كرباج اللازم وحبل المفروض‎

ياتري الأب كام مرة حس انه بيجلد أولاده بكرباج اللازم ؟؟؟؟؟؟؟ ياتري الأم كام مرة حست أنها بتشنق أولادها بحبل المفروض ؟؟؟؟؟؟؟.

يمكن تستغربوا من أسئلتي ليكم لكن للأسف دى الحقيقة والواقع اللي بيحصل من أهالي كتير تجاه أبنائهم والمصيبة الأكبر أن الأهالي نفسهم مبيكونوش عارفين ده لكن وللأمانة ده بيكون وبغرض الحب الشديد والخوف علي أبنائهم ونتيجة أن باستمرار كل أب وكل أم عايزين يشوفوا أولادهم احسن منهم بكتير.

اللى بقولوا ليكم ده حقيقي وبيحصل باستمرار في كل المجتمعات لكن المشكلة الحقيقية أننا مبنفكرش ابدا كأهالي ياتري الأسلوب ده هيعمل ايه في شخصية أولادنا ؟؟؟؟؟؟ ياتري هيكون مستقبلهم في الحياة عامل ازاي؟؟؟؟؟؟؟؟؟ تعالوا بقي معايا أقولكم ده بيحصل إزاي؟؟؟؟؟؟؟؟ من منطلق طبعا (ومن الحب ما قتل).

والخوف المستمر من الآباء علي أبنائهم بنسمع منهم الآتي :

انت متستاهلش. .. انت أقل من غيرك.... فلان أحسن منك.... أنت فاشل وهتفضل طول عمرك فاشل كده.....فلان نجح وانت مافلحتش.

وغيره وغيره من كلمات ورسايل سلبية كتير اللي ياما كلنا سمعناها وعيشنا فيها اكتر، اللي بيحصل بقي أن الرسايل ده بتفضل تتخزن في ذاكرة ولادك وتكبر معاه وتدوب في شخصيتهم كمان ومش كدة وبس ده ابنك أو بنتك نفسهم مبيعرفوش عنها حاجه ويبتدوا ولادكم.

يدخلوا في مراحل كتير في حياتهم وهما ماشين في المراحل وفي طريقهم ماشي كمان معاهم الشك في نفسهم وقدراتهم وحتي تفكيرهم.
 
بيتولد شخص مهزوز ومعندوش ثقه في نفسه.... غير قادر علي التفكير السليم.... غير قادر علي مواجهة نفسه ولا حتي اللي حواليه. .... غير قادر علي اتخاذ القرار السليم.

للأسف من كتر حبنا وخوفنا علي أولادنا حولناهم لكائنات مضطربة نفسيا واحنا مش واخدين بالنا ، ودخلناهم في متاهات المقارنة مع الغير والتقليل من نفسهم حتي مع نفسهم ، ابنك أو بنتك من صغره بيستقبل كمية رسايل سلبية كتيرة في نفس الوقت انت بتطلب منه يكون انسان كويس ومسئول ازاي ممكن يحصل ده وانت حطيت أولادك في مجموعة كبيرة مابين اللوازم والمفروضات.

اللي كل واحد منا عامل زي السيف الحاد اللي متسلط علي صاحبه من غير راحة ولا رحمة واللي في الأساس كان سببهم تربية قاسية وتنشئة صعبة عايزه أقولكم في النهاية وبكل معاني الرحمة والرجاء :

** احتووا أولادكم واسمعوهم وخلوا دايما في مابينكم حوار.

** ارضوا من قدرات أولادكم حتي لو كانت قليلة.

** عززوا الثقة بالنفس عند أولادكم وانكم باستمرار مؤمنين بيهم وانكم مبسوطين انهم في حياتك
بلاش تجلدوهم بكرباج اللازم............ وبلاش تشنقوهم بحبل المفروض

سامحوهم واعذروهم وتقبلوا أخطائهم وحتي فشلهم ساعدوهم وعلموهم إزاي يحاولوا لغاية مايوصلوا لأهدافهم وأحلامهم.

**** وقبل كل ده بقي انتم كمان لكل أب ولكل أم سامحوا نفسكم وتقبلوا اخطاءكم في الحياة وحاولوا باستمرار تعدلوها حتي لو كانت الاخطاء دى في حق أولادكم.

ولأننا وببساطة كلنا بني ااااااااااااااادمين