EN 
سارة مجدي تكتب المراية
المراية هي أول طريقة سهلة عشان تحب نفسك .. أيوه تحب نفسك بجد ..متشوفش الوحش فيها.
قنبلة الإنتقاد اللي بتطلع أول ماتبص في المراية ..وداني مطرطقة..عندي كرش ..ايه الجناب دي و تفكر تقطعهم بسكينة عشان تخلص من البظابيظ ولا تبصي و تقولي ايه ده مناخيري كبيرة /شكلي مش حلو ..
إنك تبص في المراية و تبقي راضي تماما من قلبك مش سهل .. بس مش صعب برضه.
ليه المراية ؟
عشان المراية بتعكس كل المشاعر اللي جواك لنفسك..
المراية بتخليك تشوف من خلالها انت بتقاوم تشوف ايه و تغمض عينك عن ايه ..
المراية بتوريك أفكارك بوضوح لو انت مقرر تعرف ايه اللي محتاج تغيره ..
لما تبدأ تبص للمراية عشان تشوف نفسك و تحبها ..حتبتدي تاخد بالك بتقول لنفسك ايه بينك و بينها ..و هتاخد بالك من اللي بتعمله ..حتبتدي تاخد بالك منك .. و تحسس علي الكلام اللي بتقوله لنفسك بدل ماتبوخها علي أي حاجة .
متخافش مش حوصل بيك لمرحلة "أنا مش قصير اوزعة أنا طوييييييل و أهبل"
بس جرب مش حتخسر حاجة ..لما حاجة حلوة تحصل في حياتك ..بص لنفسك في المراية و قولها شكرا .. شكرا إنك حاولت و نجحت .. قولها (نفسك) : بحبك و اللي مريت بيه وحش هيعدي ..
ساعات الكلام اللي بنبقي متأكدين انه بيريح اللي بنحبهم بيبقي أكتر كلام احنا نفسنا محتاجين نسمعه .. و نحسه لنفسنا .
لمعظمنا إن نقف قدام المراية و نواجه نفسنا بحلوها و وحشها صعب .. فتجربة المراية هي حاجة محتاج تشتغل عليها ..
الممثلين أول تمرين ليهم اسمه : تمرين المراية (تمرين تركيز)
الفائدة من التمرين :
هذا التمرين يساعد الممثل علي التركيز التام والشديد ويساعده علي الانتباه المسرحي وعدم الفصل والتحكم في ادواته.
التمرين :
يقف اثنان من الممثلين امام بعضهما ويسمى احدهما الاصل والاخر المراية , وينظر كلا من الممثلين في عين بعض حتي يصلوا الي نقطة جيدة من التركيز ثم يقوم الاصل بعمل بعض الحركات البسيطة في البداية وتكون بطيئة ثم تشتد الحركات مع احتراف التمرين .
العين من اهم ادوات الممثل ,بل هي معيار الحس- عن تجربة - فعن طريق العين تستطيع ان تتواصل مع الممثلين علي المسرح ,وايضا تستطيع ان توصل الحالة الي الجمهور ,وهذا التمرين هو احد التمارين الهامة في التركيز عن طريق العين.
ملحوظة :
البعض يخلط بين تدريب المراية وتمرين المراية ,فتمرين المراية الذي كنا نتحدث عنه اما تدريب المراية وهو الذي عادة يقوم به الممثل بمفرده بدون مدرب في المنزل حيث يقف امام المراية ويقوم بمراقبة تعبيرات الوجه-Expression- و ردود الفعل - Reaction .
التمرين ده ايه فايدته و ايه لازمته في اللي أنا بقوله .. ؟ عشان إنك تجرب تعمل ده مش تفاهة ده أداة مهمة استعملها كل فنان استمعت بفنه .. و هي طريقة عشان توصل لنفسك بجد و تقدر تحس و انت واعي بكل حركة في جسمك و نظرة و تبتدي تحب نفسك كأنك بتشوفها لأول مرة ..
لو بدأت و جربت التمرين البسيط ده حتبقي اقل بواخه مع نفسك و مش حتنتقدها و تشوف عيوبها بس ..المراية حتبقي لعبتك و قريب صاحبتك و صاحب مش عدو .. حتشوف نفسك بشكل تاني و مش حتجنن زي ما بيقولوا متخافش.
