أحمد فريد يكتب: كانوا بيكذبوا علينا ولا فعلا مشيوا على القمر (3)

زى ما ذكرت قبل كدة أن مقال هبوط الإنسان على سطح القمر كان موضوع كبير جدا علشان يكون كله في مقال واحد، ولذلك يتجزأ المقال على ثلاث أجزاء، الجزء الأول و الجزء الثاني من المقال موجودين على الصفحة الرسمية بتاعتي على الفيسبوك باسم "أحمد فريد فضاء"، إذا كانت لديكم أسئلة أو انتقادات، على صفحتي على الفيسبوك اسألوا بدون تردد.

 

أنا أحمد فريد من عمليات الفضاء بوكالة الفضاء الألمانية

 

قصة هبوط الإنسان على سطح القمر ليها مجادلات عديدة و تساؤلات كتير، هل فعلا حصل و هبط رائد الفضاء نيل أرمسترونج على سطح القمر ؟ ولا كان فيلم في أيام الحرب الباردة، مع العلم إن الاتحاد السوفييتي أثبت قدرته على إرسال أول ساتاليت للفضاء قبل الأمريكان، و بعدها أرسل الاتحاد السوفييتي أول إنسان إلى الفضاء في مكوك فضائي دون الهبوط على أي كوكب، ولكن  استخدموا التكنولوجيا لإرساله ليحوم حوالين الأرض في الفضاء، و بكده كانوا الأمريكان بيفكروا في حاجه أعلى من كدة، و هي لما كيندي (رئيس أمريكا ) ساعتها أخذ قرار الهبوط على القمر، و كانت دي الطريقة الوحيدة اللي كان ممكن يثبت بيها إن أمريكا كمان قوة عظمى، مش الاتحاد السوفيتي بس، وقف العالم كله ساعتها بيتفرج على حرب مين أقوى بالتكنولوجيا، الفرق هنا، إن هبوط أرمسترونج على سطح القمر كان صحيح هبوط أمريكا على القمر، لكن ساعد في البرنامج ده (برنامج أبوللو ) جنسيات تانية كتير جدا، زي أستراليا مثلا و كندا، و كمان كان عالمنا المصري الدكتور فاروق الباز في البرنامج ده، زى ما ذكرت في الجزء الثاني من المقال، وكان من ضمن فريق تحديد مكان هبوط للمركبة على سطح القمر.

 

 

نص سكان العالم اتولدوا بعد ما رحلات القمر وقفت، بالمعنى الحقيقي للمصطلح، إنه تاريخ بالنسبة ليهم (أو لينا )، كانت في استطلاعات للرأي حصلت في منتصف هذا العقد حوالي 2004 أو 2005، وسألوا السؤال، هل تعتقد أننا هبطنا على القمر؟ ولا أنت بتتساءل وبتشكك إذا كنا قد هبطنا على القمر ولا لأ؟، والغالبية العظمى من الناس حوالي 6٪ قالوا " أنني شككت في الموضوع "، ولكن عند التقسيم حسب الفئة العمرية، إلى 18 إلى 24 سنة 27٪ شككوا في الأمر، و دي إحصائية بتطرح السؤال في ذهني، معناها إيه الإجابة دي وإزاي نتعامل معاها؟ أعتقد أن الأمر يتعلق بحقيقة أنهم ماشافهوش الهبوط على الإطلاق، و إنه تاريخ بالنسبة ليهم، أعتقد أن الأمر يتعلق بزوال الثقة في الحكومات والمؤسسات الفضائية بشكل عام، و يدل عدم الثقة في العقد الاجتماعي الساري لفترة طويلة، ما يقرب من قرن، مع النوع دا من عدم الثقة أحب أن أقترح عليكم أنه من الأسهل عليهم التشكيك في الأمور اللي زي دي، الحقيقة أنني أعتقد، أنه أحسن حاجة في العالم أن نرجع تاني إلى القمر، فقط لإثبات إننا ذهبنا أصلا في المرة الأولى.

 

للعلم، في عالم الفضاء الحالي، تحالفوا الروس والأمريكان في أكثر من مشروع فضائي كبير، وبالتحالف ده، قدروا ينفذوا أكبر مشاريع فضاء في تاريخ البشرية، أكبر مشاريع فالمطلق في تاريخ البشرية.

 

بس علشان أجاوب على الأسئلة الأولية، كان في سؤال اشتهر أوي في مصر و العالم العربي، سؤال كان في مشهد أحد أفلامي المفضلة للفنان الجميل أحمد حلمي، فيلم "عسل أسود" لما كان الطفل الصغير بيسأل البطل عن الهبوط على القمر !!! وجت الموسيقى الرومانسية من غير أي إجابات من البطل على الطفل، و ده كان سؤال من غير إجابه، بخلاف كدا، الفيلم جميل جدا بجد و أنا واحد من بلايين المعجبين بالفنان أحمد حلمي.

 

هجاوب بسرعة من غير تفصيل كبير على بعض الأسئلة التي أثارها الأطفال والبالغون للتشكيك في الهبوط الإنسان على سطح القمر.

 

- ليه السماء سودا جدا في الصور اللي على سطح القمر؟ فين النجوم؟

لأن لما بتكون في مكان مضيء جدا، يصعب رؤية النجوم زي مثلا لما تكون في إستاد أو ملعب كبير مضاء إضاءة قوية جدا، أو مثلا لما تروح البحر الأحمر، بتشوف نجوم أكثر من القاهرة، علشان التلوث الضوضائي، وسطح القمر يعكس أشعة الشمس بشكل قوي جدا، لقوة الإضاءة على سطح القمر، اللي بينور الكرة الأرضية بالليل، لازم تختفي القدرة على رؤية النجوم من على سطحه.

 

- ليه العلم بيرفرف ومفيش هواء ولا جاذبية على سطح القمر؟ سؤال الفيلم مع الموسيقى الرومانسية..

شكل العلم مش مستقيم وكان في عصاية ماسكة العلم نفسه بحيث يكون شكله بيرفرف، وهززت رائد الفضاء للعلم في حين تثبيته، أدى للشكل ده في الآخر.

 

- ظل في اتجاهات مختلفة؟

طبيعي جدا وممكن تشوفها في الشارع، إن الظل مش متساوي وبتحصل طول الوقت.

 

- عمل 40000 شخص مهندس على برنامج أبولو، من الصعب جدا إنك تحافظ على سر أو كدبه بين رقم زي ده من الناس، بصراحة ومن الأسهل إنهم يروحوا القمر فعلا بدل مايكتموا السر بين 400 ألف شخص.

 

وبكدة أهنيكوا على صبركم معايا لآخر الجزء الثالث من موضوع هبوط الإنسان على القمر، حقيقة ولا مش حقيقة، عالعموم، في خلال السنين اللي جايه هنشوف رجوع الإنسان إلى القمر تاني علشان البشرية العلمية في الوقت الحالي بتخطط لتنفيذ مشروع أكبر من بس هبوط الإنسان على القمر، وهو بناء محطات فيها بشر على سطح القمر لتكون محطة ترانزيت بين الأرض و المريخ، لأن المريخ هو المستعمرة القادمة.

 

طريقة عامة لكيفية إدارة حوار مع بعض باحترام، سواء كانت وجهة النظر مختلفة أو متفقه في مواضيع زي هبوط الإنسان على سطح القمر أو حتى لو أي رأي تاني لازم تتعلم العشرة خطوات دي، بصراحة إذ عملت واحده بس منهم، هتكون بالفعل عندك مناقشات أفضل.

بس ده هيكون الخميس اللي جاي.