محمد دويدار يكتب: جت فى السوستة

جروب "جت فى السوستة" للى مايعرفوش ده جروب معمول عالفيسبوك للرجال فقط، بينمو ويتزايد وينتشر أسرع من الخلايا السرطانية لحد ما قرب عالمليون فى فترة قصيرة جدا.

فى البداية كانوا بيضيفونى فيه وكنت بخرج منه ويرجع حد يضيفنى وأخرج وهكذا، لحد ما قررت أستمر واشوف بيعملوا إيه دون مشاركة.

أما السبب اللى كان بيخلينى أخرج فهما الحقيقة أكتر من سبب، أولهم العنصرية بتاعت للرجال فقط لكن للحق اكتشفت أنها ممكن تكون ميزة لأن أعضاء الجروب كلهم داخلين بدون نية "الحك"، ودى آفة الفيس بوك، يعنى هتضمن إنك مش هتلاقى حد بيتمنظر بكلام يفقع عشان يلم المزز عليه ودى فى حد ذاتها بتدى مصداقية للجروب.

تانى مشكلة عندى هي اسم الجروب، أيوة بصراحة ماكنتش مستوعب إيه فكرة اسم "جت فى السوستة"، وكان بيضرب معايا شمال علطول وبقلق واحط إيدى على أماكن محرجة كل ما بقرا اسمه، لكن للحق الاسم الغريب ده كان سبب فى الانتشار ويحسب لهم التميز بغض النظر عن أفكارى السافلة.

تالت سبب هي فكرة إن لو إنت عضو معايا فى الجروب فانا هعملك خصم كبير وهساعدك وهقف جنبك وهخرجك من السجن وهوصلك ببلاش وبلا بلا.. طب ما أنا مصرى زيك ومحتاج مساعدة وبستنجد بيك بس للأسف ماعنديش نت ومش عالجروب؟ لا ماعرفكش أنا بساعد بس اللى معايا فى الجروب!! طبعا الفكره دى فى حد ذاتها كانت مسببالى شوية قلق ونرفزة، لكن مع الوقت اكتشفت إن إحنا عموما اتربينا على كده يعنى الدكتور بيخدم زمايله الدكاترة أكتر شوية، والسواق يقف فى الشارع لو لقى سواق زيه بيتخانق وممكن ما يقفش لو لقى مواطن عربيته بتولع، وهكذا كل واحد فينا له دايرة صغيرة عليها اهتمام خاص أكتر من الدايرة الأعم والأكبر، فعادى يعنى إن جروب ينمى شعور الانتماء والتآخى ما بين أعضاءه بس ويخليهم متماسكين ومتعاونين دى بداية مبشرة مش هتضر حد، ولعل الدولة تقدر تعمل زيهم على نطاق أوسع وتخلى المجتمع كله بالروح دى لأن الحقيقة ده دور الدولة مش دور الجروب!

أخيرا ربنا يسترها عليهم وعلى الأدمنز بتوعهم بالأخص، فعلى الرغم من أنهم أعلنوا أكتر من مرة إنهم مالهمش دعوة من قريب أو بعيد بالسياسة ولا بالدين وفعلا بيبعدوا كل البعد عن أى نقاش ممكن يسبب فتن وجدل، إلا أن فكرة التجمعات الشبابية العملاقة فى حد ذاتها قد تكون مقلقة نوعا ما، وخصوصا إذا كانت سرية ولا يجوز لأى حد غير الأعضاء الاطلاع عليها ومشاهدة محتواها، فربنا يكملها معاكم بالستر وحاولوا تركزوا لأن إنتوا دلوقتى أكيد تحت المجهر وغلطتكوا بألف يا شطار.. استمروا يا سوستجية وبالنجاح والتقدم يارب دايما.