عبدالرحمن حجاج يكتب : ما يذهب في الكيس الاسود

النفسنة برضه من الحاجات اللي لازم تتحدف في الكيس عشان كمية الناس اللي بتنسي تحقق ذاتها و تبني مستقبلها و بيكتفوا بالفرجة علي نجاحات كل اللي تعبوا و اجتهدوا و ينفسنوا عليهم و يندبوا الحظ العثر اللي مخلاهمش يبقوا حاجة زي الاخرين رغم انهم في الواقع ولا اجتهدوا ولا تعبوا عشان يبقوا حاجة،و ممكن نضيف مع العادات دي حاجات زي الخوف من التجربة و اننا نقرر اننا نقلب صفحات بهتانة في حياتنا ..

ثانيا،الكيس ده محتاج يكون جواه اشخاص كده معينين و معروفين في حياة كل حد،الاستغلالي اللي مهمته في الكون انه يستغلك و يستغل حبك ليه بشتي الطرق الممكنة ، و الحاقد اللي بيبين حب و اهتمام و هو في قرارة نفسه بيحقد عليك في كل خطوة بتاخدها ، محتاج تخرج من حياتك الناس اللي مش شبهك و مش لايقة عليك عشان متبقاش عايش حياتك بتحاول تتأقلم و تتلون مع ناس مش زيك بأي شكل من الاشكال و فوق كل ده محتاج تتخلص تماما من الناس اللي بتبقي موجودة في حياتك في الوقت اللي يحبوه و يسيبه حياتك برضه في الوقت اللي يحبوه..

ثالثا، محتاج تتخلص فعليا من كراكيبك ، خللي الحاجات اللي بتفكرك بذكريات حلوة،خللي كل الصور القديمة و اللعب و كل كراسة كتبت فيها مذكراتك في يوم من الايام،بس متخليش ازايز مياه و تقول بجمعهم ولا تخلي غطيان الحاجة الساقعة علي امل انك تكسب حاجة في يوم من الايام،لما تبقي اوضتك الفعلية خالية من الكراكيب و الدوشة هتبقي حياتك نفسها اهدي و اجمل بمراحل..

ارمي الوجع بس مترميش الذكريات اللي اتعلمت منها ازاي تتخطي الوجع ده، ارمي الناس الاستغلالية بس مترميش الحرص اللي اكتسبته،ارمي عيوبك بس مترميش ذاتك، و ياريت بقي لو نرمي علبة السجاير بالمرة و نخلي صدرنا نضيف ،و نتعود ان من دلوقتي و لحد اخر حياتنا نعرف و نحدد كويس اوي اللي بيروح في الكيس الاسود ده...