نصايح مارك جانجور لفرفشة الروح و العقل +18

ميييين الأول Mark Gungor ؟ و اااااايه الاثباتات إن الراجل ده صاحب مزاج و مفرفش عشان تاخد منه نصايح ؟ أنا اقولك مارك ده بقي برنس السنس ده هو صاحب سلسلة كتب كلها لتطوير العلاقات البشرية و الزوجية ..

 هو واحد من أكثر المتحدثين رواجا في العلاقات ,كل عام الآلاف يحضر ندواته، والمسئول الأول للخطابات الرئيسية للشركات في امريكا . نهج مارك الصريح والكوميدي بـيستخدم فيه الرسوم التوضيحية التي لا تنسى لتعليم المبادئ المثبتة التي هي مضمونة لتعزيز العلاقات والاتصالات و لو عملت سيرش عنه حتلاقي درر من ندوات عملها عن دراسة سيكولوجية عن دماغ الست و الراجل و ده ملخص مترجم من كتبه و ندواته بعد مذاكرة و بحث و قراية و لسه مخلصتش لانه بحر علم فيارب النقط اللي جاية تضحكك و تعلمك حاجة .. إنجوي يعني انبسط يعني كباية الشاي في ايدك و اتمزج في الكلام اللي جاي عشان ده كلام كبار ..

• أول حاجة احب اقولها لل singles.. مش مشكلة إنك سينجل ..أنت معندكش مرض ومفيش غلط فيك
• كل ما أسأل حد متجوز أخبار الجواز ايه يقولي جحيم - شهر بعد الجواز ؟ جحيم!
شهرين ؟ جحيم ..إزاي بتوصلوا للجحيم بالسرعة دي ؟ إنك تروح الجحيم بياخد وقت عن كده !
• لما تبتدي تقابل حد شوف الاول دماغه – الشكل المثير له تاريخ انتهاء صلاحيه
• شوف بيتصرفوا إزاي و رد فعلهم ازاي
• “you date the act, you will marry the react “
يعني: انت بتواعد الفعل و بتتجوز رد الفعل .
• لو أنت روح فاضيه و مستاءة و في حالة مزرية - خليك سينجل ..عشان لما روح فاضيه و مستاءة و في حالة مزرية تقابل روح فاضيه و مستاءة و في حالة مزرية حيبقوا اتنين اتجوزوا روح فاضيه و مستاءة و في حالة مزرية
• مترجعش مشاعرك .. مش لازم تعبر عن كل اللي حاسه .. ترجييع المشاعر ده بيخليك تكون قليل الذوق مع حبيبك (سر نجاح جوازي لفوق ال 40 سنة هو إن محدش بيقول مشاعره الحقيقة ايه )
• السبب الوحيد لفشل أي زيجة جواز هو سبب واحد بس : واحد من الطرفين أو الطرفين الاتنين بقوا انانيين

• لما يكون الراجل مضغوط و مش طايق نفسه و إنتي بتضغطي عليه عشان يقول الحقيقه أو عشان يقولك معلومة معينة ..أي حاجة هيقولها مش حتكون حقيقة .. حتبقي حقيقه مضغوطة ..و هيكون عنيف معاكي و الاجابه كمان حتكون بعيدة عن الحقيقة ..قريبه من العنف

• متبقاش غبي وتقول علي علاقتك انها تخص حياتك انت و الطرف تاني بس و تقول "إن محدش لازم يعرف خصوصياتنا " ده غباء و جنان ..من صحي إنك تدخل في حياتك couples و ناس سينجل ..رحب بيهم في حياتك عشان دول حيضيفوا رأي آخر ..رأي من بره ..رأي ممكن يحكم دون تدخل مشاعر
• شد نفسك كأنك بتشدها من هدومها عشان تعمل الصح في علاقتك مهما كنت مش عايز تعمل حاجة

• تقعدوا تغنوا أو تهزروا و أول ماترجعوا البيت تكشروا و تتخانقوا و تطلعوا ارواح شريره - بلاش يبقي في ترجيع للمشاعر علطول - سر نجاح أي جوازه هو عدم البوح بالمشاعر الحقيقيه الجارحة قول براحه علي مضايقك و اتفقوا علي حلول و الراجل ميطنش عشان الست مبتنساش !
• ورقه الجواز هي مش ورقه السماح إنك تكون قليل الذوق

• اتعلم تكون مبسوط - متستناش تبقي مبسوط لما حاجة معينة في حياتك تتغير "أنا مش قادر أكون مبسوط بسبب كذا ..أنا مش قادر أكون مبسوط بسبب ده " محتاجين نتعلم نمشي في حياتنا و احنا مبسوطين و في سعاده من غير ماتعلق سعادتك علي شخص أو علي حاجه – تبقي بنى ادم صفته سعيد مش تعيس - التعيس حيجذب التعيس
• كل ما حتكون stressed علي كل تفصيلة حتتضايق علي الفاضي في الاخر its dead end
• مفيش راجل ربنا خلقه عشان يحتوي كل مشاعر الست - خلي عندك حياة - اخرجي مع صحباتك بس متعتمديش إن الراجل هو اللي هيسعدك أو حيكون مصدر سعادتك الوحيد
• الجواز عمره ما اتعمل عشان تبقي سعيدة - الجواز هو إنك تشارك حياتك مع حد تاني مش إنك تبقي سعيد . أنت المفروض كده كده سعيد

• أنت بتروح ل MARRIAGE COUNCLER عشان سبب واحد .. إن معندكوش اصحاب حقيقيين – أو مفكرتوش تستعينوا بأصحابكم يحلوا بينكم .. ليه تدفع فلوس علي الأرض لما ممكن تتواصل مع صحابك و هما متخلفين زيك و هيوافقوا علي قراراتك المجنونة ؟

• فكرة الجواز حواليها معلومات من اهلك كلها مغلوطة زي إن لازم يكون معاك فلوس كفاية لازم تكون مأمن جميع احتياجتك المالية ...ده أي كلام ..لو استنيت حتستني ألا ما لا نهاية
• أكتر حاجة ممكن تجنن الستات إن الرجاله بيعملوا حاجات متوقعة جدا

• في أي علاقة هتحصد اللي بتزرعه ..حتسالني طب ليه علاقتي لسه مقرفة ؟ حقولك كده أنت لسه أكيد بتعمل حاجات مقرفة

• أكتر واحد بيفكر و واعي عن مشاعره هو أكتر واحد فاكر إن كل الناس فاهمه مشاعره ..زي مثلا مثال :
الزوج : أنتي زعلانة ؟
الزوجة : ماأنا قلتلك إني زعلانة
الزوج : امتي ده ؟؟
الزوجة : فاكر لما كنا بنتكلم و أنا قلت أممععمممممم
الزوج : آه كنت فاكر إنك عايزه تخشي الحمام (ده حيكون الرد التلقائي في دماغه )