ابراهيم عطيان يكتب: قصـة الأمــس

ازاي مش قادر تنساني وعايز نرجع زي زمان!
دا أنت هتجرح واحد تاني!
أنت حقيقي ملكش أمان
جاي دلوقتي تقوللي بحبك مش هنساك
فاكر ان سنين الغربة هتنسيني اللي انت عملته؟!
وارجع تاني أغرق في هواك!
حاجة بجد غريبة وصعبة
مش هرجعلك اسكت بأه ومتتعبنيش
تقدر تنكر إني تعبت معاك وصبرت؟
واتحملت الصعب عشانك
وراعيت فيك العشرة وكنت بحبك
بس خلاص قربك دلوقتي ميلزمنيش
ومتنساش انت اللي بدأت
بس بجد:
انت عملت معايا الصح لما فارقت
كانت صعبة عليا الأول، لما مشيت وغيابك طول
لكن اللي انا شفته في بعدك كان مقبول وأحسن بكتير
وعرفت ان أنا ممكن أكره شيء في الأخر يطلع خير.
ابعد عني انا مش هرجعلك ودموعك دي مش هتفيد
دا انا حاسس بسعادة وراحة وانت بعيد
خلى اللي انت اختارته ساعتها ينسيك حبي
وأنا هدعيلك تقدر تنسى وأتنمنالك حظ سعيد
بس ياريتك تقدر تنسى
كل شوية بتيجي تقوللي نرجع تاني عشان مش قادر؟
طب منا برضو بقيت مش قادر؛ إني أشوفك تاني قصادي
وانا بحلفلك ان كلامك دا مش فارق
ولا هيغير شيء جوايا
ودموع عينك مش هتقصر سكة معايا
ولا هتأثر؛ علشان دا أخرك ويايا.
سنة سنتين وبترجع تاني تقوللي بحبك
وتسمعني كلام قولناه
مبلاش تتكلم في الماضي وتضيع وقتك ع الفاضي
اللي مبيننا حكاية وخلصت مش هنعيدها
قصة قديمة بدون عنوان انا حتى نسيتها
وانت كمان لازم تنساها.