نازل مصر

قالها نازل مصر ادور على شغل ،الصعيد عصرته عصر ومفيش فيه غير مرارة الصبر.. هاانزل مصر بيقولوا فيها من كل انواع الشغل وفيها الفلوس بتتبعتر على الارض.. هاانزل مصر لان كل اللى عايشين فيها بياكلوا كباب وبيشربوا بدل الميه خمر.. هاانزل مصر باسمع ان العيشه فيها مش عايزه تعب وكل حاجه هناك بالامر.

هاانزل مصر واسيب الغيط والفاس والجلابيه واتمخطر فى النوادى والكافيهات والسينمات والمسارح بلا هم
نازل مصر .. هاانزل مصر اتعرف على شابه حلوه وغنيه ومعاها اعيش امير من غير ولاتعب وفكر ولاغم.

هاانزل مصر من مكان لمكان اتنقل ومن حى لحى اتنطط وفى القرى السياحيه والبحور الصناعيه اغرق من كتر السعاده والهنا خالع عنى اثواب الفقر والهم.. نازل مصر وانا معايا وجوايا كل اسلحة الكيد والحقد على اهل مصر اللى عايشين احسن منا وحياتهم كلها مالذ وطاب من متع تطول العمر.

نازل مصر ومش راجع الا جثة تدخل القبر ويمكن كمان اشترى تربة هناك ويضمنى فى مصر قبر.

نازل مصر وكل همى اخلف عيال ينحتوا فى الصخر ويفضلوا فى مصر وميدوقوش طعم الفقر.

نازل مصر اخبط على ببان اغنيائها واخد منهم ولكل فقير اديله قدر.

نازل مصر اخلصها من الحرامية والمرتشين والقوادين واصحاب العهر.

نازل مصر ياامايا وفى قلبى الف دعوه ودعوه عشانك يامصر.

نازل مصر يااما وعندى امل ان يطلع عليها فجر ابيض يبلع سواد الظلم.

نازل مصر ياابويا ويااخويا وياابنى و بنتى وهاارجع ومعايا منها بشرة خير وستارة امن وحبل ستر.

نازل مصر وكل اللى عايزه منكم الصبر ومنهم يبعدوا عن القهر ويفضلوا فى رباط لاخر العمر....