EN 
كشف المحاسب مجدي الزواوي، عضو مجلس إدارة نادي كفر الشيخ الرياضي، والمشرف العام على فريق كرة القدم، أن إجمالي ما أنفقه الفريق الأول هذا العام في دوري القسم الثاني «الممتاز ب»، أقل من إجمالي ما أنفقه الموسم الماضي عندما كان مشاركًا في دوري القسم الثالث، موجهًا الشكر للجهاز الفني والإداري بقيادة مصطفى عبده، وجميع اللاعبين والجمهور وكل من ساند الفريق حتى ضمن البقاء رسميًا في الدوري الممتاز (ب).
وأوضح«الزواوي» خلال حواره لـ«صدى البلد»، العديد من النقاط المهمة التي تهم جماهير النادي وأعضاء الجمعية العمومية، قائلاً : « طبعًا زي ما الناس كلها عارفة كان السنة اللي فاتت كان في أحداث كورونا .. وكان في كلام الدوري هيرجع لا مش هيرجع .. وبعد كده رجع الدوري .. وكان كفر الشيخ الحمد لله أول المجموعة وكان في دوري الترقي وصعد أول المجموعة مباشر .. وكان كفر الشيخ أول مجموعته في القسم الثالث .. فصعد مباشرة .. الكلام دا كله مكنش مخلى حد مستعد».
وأضاف، عضو مجلس إدارة نادي كفر الشيخ، والمشرف العام على فريق الكرة، قائلاً« الدوري – القسم الثالث - انتهي 17 / 10 وجالنا فاكس 24 /11 والقيد هيبدأ 5 /11 .. مكنش في هبوط السنة اللي فاتت .. كل الفرق اللي عندها لاعيبة كويسة متمسكة بيها.. واللعيبة الكويسة اللي عقودها انتهت مع أنديتها سعرها في السوق كان عالي.. فدا كان مشكة كبيرة قدام اختيارات كفر الشيخ السنة اللي فاتت».
وتابع «ورغم دا كله الحمد لله الكابتن عبد الفتاح عبد الرازق قدر يعمل فرق كويسة ومحترمة جدًا بقول عليها فرقة موهوبين صغار سن.. ومن هنا بوجه له الشكر لأنه اشتغل لغاية ما ممشي عمل نتائج مبهرة وعلى الورق نجح والحمد لله جاب 18 نقطة في الدور الأول هما اللي ساعدونا الدورالثاني»، مضيفًا «وهنا بشكر مجلس الإدارة بالكامل لأنهم وفروا سبل النجاح لفريق الكرة من أول السنة على قدر الإمكانيات .. كل مشرف لعبة قدر يمشي أموره بأقل الإمكانيات عشان خاطر فريق الكرة».
واستكمل«الحمد لله ماشيين على سياسة من السنة اللي فاتت ولاد النادي»، مضيفًا «بالنسبة للإمكانيات المادية ودي حاجة أول مرة الناس تسمعها .. إحنا السنة دي صرفنا أقل من الدرجة الثالثة السنة اللي فاتت .. والحمد لله المنظومة كانت كلها رجالة .. من أول المدير الفني واللاعبين حتى الجمهور اللي كان بيساند الفرقة بره وجوه، له جزيل الشكر ونرفع له القبعة .. طبعًا دا مش مكان كفر الشيخ ولا فرحانين ببقاء كفر الشيخ بفارق نقطة .. لكن دا واقع .. إحنا عشناه السنة دي .. وكنا لازم نكمل ونقف مع الفرقة لغاية لآخر ماتش».
ووجه عضومجلس إدارة نادي كفر الشيخ الرياضي، والمشرف العام على فريق الكرة، رسالة مهمة للناشئين، قائلاً «إن شاء الله هتكونوا معانا في المعسكر في بداية الموسم .. واللي هيثبت وجوده هيكون معانا بإذن الله .. لأن مؤمن بحاجة أن كفر الشيخ مش هتوصل لحاجة كويسة إلا بأولادها .. كل الدعم لأولاد النادي .. وربنا كريم إن شاء الله إننا نقدر عمل فريق قوي يليق باسم كفر الشيخ .. وإن في خطة قصيرة الأجل إن شاء الله خلال موسمين يكون كفر الشيخ في الممتاز بولاد كفر الشيخ»".
