EN 
السيدة فتحية محمد إسماعيل .. ست مصرية معدنها من ذهب تبرعت بذهبها الخاص والذي تبلغ قيمته 260 الف جنيه بالكامل لصندوق تحيا مصر وقالت عن تبرعها كلام من دهب فعلا وخصوصا لما قالت : ( تراب مصر أغلى من أي دهب .. مصر لو جرالها حاجة وبقينا زي البلاد التانية لا هاينفع دهب ولا فلوس ولا أي حاجة ) يا سلام على جمال التاء المربوطة المصرية اللي اسمها الست فتحية وعلى جمال وصدق وطنيتها وحبها لبلدها وإدراكها لقيمة تراب مصر على الرغم من أنها من الطبقة المتوسطة اللي زي حالاتنا يعني هي مش سيدة أعمال وأموال .. مجرد ست أصيلة بتحب مصر وتراب مصر والدهب اللي اتبرعت بيه ده هو بالنسبة للسيدات الفضليات المصريات سند لهن يدخرنه للزمن والأزمات فكونها تتبرع بدهبها بالكامل ده حاجة عظيمة جدا جدا .
وقالت كمان الست فتحية : ( مصر تمرض لكن لايمكن أن تخرب لأن الله سبحانه وتعالى يحميها ..) وواضح من كلام الست فتحية انها متابعة تماما ومدركة تمام الإدراك حجم المخاطر التي تواجهها مصر بسبب الإرهاب وأزلام الإخوان والإرهابيين وأيضا متابعة العملية العسكرية الشاملة سيناء 2018 والتي تعتبر الخطوة الأولى لتنمية وتعمير سيناء .. حيث قالت الست فتحية أيضا : ( أنا مع دعوة الرئيس السيسي بالتبرع لتنمية سيناء وربنا يرجع أولادنا من هناك في سلام ويرحم شهداءنا .
وكمان طالبت الفنانين ورجال الأعمال بالتبرع لصندوق تحيا مصر لتنمية سيناء وطالبت الفنانين انهم يعملوا حفلات يذهب ريعها ودخلها لدعم صندوق تحيا مصر .. صحيح ان فيه كتير من رجال الأعمال تبرعوا لصالح صندوق تحيا مصر ولكن الست فتحية الواعية قالت نصا : ( فيه رجال أعمال تبرعوا لكن لسة فيه بعض رجال الأعمال خايفين على الفلوس ..) .. الله عليكِ يا ست فتحية متعك الله بالصحة والعافية .. وأيضا وجهت الدعوة للسيدات المصريات الجدعات للتبرع وقالت لهن : ( تبرعوا بدهبكم لو جرى لمصر حاجة من المتآمرين عليها من الخارج وأعوانهم في الداخل مش هاينفعنا دهب ولا غيره .. ) .
104 مليون تحية ليكِ ياست تحية يا أم المصريين الشرفاء المخلصين المحبين لوطنهم مصر .. نعم الست فتحية أعتبرها أمي وأم المصريين .. ست معدنها أصيل وأغلى من الدهب وممن يكنزون الدهب واليورو والدولار ويضنون به على بلدهم مصر اللي تربوا في خيرها وجمعوا منها ملايين الدولارات واليوروهات وهربوها في بنوك العم سام وبنوك العالم .. أما الست فتحية وكل تاء مربوطة وأم مصرية قدمت فلذة كبدها شهيدا من أجل مصر ومن أجل أن نعيش في وطن متماسك وقوي ومؤسسات قوية وجيش وطني من أقوى جيوش العالم يحمي حدودنا البرية والبحرية وقوات جوية قادرة على رد وصد أي خطر محتمل .
ويكفينا فخرا أن تكون الجبهة الداخلية بقوة وسخاء الست فتحية ومثلها ملايين الأمهات والسيدات المصريات الفضليات اللائي لا يبخلن على مصر بغالي أو نفيس أو دهب أو ضنى .. مصر محروسة بإذن الله وغنية بتائها المربوطة من أمثال الست فتحية العظيمة .. تعظيم سلام ومليون تحية .. وتحيا مصر وتحيا الست فتحية وكل تاء مربوطة مصرية عظيمة .. والله المستعان.
