أنا مستنيه دور حلو.. لميس الحديدي تكشف تفاصيل مكالمة عبلة كامل ورسالتها للجمهور

كشفت الاعلامية لميس الحديدي، عن تلقيها اتصالا هاتفيا، وصفته بأنه أجمل الاتصالات التي تلقتها مؤخرا، وهو اتصال من الفنانة القديرة عبلة كامل.

وقالت لميس الحديدي: "عندي حكايه ورساله في يوم الأربعاء اللي فات جالي تلفون، يمكن من اجمل التلفونات اللي جاتلي  مؤخرا.. الو لميس انا عبلة.. انا عبله كامل"، متابعة: "قمت نطيت، عرفت صوتها في ثانيه ودي أول مره تكلمني فيها. انا ليا أصدقاء كتير من الوسط لكن دي أول مرة عبلة تكلمني فيها". 

وتابعت الحديدي عبر برنامج" كلمة أخيرة " المذاع على قناة "أون أي"، " يوم الثلاثاء  كنت  باتكلم عن عبلة ، وبعتلها رسالة من هنا  قلتلها أنا بحبك، وقلت أن من القسوه جدا نشر خبر عن مرضها وأنها حتي لو كانت مريضه فهي اختارت الصمت ولازم نحترم صمتها، بعدين  تم تكذيب الخبر لاحقا من أسرتها زوجها السابق وبنتها زينب، وواضح إن رسالتي وصلتها". 

وحول محتوى المكالمة قالت: "طيب قالتلي ايه؟ .. فيه حاجات هاقدر أحكيها وحاجات مش هاقدر أحكيها، بناء عن طلبها.. لكن اللي اقدر أقوله من مكالمه تقريبا ٤٥ دقيقة، أنها قالتلي بالنص: أنا سليمه وصحتي كويسة الحمد لله، مش تعبانة خالص وأنا باقول بالنص لأَني بصراحة كنت حريصة علي كلامها بدقة، وهي صوتها فعلا كان كويس". 

وأكملت: الفنانة عبلة كامل كانت سعيدة بمشاعر الحب التي تلقتها من الجمهور  قائلة: "قالت لي أنا  فرحانه جدا بحب الناس اللي شفته  لدرجة أنها  ساعات ماببقاش مصدقه أن الناس بتحبني كده، عمري ما كنت أتصور أني محبوبه كده من الجمهور” ، قلتلها ازاي يعني، انت أكيد عارفه وشوفتي حتي لما اتعاد في جلباب ابي الناس كأنها بتشوفه لأول مره. قالتلي بجد انا عمري ماتخيلت حب الناس كده، انا إنسانه عاديه ، يمكن الناس بتحب أدواري بس عمري ماتخيلت كل الحب ده". 

وقالت الحديدي إنها طلبت من الفنانة القديرة الخروج للجمهور وطمأنتهم عليها قائلة: "طب يا عبله اطلعي طمني الناس اطلعي اتكلمي، ليه قافله علي نفسك ؟ لترد عليها كامل قائلة " انا بأحب امثل بس، وقالت اهم جمله : ماباعرفش اعمل عبله، بعرف امثل بس. فضلت شويه أحاول افهم الجمله “ماباعرفش اعمل عبله” ، بس الجمله واضحه هي ممثله علي الشاشه ، لكن في الحقيقه هي إنسانه وام عاديه جدا ، مش عاوزه تبذل مجهود تاني علشان تظهر او تتكلم او تتصور  وده مجهود ، الأضواء مجهود( ده تفسيري انا مش كلامها) مابتعرفش تعمل عبله". 

وسألتها الحديدي  في معرض المكالمة  التي أجرتها الفنانة القديرة بها عن إعتزالها  ومدى صحته فردت كامل قائلة: "لا طبعا ، انا بأحب التمثيل جدا، ولو جالي دور حلو أكيد ح اشتغله، بالعكس انا شوفت مسلسلات رمضان اللي فات ولقيت فيها حاجات كتير جميله جدا ومتنوعه ، لكن مافيهاش دور يناسبني ، واختارت كلمه “يستفزني”. يعني يستفز رغبتها في التمثيل. وقالت بالنص أنا مستنيه دور حلو".

 ووجهت الحديدي رسالة للمنتجين والكتاب  قائلة "دي رساله لكل المنتجين والكتاب: عبله كامل منتظره دور حلو". 

وحول مشاعرها  من كاتب الخبر حول إصابتها بالسرطان كشفت الحديدي أن الفنانة القديرة عبلة  كامل لم تكن غاضبة وأنها ردت قائلة "لا انا مش زعلانه انا مسامحه كل الناس وباقول للي كتب الخبر شكرا انك وريتني حب الناس". 

لكن الحديدي  عادت وأكدت أن رسالة عبلة كامل للجمهور هي " انا متشكره لكل واحد بعتلي رساله حب، لكل واحد دعي لي ، لكل حد نفسه يشوفني، و متشكره للي كتب الخبر لانه وراني حب الناس اللي يمكن ماكنتش ح اشوفه". 

وأكدت أن عبلة كامل ليست شخصية متعالية قائلة: "مش متعاليه، مش مغرورة بالعكس، دي متواضعة بزيادة ، يمكن حد في مكانها يملاه الغرور وألانا، بس هي لا. هي اختارت الصمت.. نحترمه. و ده مش معناه ان اللي بيظهروا غلط، بس كل إنسان و قدرته ، خلينا نحاول نرحم بعض و نحترم بعض، و مره تانيه حتي لو هي او أي حد تاني كان مريض و بيخلي مرضه، ده من حقه، خلونا رحماء ببعض و بلاش قسوه". 

واختتمت حديثها قائلة "مدام عبلة انا وصلت الرساله، وارجع أقولك انا بحبك وكل الجمهور بيحبك وبيحترمك".