EN 
هاجم المطرب الشعبي عمر كمال، نجم أغنية "بنت الجيران"، الإعلامي الإخواني معتز مطر، بعد استغلاله قرار منع المهرجانات في مصر ونشر مقطع فيديو له وهو يحيي إحدى الحفلات في السعودية لإثارة البلبلة.
وقال عمر كمال، في مقطع فيديو نشره على «فيس بوك»، صباح الثلاثاء: "أنا في شهر يناير اللي فات كان عندي فرح في السعودية، وجبت الراجل صاحب الفرح وشكرته على كرم ضيافتي، وإنت خدت الفيديو من على صفحتي وانت عارف تاريخه، وقلت إن عمر كمال ده منعوه من مصر وبيغني في السعودية، وفين القيم والأخلاق بتاع السعودية، وبتعمل حوار".
وأضاف عمر كمال: «هل ربنا يرضى إنك انت تاخد فيديو، والإعداد عندك واخده من صفحتي، وعارف تاريخه، ويقول إنه فيديو جديد بعد أزمتي مع النقابة؟ أكيد ده كدب وتدليس، وربنا ميرضاش بالظلم، هل حضرتك تضمن إن الفيديو ده ميعملش مشاكل للراجل صاحب الفيديو في بلده وممكن يقطع عيشه وممكن يرفده من شغله؟ ده برضو ربنا ميرضاش بالظلم".
وتابع: "بعد إذنك يا معتز يا مطر خليك في خالك، وسيبنا في حالنا، أنا لو عندي قضية عايز أدافع عنها هطلع أعمل فيديو وأقول يا جماعة أنا مظلوم في واحد اتنين تلاتة، وأقول بلدي مصر جاية عليا في كده، خليك في قضيتك واتكلم عن نفسك، مش عشان تاخد بنط على مصر تستخدم شاب زيي لسه بيبدأ حياته، وتاخد فيديو تحوّره، ربنا ميرضاش بالظلم، وميرضاش إنك تستخدمني في قضية أنا مش طرف فيها».
وقال عمر كمال: "اللي انت بتعمله ده مش كويس وحرام وظلم، انت بتوقّع ولاد الناس في مشاكل عشان حضرتك تعمل حلقة وتاخد شو وتبان إنك صاحب حق. بعد إذنك متتكلمش عليا، أنا لو عايز هتكلم براحتي في بلدي، أنا لا بغلط فيك، ولا طالع أطبل ولا أي حاجة من الكلام ده، أنا بس بقول لك خليك في حالك وأنا في حالي، وبعد إذنك متوقعناش في مشاكل".
أغنية عود البطل لـ عمر كمال و حسن شاكوش
تداول عدد من رواد مواقع التواصل الاجتماعي، أغنية عود البطل، للمطرب الشعبي حسن شاكوش، والفنان عمر كمال، بعد تسريبها قبل طرحها بساعات قليلة.
ولقيت الأغنية مشاهدات عالية حيث جرى تداولها بشكل واسع عبر "يوتيوب، وفيسبوك وتويتر" قبل طرحها رسميا من قبل حسن شاكوش وعمر كمال، في السادسة من مساء اليوم.
تأتي كلمات الأغنية كالتالي :
شفتك قمر طالع..وأحمر خدود فاقع
عود البنات عالى..شقلب لى انا حالى
يرخص ليك الغالى..يالى سحرتنى
عود البطل ملفوف..وانا لسه ياما هشوف
جايلك وانا مش مكسوف..ما انتى عجتبنى
واخدانى على الهادى..وجمالها مش عادى
لما بتيجى قصادى بموت 200 مرة
محبش غير هيا..وعايزها تعيش ليا
يا شاغلة افكارى..حسى بأجدارى
يا أحلى بنات جارى..يا فراوة الحتة
عاوزك يا بنبونتى..يا صاحبتى وبنتى
علشان اشوفك انتى..بعمل مليون خطة
الضحكة دى حكاية..سكر في كوباية
وسبق أن تعاون حسن شاكوش مع عمرو كمال في اغنية بنت الجيران والتي حققت نجاحا كبيرا بعد تداولها على مستوي العالم لتحتل الأولى عالميا على الساوند كلاود في أيام قليله.
يذكر أن الفنان هاني شاكر أصدر قرار بمنع مطربي المهرجانات من الغناء مرة اخري بعد غناء اغنية بنت الجيران في حفلة عيد الحب بإستاد القاهرة واحتوائها على عدد من الكلمات المبتذلة.
