EN 
أصدرت الشاعرة عبير يسرى أحدث قصائدها بعنوان "امسك مرتشي" ، والتى جاء نصها كالتالى :
أنا ابن حلال يا بلدي
وليكي عندي سؤال.
أحكي و اشكي يابلدي
يمكن ينصلح الحال؟
أنا اللي عمري مر
ولا عليا أقوال.
و كله بفضلك يارب
وسترك و طولة البال.
فاكر إني هنجز طلبي
من غير ما أقدم مال.
وأقدم ورقي ويمشي
من غير تعب و جدال.
لقتني واهم وكأني
مافي غيري ابن حلال.
لفيت شرقك وغربك
يتقالي ختم مرة،
وصورة و أصل مرة،
و عقد و توكيلات
و دمغة وعرض حال.
وضاع يومي و لقتني
راجع بألف سؤال.
صح إني أمشي صح
ولا أدفع و أذل المال؟!!!!!
وانجز واقصر واخلص
و زيي زي غيري
ويخلص الموال.
ونفضل محلك سر
والرشوة تبقى السر
وقالوا وقولنا وقال.
في بلدنا اللي يقبل رشوة
في حياته طبعا يشقى
ويتمسك في الحال.
ارفض و راقب وارصد
لفساد في أي مجال.
عين القانون صاحية
ومعاك تلاقي رجال.
خلص الكلام عندي
عندك كلام يتقال؟ !!!!!
