كواعب البراهمي تكتب: أجمل وليد

فارد جناحه علي المدي
وبيحلم بيوم يكون
فيه البطل
حالف بربه وبالقضا
ليحمي الأرض والسما
مهما حصل
حالم بيوم الفرح
يلبس جديد
حاضن سلاحه وفرحته
ومنتظر زفته
في يوم العيد
وما كانش يعرف
إن دي آخر رحلته
وهيروح بعيد
عند اللي خلقه وصوره
ولأحلي موته قدره
وإن مات فينا شهيد
مليون شهيد بيتولد
يالللي أنتو من دمنا
وياللي عشتوا في أرضنا
بتفكروا في أيه ؟
هتعملوا بينا فتن ؟
عمركم ما هتقدروا
يا أصحاب الفكر العفن
مش إحنا اللي ننهزم
ولا أحنا اللي ننكسر
ولا أحنا اللي نتهرب
من الدفاع عن الوطن
أحنا اللي بينا وبين بعضنا
مليون وريد
يربط قلوبنا بالوفا
وبالدفا وبالسكن
من الدلتا لآخر الصعيد
أحنا اللي مهما مات مننا
شهيد ورا شهيد
بتولد غيره في نفس اللحظة
مليون وليد
كلهم يتمنوا الشهادة
فدا الوطن
آآآه يا زمن
ياللي بتعري القلوب
وبتكشف لنا
مين الصديق ومين العدو
ومين الرفيق
ومين اللي عمرهم ما أهتدوا
ومين اللي بيحرس البلد
علي الجبهه وعلي الحدود
مين اللي بتقدر تعيش
وتقول مفيش
أغلي عليا م الوطن
ومهما كان الثمن
الأم تمسح دمعها
تبكي وتشكر ربها
وتتنظر يوم التلاقي
وهي ضامنه أنها في الخلود
تسبق علي جنه عدن
وأن أبنها ياخدها معاه
لجنه تعيش فيها متنعمة
وبدل الدموع ضحكتها متنغمة
قدمت روحها ودمها أبنها
اللي مهما كان غالي عليها
مش أغلي من الوطن
يا شاب من أحلي الشباب
وحياة غلاوتك عندنا
وعندها
وحياة آمالك وحزنها
وحياة دمك اللي أرتوي
بيه التراب
لناخد حقك مهما كان
ومهما كانت الصعاب
سننتصر
لأن الحق باقي
زي الروح في الوجود
ورب الحق والخلود
سننتصر