الحب.. فوبيا

بداية بقي .. المقال ده أو الكلمتين دول مش نصيحة ولا فتي و تنظير..ممكن يبقي رأي مبني من تجارب و قناعات عشتها و راجعتها و لقيتها غلط و اكتشفت منها الصح .. ممكن تقرا جزء من كلامي و تلاقي نفسك بتقول آه حصلي ! أو ممكن تقفش نفسك بتقاوم تكمل .. مش علشان أنا مملة ..أنا لذيذة جدا .. حتلاقي نفسك بتقاوم تفكر .. بتقاوم تواجهه حته جواك أنت عن قصد عاملها علي وضعية الصامت - SILENT .. أنت حر في قرارك في الأخر..



الفير اوف كوميتمنت.. هو اصله أو الماما بتاعته هي الحب فوبيا هو أنك تخاف تحب بشكل عام .. لو كل واحد قرر يتشجع و يركز مع نفسه حيلاقي غصب عنه عنده الفيرس ده ..
و علي فكرة الفير أوف كوميتمنت ممكن أنك اصلا تعمل أي حاجة بتحبها بشكل منتظم .. مش لازم المعني المتعارف عليه مابين شخص بتحبه و بيحبك ..ممكن تخاف تلتزم في هواية و يبقي لازم تنميها ..ممكن تخاف تودي ابنك التمرين لا يتعود و تحس بضغط مسئولية .. ممكن تخاف تعمل رجيم لا تخاف تفشل .. حاجات كتير أنت عارفها أكتر مني بتختلف من شخص للتاني ..

اما الحب الحب .. اللي هو بين الحبيبة

أنا أكتر واحدة بتحب الحب .. و فراشات و بالونات ..كل اللي يعرفني كويس عارف ده .. بس اكتشفت انه ظاهريا .. مش من جوه اوي .. عارف لما تكون عايش بفطرتك مش مخون و بتحب بكل ذره في قلبك و ممكن تموت كمان عشان اللي بتحبه و تقول وعود و تسمع وعود..و كله يطلع بلح .. اللي بعد كده بيحصل بعد التجربة دي بتعيش فترة في حياتك بيسموها DENIAL- إنكار و بعد كده مرحلة التقبل و بعد كده التحدي و بعد كده اللخبـطة و بعد كده التحدي تاني .. ممكن تتحدي و تحب تاني بس في كل مره حتقفش نفسك خايف .. مش مطمن ..مش عشان اللي معاك وحش ولا عشان هو مش مطمنك .. حتي لو طمنك ..لو أنت مطمنتش نفسك بنفسك عمرك ما هتعرف تحس بأمان مع حد ...لازم تدي الأمان لنفسك الأول عشان تقدر تديه .. عشان تقدر تستقبله كمان ...

أنا كنت محتاجة أسمع الكلام ده من حد ..بس ده وصلتله بعد كتير اوي ..يمكن سنين .. معرفش مين ممكن يقرا كلامي .. بس لو شخص واحد وصله ده و غير فيه و خلاه يفكر .. أنا بالنسبالي اتعشت و هفرح من قلبي إن كنت صوت وشوشه لنفسه انه يركز مع نفسه ..

فيه أيه كلنا بنسمعها .. و كلنا حافظينها و كلنا بيرددها .. بس محدش تأمل فيها بجد من قلبه و حاول بجد يعمل بيها و أنا أولكم..
"إن الله لا يغير مابقوم حتي يغيروا مابأنفسهم " مفيش حاجة هتتغير ابدا .. تماما لو وقفت علي راسك من غير ماتغير اللي جوه .. لو ركزت في كل حاجة بتتكرر في حياتك و نفسك تغيرها .. حتلاقي إنك بتفكر جواك بنفس الطريقة .. بتعمل نفس التصرفات .. بنفس النية .. و متخيل برضه إنها حتتغير ! طب ازاي يا جدع ؟
في مثل انجليزي بيقولك :
“If you always do , what you always did.. You will always get what you always got.”
اللي هو نفس معني الأيه لو فضلت تعمل نفس الحاجة ..هتحصل علي نفس النتيجة و هتاخد نفس اللي خدته ..من غير أي تغيير..

تجربتي بتتلخص في إني كان من سنين في حياتي عشت تجربة ..افتكرت إن لقيت الحد اللي ربنا رزقني به و حدوتي حتكون زي أي حد بيلاقي الشريك اللي بيفتكره حيكون هدية العمر كله .. من غير ما اطول .. بشكر من قلبي انه مكنش .. و مبقاش .. مكنتش بفهم لما أسمع من اخصائي نفسي ..عندك Trauma ؟ كأنه مرض مزمن .. أو مكنتش بصدق أن ممكن تجربة قاسية تشوه جزء جوانا كنا بنفتكر أن عمره ماحيتغير . . لما بتتصدم في شخص قريب منك .. سيكلوجيا بيبقي عندك
SELF DEFENSE MECHANISM حاجة جواك مسئولة عن إنها تدافع بيها عن نفسك .. مهمتها أن نفس الحدث ميحصلش تاني و متحسش بـنفس الوجع .. مهما حاولت تنكر الإنكار مش حيفيدك .. هو فعلا عندك و حتلاقيه بيظهر كده زي العفريت في مواقف تافهه و مهمة !

الفكرة لو مواجهتش نفسك حيفضل معاك العفريت ده و مستحيل تعرف تصرفه و علي فكرة محدش حيصرفهولك ..
بقالي سنين معرفش إن جوايا عفريت اصلا .. بكابر ! عشان عايزه ابان قوية .. الحب ضعف صح ؟
غلط ! الحب قوة في عز الضعف بس مع الإنسان الصح ..
منتهي الظلم إنك تبدأ حكاية و أنت جواك عفاريت محتاجه زاار عشان تطلع !
اللي اتعلمته و اللي كنت خايفة أواجهه نفسي بيه :
إن مش كل صوابعك زي بعضها.. و الماضي مش شرط أبدا يبقي حاضر أو مستقبل ..
الخوف ضعف .. الحب قوة
الخوف بيشل و حيخليك مكانك سنين
الإيمان و الخوف مبيجتمعوش في قلب واحد
أنت تستحق تدي لنفسك فرصة تاني .. و تالت .. و لحد آخر يوم ربنا كاتبه ليك فيك نفس ..
مش هتعرف تضحك علي نفسك كتير
كل يوم هيعدي و أنت جواك شبح الماضي أنت بتظلم روحك و اللي بيحبك - بتحبك .
مش هتعرف تدي حب مش خايف ولا مهزوز ألا لو أنت بجد مش خايف


حل ال SELF-DEFENSE-MECHANISM ده ايه بقي ؟

أنا مش دكتورة ولا أدعي الفلسفة بس عن تجربة .. ركز مع نفسك يوم واحد .. نفسك متستحقش منك يوم تتكلم معاها و تسمعها ؟ هي بجد عايزه ايه ؟ هي بجد مرتاحة ؟ مبسوطة ؟ طب خايفة ؟ ليه ؟ و من ايه ؟ و ازاي توقف الخوف ده ؟
ايه الحاجة اللي بقالك سنين بتعملها و أنت من جواك عارف إن فيه حاجة غلط محتاجه تتصلح ؟ ايه الحاجة اللي من جواك مش حاسس براحة و جواك كلام عايز تقوله و خايف؟ هو أنت ضامن بكرة اوي؟ هو أنت ضامن إنك كل يوم هتعمل اللي بتحبه ؟ حتشوف اللي بتحبه ؟ حتقضي وقت مع اللي بتحبهم ؟ ضامن وجودهم اوي؟ ضامن الحضن ده ؟ ضامن كل قرار بتأجله انه هيتعمل ؟ طب ايه ضمانتك ؟ أنت ضامن ال خمس الدقايق اللي جاية ؟ كام ساعة عدت كان ممكن تاخد فيها قرار مهم أو حتي تافه بس كان حيبسطك؟ كام دقيقة فاتت كان ممكن تكلم فيها حد بتحبه أو حتي ترد عليه بس نفضت أو كسلت أو حتي كابرت؟ كام ثانيه عدت كان ممكن تبعت فيها رسالة أو تقول كلمة حلوة كان ممكن تفرق في يوم حد .. كام يوم و كام سنة و كام شهر ممكن تكون بتعمل فيهم نفس الحاجه و بتقول النفس كلام و نفس الهزار و مقررتش تغير ده ..و تخليه احلي و أجمل .. ليه بنخاف التغيير؟ ليه التغيير بيخوف ؟ ليه اللي متعودين عليه اريح !

طب اضحكك ؟

أنت بتخاف تفرح ..

بتخاف تصدق إن فيه حد بيحبك بجد !

بتخاف لما حاجة تحصل حلوة كان نفسك فيها اوي ..

والله بتخاف ! عارف ليه ؟ اتعودت علي الوحش .. و فاكر إن هو ده اللي موجود و المكتوب .. بس ربك خلق مع العسر يسرين .. مركز في أم العسر و فاكر انه ناسيك و مش هيعوضك ليه ؟ متخفش أنا كنت زيك ..احنا كتيييييييير و عشان كده قررت أكتب عشان عارفه إن معظمنا بيخاف يحب .. و يتحب .. و يفرح و يصدق .. و يعيش حدوتة جديدة .. و يصدق إن ربنا ودود .. بص ورا متخفش ..بس بص عشان تواجهه كل اللي عملته و اتعملته و كمل .. متقفلش حدوتك علي كده ..مخلصتش ..لسه ..أنا عارفة إنك عايزها تخلص علي كده .. ماهو كده أسلم ..و بيني و بينك أريح .. أسهل و أريح تزعل و تقفل علي نفسك و تبعد .. بس أنت فعلا مرتاح ؟ أسمع نفسك كده ..اسمعها بجد حتلاقي إنك فاكر إنك مرتاح .. علي قد ما اليوم الي حتقرر تقعد فيه مع نفسك حيبقي SPECIAL DATE حتنكد عليك عيشتك أنا بقولك أهو .. بس بعد كده حتلاقي نفسك قفلت صفحة كنت فاكر أنك قافلها و حتلاقي نفسك اخف عشان حتشيل من علي نفسك حمل تقيل كان عامل زي العفريت غير مرئي .. علي فكرة أنت تستاهل تفرح .. و تحب و تتحب و تعيش مطمن .

لو فاكر إن ده مش من حقك و أن ربنا كاتب عليك كده ..أنت صح ماهو قالك ..

"أنا عند ظن عبدي بي..فليظن بي ما يشاء "