صيانة أون لاين.. كيف تتغلب على معاناة البحث عن صنايعي؟

قرر محمد متولي الانتقال والسكن بأحد الأحياء الجديدة، بحي الشيخ زايد، ولكن بعد فترة من إقامته واجهته مشاكل البحث عن خدمات الصيانة سواء السباكة أو النجارة أو إصلاح الأجهزة الكهربائية "السكن بالأحياء الجديدة له مميزاته ولكن عيوبه كثيرة منها غياب أفراد الصيانة، ولو وجدت فني صيانة، فيكون إما بمقابل مادي كبير أو لا يفقه شيئا وياخد مقابل معاينة على الفاضي".

تجارب سيئة
وأضاف: "الأزمة الكبري أني أتعرض للنصب أكثر من مرة، بقطع غيار مضروبة لطقم الحمام، وأيضا لوصلات كهرباء ودش، بخلاف الأجهزة الكهربائية، وبعد ما يقولي السباك أو النجار إن كل حاجة تمام، ألقى طقم الحمام فك من بعضه وسرب مياه، والماسورة اتكسرت، دا غير إن الغسالة عطلت بعد تصليحها بأسبوع وقالي دا عيب تشغيل".
فني غير متخصص
"طبعا مش هتقدر تخد حقك من بتاع الصيانة أو تثبت إنه غير متخصص وفني غير كفء، وتجارب كثير لجيران لي عانوا من عدم كفاءة الفني، وبقا فكرة إن تلاقي سباك أو نجار أو كهربائي كفء عملة نادرة للغاية، ومكلفة ماديا جدا، دا غير إنهم بقوا نادرين للغاية ولو بتدور على صنايعي شاطر كأنه إبرة في وسط كوم قش".. يقول محمد.
"قطع الغيار الأصلية مش موجودة، وبنضطر نشتري الصيني، لكن الزبون يقول لنا دا غش، طيب أجيب إزاي الأصلي وهو تمنه ضعف سعر الجهاز وقت ما اشتراه، وبالتالي الأهالي لازم يدركوا دا ويعرفوا إن الفني بيكون مضطر".

صيانة أون لاين
مشاكل البحث عن الفنيين لخدمات الصيانة المنزلية، دفعت البعض لطرح فكرة خدمات الصيانة المنزلية "أون لاين"، حيث تعلن إحدى الشركات عن أول سوق للخدمات المنزلية على الإنترنت: "هدفنا أن نصل   ​العملاء بأفضل مقدمي الخدمات ونقدم​ ​لهم عروضا خاصة وخدمات متعددة أهمها سباكة، نجارة، ​كهرباء​، تكييف، ألوميتال، أكتر من 14 خدمة فى الصيانة وخدمات منزلك، وتضمن عمالة بجود​ة​  ممتاز​ة​  وسعر منافس"، حسب إعلان الشركة.
ماهية الخدمات
عند التواصل مع مسئولي الشركة، شرح محمد مراد، أحد العاملين بها، أنه تم إنشاء الشركة تحت شعار "مساعدك الذكي لتوفير الخدمات المنزلية عبر الإنترنت"، وإذا لم يرض العميل عن الخدمة، ترجع الشركة له النقود أو تعيد تنفيذ الخدمة، كما تتوافر خدماتها في القاهرة والإسكندرية، ولدينا أكثر من 40000 عميل وأكثر من 600 فنى وعامل مضمون ضمان الجودة وتنفيذ احترافى أكثر من آلاف الطلبات شهريًا، لصيانة تكييفات والنقاشة، وخدمة المعاينة مقابل 25 جنيها.
نماذج للخدمات
وعلى سبيل المثال، خدمة تأسيس سباكة حمام ومطبح بـ1.200 جنيه أعمال الكهرباء، ويقوم الفنى بالمعاينة لتحديد عملية وتكلفة الصيانة فقط بـ 25 جنيها ويبلغك بالتكلفة والخامات قبل البدء، حسبما قال أحد العاملين بالشركة.

وحول آلية ضمان كفاءة الفنيين يقول: "جميع الفنيين والشركات المتعاقدين بياناتهم مسجلة بالكامل، وموقع معهم عقود رسمية تضمن حقوق العملاء".


اشتري دماغك 
شركة أخرى تعلن عن خدمات الصيانة المنزلية عبر الإنترنت: "اشتري دماغك وكلمنا.. لو عندك مشكلة في (السباكة - الكهرباء - الدش - النجارة - التكييف)، لدينا أشطر فنيين متخصصين.. علشان نضمنلك الجودة والأمان، وبتعرف التكلفة قبل الشغل، والمعاينة كمان مجانا.. شغالين 24 ساعة طول الأسبوع.. أسعارنا مناسبة لأي حد وثابتة في أي مكان، وأول خدمة ليك 50% ولدينا فروع بجميع المحافظات والأحياء". 
مفيدة للأحياء الجديدة
بيمنا رأى محمود القاضي، أحد سكان الشيخ زايد، أن خدمات الصيانة عبر الإنترنت أفادته كثيرا "تعاقد معهم على تركيب الأثاث والكهرباء والنجف والنجارة للأثاث، والميزة أن كله مع بعضه، بدل ما كل فني يجي لحاله بتكلفة لوحده، والشركة معروفة والتقييم أون لاين، واتفقت معاهم على السعر في الأول، بدل ما أتعرض للنصب من كل صنايعي على حدة".