EN 
أشار الإعلامي محمد الباز، إلى التعليم الأزهري في مصر، من خلال منشور "عمدة صبحي" الذي نشره على "فيسبوك بالصور"، وقال فيه "اللي في الصور نموذجين لإستقبال التلاميذ في أول يوم دراسة 2021، النموذجين موجودين في مصر، أحدهم يخضع لمؤسسة تهتم جداً بستر عورة الأطفال "الصور من موقعها الرسمي"، وتكلف موازنة الدولة 20 مليار سنوياً، ثم تتكلف الدولة أضعاف هذه القيمة لعلاج آثار ما درسوه .. والنموذج الآخر يهتم بخلق البهجة في نفوسهم وتحفيز طاقات الإبداع وهؤلاء في رأيي هم الأمل الوحيد لقيادة الجمهورية الجديدة ولكم الاختيار".
وعلق محمد الباز خلال برنامجه "آخر النهار" المُذاع على فضائية "النهار"، قائلاً: "لو بصيت على وشوش البنات الصغيرة في الصور، هتلاقي في المدرسة الأزهر الأطفال لابسين الحجاب وواقفين مش باين عليهم البهجة.. والأطفال في المدارس الحكومية بيهيصوا وابتسامتهم مبهجة على وشوشهم".
وتابع الإعلامي قائلاً: "هتقولولي يعني انت مبسوط بإن البنات ترقص، هقولكوا الحياة مش تطرف .. يعني مش يإما أقصى اليمين أو يإما أقصى الشمال .. ده خطأ".
واستشهد محمد الباز بـ الرسول صلى الله عليه وسلم، حينما رأى السيدة أسماء بنت أبي بكر، وقال لها "يأ أسماء إذا بلغت الفتاة الحُلم ، لا ينبغي أن يظهر منها إلا هذا وذلك .. وأشار إلى وجهه وكفيه" .. معقباً: "الأطفال والبنات الصغيرة ديه حُلم إيه اللي بلغوه! .. دول 6 و8 سنين يعني لسة مفيش حاجة".
ووجه الإعلامي رسالة للمسئولين عن التعليم الأزهري في مصر، قائلاً: "ليه بتربي البنات الصغيرة على أن تكون ديه طفولتهم .. انت كده بتتكلم على حالة من اغتصاب الطفولة بشكل أساسي.. انا مش عارف المجلس القومي للأمومة والطفولة فين .. والمجلس القومي لحقوق الإنسان فين".
وواصل محمد الباز حديثه للمسئولين عن التعليم الأزهري في مصر، قائلاً: "لهم كل الإجلال والاحترام .. راجعوا نفسكوا وسيبوا العيال تتنفس .. وبعدين ابقى مشي قراراتك ديه عليهم بعدين لما يكبروا .. أنا مش بتكلم في تطرف .. كده كده الأزهر ليست دولة مستقلة عشان يبقى ليها قوانينها .. اللي بيحصل ده أمر ضد الإنسانية".
