سارة مجدي تكتب : إيه الدافع اللي في حياتك ؟

"الدوافع شىء يجب أن يتجدد يوميًا" زيج زيجلار"

بحسب تعريف علم النفس لها، الدوافع النفسية هي المحرك الرئيسي بالنسبة إلى سلوكيات أي شخص منا، تقوم الدوافع النفسية بتوجيهنا وتوجيه تصرفاتنا دومًا.

أنواع الدوافع النفسية:

1- هناك دوافع جسمية كالجوع والعطش وهناك دوافع نفسية كالرغبة في إثبات الذات والنجاح.

2- هناك دوافع مؤقتة كالجوع وهناك دوافع دائمة كالدافع لإثبات المكانة الاجتماعية

3- هناك دوافع فطرية وراثية كالجوع وهناك دوافع مكتسبة كالشعور بالواجب وتحمل المسئولية

المقالة دي عن الدوافع النفسية.. أنا اخترت إني مش حتكلم المرة دي..يعني مش هعرض رأيي الشخصي ..
بس هعرض مجموعة من الاسئلة عملها علماء نفس عشان يقدروا يحددوا الدوافع الإنسانية للأشخاص من مجموعات و ثقافات مختلفة .. يلا فضي دماغك خمس دقايق و هات ورقة و قلم و جاوب بكل صراحة ..

1- ايه الحاجة اللي بتكون مبسوط و انت بتعملها لدرجة ان ممكن الوقت يعدي من غير ما تحس به ؟

2- ايه الهدف من حياتك ؟ عايش عشان ايه ؟ ايه اللي أنت عايزه فعلا من حياتك ؟ و ليه ؟

3- ايه الحاجة اللي بتحلم تعملها في يوم من الأيام؟

4- ايه الحاجة اللي في ايدك و مأجلها عشان فاكر نفسك حتفشل ؟

5 - ايه الحاجة اللي لو ضامن 100 % إنك هتنجح فيها كنت هتعملها ؟

6- لو مفيش عوائق مادية...كنت هتحب تعمل ايه في حياتك ؟

7- مين مثلك الأعلي أو شخص متابعه أو حتي تعرفه ..وبيعمل الحاجة اللي نفسك تعملها ؟ و بيعمل ايه ؟

8- هل البيئة اللي انت عايش فيها مساعدة في إنك تكون أحسن واحد ممكن تكونه ؟ هل بتخرج أحسن ما فيك ولا العكس ؟ و لو العكس عملت أي حاجة قبل كده عشان تحسن الوضع اللي انت فيه ده ؟

9- هو انت تستحق تعيش سعيد؟ أنت شايف و مؤمن إنك شخص يستاهل السعادة ؟

10- هل بتجلد ذاتك كتير و بتنسي تسامح نفسك و تديها فرصة تانية ؟

11- بتزعل من حاجة بتحصلك كل شوية ؟ لو آه .. عملت ايه عشان تبقي سعيد و تغير اللي بيزعلك ؟

12- ايه أكتر المشاكل بتواجه العالم دلوقتي من وجهه نظرك؟ و لو اتحلت الناس هتبقي حياتها أحسن و سعيدة ؟

13- لو عرفت أن حياتك هتنتهي في خلال أسبوع واحد ..هتعمل ايه ؟ و هتندم إنك معملتش ايه ؟

14- لو فكرت في المستقبل ..عندك استعداد تطلع أحسن مافيك و تخرج أحسن انسان جواك ؟

خلاص كده مفيش اسئلة تاني ..
أبدأ أسأل نفسك ايه اللي بعمله غلط و ممكن اصلحه في حياتي ؟ ايه محتاج ازوده في حياتي وايه محتاج ابطله ؟
براحة علي نفسك و قرر انهاردة تتحمل 10 % زيادة مسئولية تجاه حياتك ..و أعرف ايه القرار اللي حتاخده مهما كان بسيط ؟
مثلا …
عايز تخس؟ هتبدأ تروح الجيم و تظبط نوعية أكلك!
عايز تبدأ تقرا ؟ هتقرا 5 صفحات كل يوم من كتاب اشتريته و راكنه 🙂

اذا اردت ان تفعل شيئا ستبحث بكل تأكيد عن الطريقة المناسبة ، اما اذا لم ترد فعله فستبحث عن عذر .
- جيم روهن