض على مرتبك.
● القيادة: ودي بقى أكتر مهارة صعبة ومش متعلقة بالسن مطلقا، لكنها عبارة عن قدرتك على قيادة وإدارة مجموعتك لتحقيق هدفكم بأفضل الطرق الممكنة.
● إدارة المشاكل: إزاي لو اتعرضت لمشكلة في العمل تتعامل معاها بعقلانية وتجد حلول حيادية لحلها.
● التعليم الذاتي: إزاي تطور من نفسك مش في مجال عملك بس لكن في مجالات مختلفة لأن ده بيوسع مدارك تفكيرك وأفقك في الحكم على رؤية الأمور.
● المرونة: ودي بقى خاصة بالتأقلم والتفاهم مع الآخر حتى لو كنت مختلف معاه.
●المعرفة: استعدادك الكامل إنك تعرف وتتقبل من الآخرين استنادا إلى نظرية "يموت المعلم ولسه بيتعلم" أظن واضحة كده.
 
المفترض بقى يا عزيزي القارئ تقعد مع نفسك وبصراحة كده وتشوف إنت فين من المهارات دة وتسأل نفسك إيه اللي يخلي صاحب العمل ياخدك إنت تحديدا ويديك المردود المادي والمعنوي اللي حضرتك بتحلم بيه؟

في النهاية أحب أقولك شوية حاجات يمكن تفيدك في حياتك! ما فيش حاجة اسمها حظ أبدا لكن اسمها الفرصة، ولمعلوماتك الفرص كتير لكن الأهم بقى يا ترى إنت قدها ولا إيه؟ وإذا فعلا كنت قدها يا ترى هتقدر تستغلها بشكلها الصحيح؟

كمان بقى حضرتك مش هتبقى على مكتب ومدير طول ما انت نايم وبتحلم على السرير، لازم تجتهد وتتعب وتتمرمط علشان توصل، ولمعلوماتك نظرية "الفهلوة" اللي بيدعمها وبيتكلم عنها ناس كتير لو خدمتك شوية مش هتخدمك طول العمر، والخلاصة بقى لازم تعرف إن طريقة تفكيرك ورؤيتك للأمور هي اللي بتحدد لك إنت هتبقى فين.
ads

تعليقات فيسبوك

تعليقات صدى البلد

ﺗﺼﻮﻳﺖ

هل تؤيد إصدر قانون لإسقاط الوظيفة الحكومية عن الموظفين المسافرين للخارج؟

هل تؤيد إصدر قانون لإسقاط الوظيفة الحكومية عن الموظفين المسافرين للخارج؟