نظرية 90 - 10 لتغيير 90% من حياتك

حتعمل ايه لو قلتلك أنك ممكن تتحكم في 90% من حياتك؟ طب والـ10% اللي باقيين؟ لا دول بقي بتوع ربنا.. بتوع القدر ملناش دعوة بيهم.

تعالى ركز معايا فى الـ 90% لو لقيت كلامي هجص وببيعلك الهوا في أزايز متكملش قراية.. ببساطة!

فيه واحد اسمه ستيفن كوفي.. سمعت عنه؟ لو لأ.. ستيفن ر. كوفي (Stephen R. Covey) كاتب ومؤلف أمريكي أشهر كتبه بتتدرس دلوقتي في الجامعات الأمريكية وكورسات التسويق Marketing، كتاب "العادات السبع للناس الأكثر فعالية" The 7 Habits of Highly Effective People، وده من أكتر الكتب مبيعات بالولايات المتحدة والعالم لحد دلوقتي.

اكتشف ستيفن كوفي قاعدة الـ 90/10، واللي ذكر أنها حتغير حياتك للأحسن.. على الأقل ردود أفعالك تجاه مواقف معينة. "وتعنى هذه القاعدة أن 10% من الحياة تتشكل من خلال ما يحدث لنا، والـ 90% من الحياة يتم تحديدها من خلال ردود أفعالنا".

ومعنى القاعدة دي أننا في الواقع معندناش القدرة على السيطرة على الـ 10% من اللي بيحصلنا، مثال: مش حينفع تمنع موبايلك من انه يهنج.. ولا تمنع حدوث زحام مروري اللي أتسبب فيه واحد ماشي عكسي، أما بخصوص الـ90% فالوضع مختلف إحنا نقدر نتحكم فيها عن طريق ردود أفعالنا. السؤال: هنعمل ده إزاي؟

في مثال الموبايل اللي هنج، ممكن توترك وتصرفك بعصبية يخليك تفقد أعصابك وتكسره، وده حيؤدي إلى فقدان الاتصال بأصحابك وأهلك!

خليني أوضح ده أكتر بمثال استخدمه ستيفن ببساطة، كنت بتفطر مع عيلتك وفجأة وقعت بنتك الصغيرة فنجان القهوة على قميص الشغل، في اللحظة دي أنت ملكش دور في اللي حصل، ولكن اللي هيحصل بعد كده حيقرره ردة فعلك.

بدأت بالصراخ والشتيمة وقعدت تأنب ضمير بنتك، فالطفلة انفجرت في العياط، وبعدين دخلت على مراتك تديها كلمتين وتلومها انها هي اللي حطت الفنجان على طرف الترابيزة، وبعد مشادة لفظية بينكما، اندفعت بكل غضب عشان تغير قميصك فرجعت لقيت بنتك انشغلت بالعياط عن إنهاء فطورها والاستعداد للمدرسة، ونتيجة ده فاتها باص المدرسة ومراتك لازم تروح شغلها!

فاضطريت أنت توصل بنتك بالعربية للمدرسة، وبما أنك متأخر.. عديت الحد الأقصى.. وبعد 15 دقيقة تأخير ودفع مخالفة مرورية بقيمة 500 جنيه، وصلت للمدرسة، بنتك جريت على مبنى المدرسة من غير ما تقولك مع السلامة.

وبعد وصولك للمكتب متأخر 20 دقيقة، لقيت نفسك نسيت شنطة شغلك.. فبكده يومك بدأ بصورة وحشة واستمر من وحش إلى الأوحش.. وبعد ما رجعت البيت لقيت توتر في العلاقة بينك وبين مراتك وبنتك، ليييييه؟ بسبب ردود أفعالك من الصبح..

ليه كان يومك وحش؟ هل بسبب القهوة، هل بسبب بنتك؟ هل أمين الشرطة؟ هل أنت سببت لنفسك ده؟

الإجابة هي: أنت سببت ده لنفسك.. أنت السبب.

"لم يكن لك دخل أو سيطرة على حادثة الفنجان ولكن ردة فعلك في الخمس ثوان التالية هي تسببت في إفساد يومك".

ده كان سيناريو تاني ممكن يحصل.. فنجان القهوة وقع عليك، وبدأت بنتك تعيط، وقلتلها بكل حنية: ولا يهمك يا حبيبتي.. بس المرة اللي جاية خدي بالك أكتر.. وتجري تغير قميصك وتاخد شنطة شغلك وبعدين ترجع تلاقي بنتك بتعملك باي باي وهي بتركب الباص.. توصل شغلك قبل ميعادك بـ 5 دقايق وتسلم على صحابك ومودك حلو إنك تهزر معاهم وتبدأ يومك، لاحظت الفرق؟
فيه سيناريوهان مختلفين ليهم نفس البداية، ولكن النهاية مختلفة.. ليه؟ بسبب رد فعلك.

وفي الحقيقة أنت معندكش أي سيطرة على الـ 10% اللي حصلت أما الـ 90% التانية فتم تحديدها عن طريق ردة فعلك.

افتكر قاعدة الـ 90/10 ومتقلقش!

تعالوا نتخيل سيناريو وحش.. حصل حاجة في شغلك وفجأة لقيت نفسك في البيت.. قالولك شكرا مستغنين عن خدماتك.. حتغضب؟ حتزعل؟ مش هتعرف تنام؟

طيب سيناريو رقم 2:
استغليت طاقة الغضب وقعدت تدور وسعيت لشغل أحسن ولقيت شغل أحسن وبفلوس أحسن.

مثال تاني: أنت وصلت قبل ميعادك وأنت مسافر ومستني في المطار.. ومع ذلك تأخر إقلاع الطيارة، وبوظ ده مواعيدك وخططك..؟ لييه حتصب غضبك وإحباطك على مضيفة الطيارة؟ هي كده كده معندهاش القدرة على التحكم في ميعاد وصول الطيارة ولا إقلاعها.

السيناريو 2:
استغل وقتك وروح اتفرج على الحاجات اللي في المطار.. أعمل شوبينج.. اشرب فنجان قهوة مع كتابك المفضل.. التوتر لن ينتج عنه إلا تعقيد أوضاعك وجعلها أسوأ.

ما تيجوا نلعب؟ مش أنت كده كده بتقول عليها خربانة؟ يلا نلعب ونخربها جرب يوم.. مفيش حاجة تخسرها
مش حقولك يلا كون ايجابـي والشمس الشموسة.. خاااالص

حقولك افتكر أن رد فعلك ممكن يغير نتيجة أي حاجة عايز تغيرها.. جرب يكون عندك رد فعل مختلف لكل حاجة كان عندك ليها رد فعل معين.. وشوف بنفسك أحداث جديدة في حياتك أهو بدل الملل اللي إحنا فيه.. جرب تلعب وتشوف 90% من حياتك مختلف.. بحاجة بسيطة جدا: رد فعلك.