EN 
بدون تمهيد .. وعلشان ندخل فى الموضوع على طول ، فــ الاتفاق العسكرى والبحرى بين السراج وأردوغان بيفكرنا فعلا بمشهد من مسرحية مدرسة المشاغبين ، لما أبلة عفت ، قعدت مع بهجت الأباصيرى فى الفصل وطردت كل الطلبة علشان تتكلم معاه لوحدهم .. و مرسى الزناتى بينده عليهم من برة الفصل ويقول "هــ نحدفكم بالطوب" .. أهو هو ده بالضبط الوضع الحالى ولسان حال أردوغان ... و كل اللى يملكه إنه يحدف بالطوب وبس !! .. لييه بقى !؟ ..
شوف ياسيدى ... الإتفاقية اللى عملها السراج دى ، لا يعتد بيها .. و مافيش حد هــ يعترف بيها ، لأنها صادرة من شخص برغم إنه رئيس ما يسمى بحكومة الوفاق .. لكنه غير مخول بمفرده ، لإبرام اى إتفاقية دولية مع أى طرف دولى طبقا لإتفاق الصخيرات أو الاتفاق السياسي الليبي اللى تم برعاية الأمم المتحدة بتاريخ 17 ديسمبر 2015 بإشراف المبعوث الأممي مارتن كوبلر لإنهاء الحرب الأهلية الليبية .. واللى بيوضح إن رئيس الحكومة مش من حقه يتحرك بمفرده إلا بموافقة كل الأطراف .. وأولهم مجلس النواب فى طبرق .. وخصوصا إن مع الوضعية الحالية ... فحكومة الوفاق لا تسيطر فعليا غير على 15% بالكثير من الأراضى الليبية !
ولما نلاقى العميل الليبى الإخوانى الموالى للتنظيم الدولى ، بيلجأ للرئيس التركى الإخوانى وعضو التنظيم الدولى للإخوان علشان يعمل معاه إتفاقية عسكرية وبحرية ... ياترى مين اللى ممكن يعترف بــ إتفاق زى ده .. إتفاق ممن لا يملك مع من لا يستحق !!؟؟
الشق الأول من الموضوع هو محاولة من السراج وأردوغان للمحافظة على ما فى إيديهم من الأرض حاليا ، ومحاولة وقف التدهور فى السيادة والسيطرة على الأرض لصالح الجيش الليبى بقيادة حفتر ... بمعنى .. هى فرصة الوقت بدل الضائع لمنع حفتر من السيطرة على طرابلس ... وخصوصا بعد دخول الروس على الخط وإرسال قوات روسية غير رسمية لليبيا زى ما أعلنت أميريكا .. و ده هــ يخل بالتوازن العسكرى فى الداخل الليبى فى غير مصلحة الفصيل الإخوانى .
بالإضافة إنه محاولة لمنع حفتر من مزيد من السيطرة على الهلال النفطى ... وبالذات بعد ما سيطر الجيش الليبى من يومين على حقل الفيل وهو أحد الحقول النفطية الكبيرة .... و لجوء العميل الليبى لأردوغان فى التوقيت ده بالذات ، بيقول إن الموقف ليس على مايرام بالنسبة لمليشيات حكومة الوفاق الإخوانية .
و بيظهر رفض أردوغان لخسارة نقاط تمركزه فى ليبيا و رفضه أيضا خسارة بوابة إمداد نفطى وإستثمارى ممكن تقلل تأثير الأزمة الإقتصادية اللى بيعانى منها النظام التركى حاليا .. مع الوضع فى الاعتبار إنه فيه غياب شبه تام للمعلومات بخصوص الأوضاع على الأرض فى الوقت الراهن.
أما الشق التانى والمضحك فى نفس الوقت فهو إتفاقية ترسيم الحدود البحرية والتنقيب عن الغاز فى المياه الليبية .. والحقيقة مش عارف إزاى يكون فيه ترسيم حدود بحرية بين دولتين مافيش بينهم أى تشابك فى المياه الإقتصادية .
و ده معناه إن تركيا بتحاول تحط مسمار جحا فى مواجهة كيان دولى ورسمى قائم بالفعل وهو منتدى غاز شرق المتوسط بقيادة مصر .. واللى تركيا بتحاول تعمل كل اللى تقدر عليه علشان تفسد هذا المنتدى أو تفككه ... ومش عارفة تعمل كدة .. لأن كل محاولاتها تندرج تحت نطاق البلطجة مش أكثر .. بنفس الطريقة اللى ذكرناها فى بداية المقال .. طريقة "هــ نحدفكم بالطوب" ... وخصوصا بعد ما عجز القرد الأردوغانى عن إستخدام ذريعة قبرص التركية فى ملف الغاز واللى ماحدش معترف بيها اصلا غيره !!
الصراع دلوقتى فى ليبيا هو صراع طرفين ، و كل طرف بيحاول يكون له سيطرة على الملفات المختلفة من أجل شرعنة وجوده فى مواجهة الأطراف الدولية .. سواء بالسيطرة على أكبر مساحة من الأرض قبل الدخول فى إطار مفاوضات خد و هات ، وسيب وأنا اسيب .. أو اللعب بالملف السياسي وإبرام إتفاقيات دولية لإضفاء صفة الشرعية على الممسك بالملف ده !! .
مع الوضع فى الإعتبار إن البرلمان الليبى أصدر بيان إدانة للإتفاقية اللي أبرمها رئيس حكومة الوفاق مع تركيا وإعتبرها تهديدًا وانتهاكًا صارخًا للأمن والسيادة الليبية ... وإتهموا فايز السراج إنه بــ يسعى من وراء هذه الاتفاقية إلى منح تركيا حق استخدام الأجواء الليبية وكذلك البرية والمياه الإقليمية دون إذن الجانب الليبي ... يعنى من الأخر القصة معجنة ... و هــ تدخل فيها اطراف كتيرة .. وهتبقى فيه معارك طحن عظام سواء سياسية ، أو على الأرض ...
طب مصر عملت إيه .. !؟
الظاهر أمامنا والمعلن إن وزير الخارجية سامح شكري، أجرى إتصالا هاتفيا يوم الخميس 28 نوفمبر الجاري، بكل من وزير خارجية اليونان "نيكوس دندياس" ووزير خارجية قبرص "نيكوس خريستودوليدس"، للتباحث فى الموضوع... وصرح المستشار أحمد حافظ، المتحدث الرسمي باسم وزارة الخارجية، بأنه تم التوافق بين الوزراء على عدم وجود أي أثر قانوني لهذا الإجراء الذي لن يتم الاعتداد به لكونه يتعدى صلاحيات رئيس مجلس الوزراء الليبي لأن المجلس منقوص العضوية بشكل بَيّن، ويعاني حاليًا من خلل جسيم في تمثيل المناطق الليبية.
ومن ثم ينحصر دور رئيس مجلس الوزراء، محدود الصلاحية، في تسيير أعمال المجلس، وأن كل ما يتم من مساعٍ لبناء مراكز قانونية مع أية دولة أخرى يعد خرقًا جسيمًا لاتفاق "الصخيرات، فضلًا عن أنه لن يؤثر على حقوق الدول المشاطئة للبحر المتوسط بأي حال من الأحوال .. !!!! ... ومصر طلعت بيان رسمى بالكلام ده .... يعنى و من الأخر كدة .. يالا يا بابا إنت وهو ، روحوا إلعبوا بعيد ... و ده طبعًا الموقف المعلن ... و ما خفى من تحركات سياسية وربما تحركات اخرى ، كان اعظم.
وفى المقابل .. قامت وزارة الخارجية اليونانية إمبارح ، باستدعاء السفير الليبي في أثينا، واحتجت على توقيع حكومة الوفاق مذكرة تفاهم مع تركيا حول "الصلاحيات البحرية"... و أمهلت السفير الليبى فرصة لحد يوم حتى الخميس الجاى، لمغادرة اليونان، إذا ما تراجعتش حكومة الوفاق عن توقيع المذكرة مع أنقرة.
بالنسبة بقى للى خايف من اى تواجد تركى فى ليبيا .. فــ لازم نعرف إن ده موجود بشكل أو بأخر .. ومش مستنى إتفاق زى ده علشان يحصل .... أما فيما يخص السعى لإنشاء قواعد عسكرية تركية على الأراضى الليبية ... فــ ده مش هيحصل ... حتى بالأمارة إبقوا إسألوا جزيرة سواكن.
وعمومًا .... مستقبل ليبيا بيتحدد بنتيجة صراع بين مصر و اليونان و قبرص و روسيا و فرنسا من جهة .... وبين تركيا و ايطاليا و امريكا من جهة اخرى .... و اللى بيحصل في ليبيا هو الدرس اللى بيتكرر تانى و تالت بعد ما شفناه في سوريا و اليمن .... و هو ان الشعوب هى اللى بتدمر بلدها و جيوشها و مؤسساتها الوطنية .... بتنتظر مصيرها لما يحدده الاخرون حسب مصالحهم و اللى صراعهم بيدور على ارضهم و بضريبة دماء بااااهظة بتدفعها الشعوب دى من شبابهم.
إلا صحيح بالمناسبة ... هو الأستاذ بتاع ولا مؤاخذة وكالة ناسا .. لسة ماعرفش مصر بتشترى سلاح لييه !!؟؟؟
تحياتنا للجميع .... وحفظ الله مصر
#تحيا_مصر
