حبسني وعذبني 4 أيام للتنازل عن حقوقي وطلاقي.. هبة: جوزي عايزني خدامة لأهله والمأذون نفذ غصب عني.. صور

«انتى جاية خدامه وحماتى هى سبب مشاكلى مع جوزى وابنه» .. بتلك الكلمات بدأت هبة محمد السيد الزوجة الثلاثينية حكايته مع زوجها الذى أجبرها على توقيع أوراق طلاقها كرها عنها وتنازلها عن كافة حقوقها الزوجية بالكامل.

فتقول هبة:" أنا من مدينة بلبيس بمحافظة الشرقية، واتجوزت جوزى وليد م ، منذ 5 سنوات، وهو كان مطلق وأنا كمان وعنده ولد الأن فى المرحلة الأعدادية من الدراسة، واتجوزنا هن طريق أنه ليه قرايب فى الشرقية وتم الزواج منذ ذلك التاريخ".

وأضافت الزوجة:" كل مشاكلى فى منزل الزوجية بسبب حماتى وابن زوجي، وعندما أقوم بالشكوى منهم لزوجى يقول لى انتى جاية هنا خدامة ويعتدي عليا بالضرب والسب باستمرار دون وجود احد يرجعه عن اللى بيعمله ده".

وأكدت: " انجبت من جوزى طفلين  نواءم مروان ونورهان وعمرهم الأن 3 سنوات، وكانت بتحصل مشاكل كتير بينا ويقوم بضربي باستمرار وعند الرجوع لمنزل أهلى فى الشرقية يتدخل والدي وأخوتى لإعادتى لمنزل الزوجية من جديد للحفاظ على الأسرة ومستقبل الطفلين، إلا أنه تمادي فى ذلك ولا يوجد أحد يردعه عما يفعله فيا من ضرب وإهانة من أجل عيون أهله".

وتستكمل الزوجة المكلومة:" منذ اسبوع قام زوجي بحبسي داخل المنزل لمدة 4 ايام دون الخروج من الغرفة وكتفنى بالحبال، وحرم عليا انا انزل وكان عامل ورديات عليا هو واخوه ومراته، وعيالي اخدوهم فى شقة اخوه فوق وحرمونى منهم، وطلبت منه دخول الحمام حرام عليك انت حابسني فقالى اعمليها على نفسك، وقولتله ابوس على ايدك سبني ادخل الحمام  انا مراتك، قالى هسيبك وهقفلك على الباب واثناء وجودى فى الحمام يقوم بضربي باستمرار".

وأضافت:" وعند الخروج من الحمام يقوم بضربي على موخرة عنقي ورأسي يكف يدهن فى ذلك الوقت اشعر بحالة من الدوار واسقط مغمي عليا واقوله بتعمل فيا ليه كده يقولى يا رب تموتى علشان مرضتيش تديني دهبك، وقولتله ده حق اولادين وده حقى اللى خدته من جوزى الأولاني وانت مرتبك كويس ومش محتاج فلوس".

وقالت:" خد دهبي بالعافية بعد ما جاب خرطوم المياه ونزل على جسمي ضرب، فى وركي وجسمي كله ودماغي وارمه من الضرب مش وشي اللى متورم بس وجسمي كلع معلم من الضرب، ومسك دمغي من شعري وفضل يضرب فى شباك السرير فيها لحد ما اتفتحت، وقولتله انت كده هتموتنى قالى انا بعرف اضرب ازاى ومش هسيبك تطلعي من هنا غير لما اموتك".

واكدت الزوجة:" بعد ما خد دهبي وحسيت انه هيموتني بجد، حوالت اتصل بأهلى من وراه علشان ينقذونى منه، قالى لو اهلك حضروا لهنا مش هخليهم يطلعوا من هنا عايشين، وهموتهم وانا ليا فى كل بلد ضهرن وقولتله حرام عليك اللى بتعمله ده سيبني امشي قالى بعينك".

واضافت:" وبعد مرور الـ 4 أيام اللى بيعذب فيا فيهم جائني الساعة 4 ونص العصر وفضل يضرب فيا ويعتجي عليا لحد الساعة 8 بدون انقطاع، واصوت ومفيش حد من الجيران حاول ينقذنى من تحت ايده، ومفيش غير اخوه ومراته واقفين فوق دماغي بيشجعوه".

واوضحت:" بعد كده شوفته جاب السكينة وداخل الاوضة عليا وقالى انا هعرف اعلمك الادب ازاى، وجريت على البلكونة ومسكت فى السور علشان ارمي نفسي منها واموت ، علشان كان هيموتنى بالسكينة، كنت اتمنى الموت بدل الضرب، ودخل اخوه البلكونة وشدنى من شعري وقالى خشي يا مفضوحة وسبني بأبي، وقولتله انت بتدخلنى ليه تانى عنده ده هيموتنى".

وأضافت:" بعدها دخل جوزى الحمام وحاولت الهرب من الشقة باخذ المفتاح وهربت من الدور الرابع على السلم للشارع وارتدي ملابس فاضحة لجسدى  وحافية لمحاولة الهرب من حفلات التعذيب اللى بيعملها جوزى، قولت اركب تاكسي واروح لأهلى او حد من الجيران ينقذنى وياخدنى عنده، ولاقتيه بيجرى ورايا ومسكنى من شعري ووقعنى فى الأرض ونزل فيا ضربن وان اصرغ واستنجد بالناس وكل ما حد يحاول ينقذنى يقوم بالتعدى عليه، وقولتلهم ابوس ايديكم انقذونى منه وخدونى بعيد عنه هيموتني، وشالنى هو اهله ولحد ما وصلت الشقة والضرب شغال على جسمي من كل حته فيه".

وأكدت:" عقب وصولى الشقة قولتله سيبني اعيش واربي عيالي، ودى تاني جوازه ليا ولو اطلقت المجتمع هيقول عليا ايه السبب مني انا، او انا وحشه وفشلت فى جوازتى التانية، فقالى انا هجيب مأذون واطلقك وتمضي على ورقة تبريني فيها وتتنازلى عن حقوقك كلها فقولتله لا مش همضى على حاجة".

وتضيف:" تحول جوزى فى نفس اللحظة واخوه لغضب شديد وقاموا بتكتيفي وواستمروا فى الضرب فيا وحماتى واقفة بقولها الحقيني فقالتلهم اضربوها يلا اديها على دماغها، وفى الاخر جاب السكينة وحطها على رقبتي وقالى وحياة امك المأذون جاى واللى مماضتي الورقة وبالتنازل والطلاق انك ملكيش اى حاجة، المأذون هيطلع من هنا وانتى مش هتتطلعي من هنا غير ميتة".

وأكدت:" انا اشتريت روحي وجه المأذون وقالى عايزه تتطلقى قولتله لا، وجوزى قاله انا عايز اطلق، فقالى جوزك عايز يطلقك، فقولتله اطلق ازاى وانا بالمنظر ده وجسمي كله بايظ من الضرب".

ةبدموع منهمرة قالت:" بنتى نورهان عندها 4 سنين نزلت من فوق والمأذون قاعد قالتلي يا ماما انتى هتتطلقي قولتلها اه يا نونا باباكي عايز يطلقنى، ووقعدت تمسك فى ايدي وتبوسها وتبوس خدودى وتقولي متسبنيش يا ماما وتحني وتقولى يا ماما لا يا بابا مطلقهاش، قولتلها انا مش عايزه اتطلق يا نونا باباكي هو اللى عايز يحرمني منكم، والبنت تعيط قدام المأذون وقولتله ده يرضى ربنا قالى جوزك هو اللى عايز كده وقولتله يرضي ربنا اللى عمله فيا قالى انتى مراته وهو حر فيكي، وهو فيه مأذون يقول كده المفروض هو اول واحد يقف جنبي وياخدنى لمركز الشرطة لانقاذى وانه عايز يطلقنى بالاجبار".

واكدت:" المأذون كتب ورق الطلاق وكتب فيه انى ابريت زوجى من كافة حقوقى، ومشى فى الاجراءات لحد ما خلصن واللى قدر يقوله لجوزى انه يخليني عنده لحد الصبح وامشي اروح لأهلى، فقولتله ليه كده قالى علشان مفيش سواق او حد يطمع فيا فى الليل اثناء ذهابي لأهلىن هو ده اللى قدر يقوله المأذون اللى حالف على كتاب ربنان وانا اللى استمر تعذيبي لاكثر من 4 ايام متواصلة بخرطوم الحمفية اللى كنت باخده الضربه من اقعد اتنطط زى القرد غير الاهانة والشتيمة، وفى الاخر بعد ما خد دهبي وحاجتي وطلقنى هدئت اعصابه وقالي لو عايزه تمشي يلا امشي، وقوليلي ده يرضي ربنا وانا راضي بعدله وراضية بنصيبين وحسبي الله ونعم والوكيل فى كل حد كان في بيتى ظلمنى وكلهم كانوا عليا وده حرام".

واضافت:" بعد ما الصبح طلع اتصلت على اخويا فى الشرقية من تليفون واحده ست وقولتله اللى حصل وركب علطول ووصل عندى لاقاني فى حالة يرثي لها، واصطحبني لقسم شرطة الوايلي وحررت محضر رسمي ضد زوجى على ما حدث وعمل كشف طبي بحالتى الصحية التى كشفت وجود كدمات فى مختلف الجسم وتورمات وأثار تعذيب".

وطالبت الزوجة بالتحقيق فى الواقعة من قبل جهات التحقيق لكي تحصل على حقوقها من زوجها كاملة بعد ان قامت بتحرير محضر رسمي بقسم شرطة الوايلي حمل رقم 10017 لسنة 2020 جنح الوايلي، بتاريخ 27 سبتمبر 2020، وكذلك بعد ان قام الزوج بأخذ اطفالها الأثنين منه وحرمانها منهما حتى الأن.