كواعب البراهمي تكتب: وعد

عليك أنا أخاف
وأخاف من يوم
ييجي فيه وتنساني
وتنسى إني كنت في يوم
سبب للضحكة في عيونك
وبكرة لما تروح لبعيد
تنسى إنى صورة
مرسومة على جفونك
وإنت صاحي أكون وياك
وإنت مغمض أنا جواك
رغم البعد فاكرني
وفاكر كل شيء بينا

فاكر الضحكة
والزفة والحنة
فاكر لما قلت لي يوم
هسافر بكرة وارجع لك

وجهزت أنا لك الشنطة
وأديك سافرت
ولما طالت الأيام
بعت لك جواب
بدمع عيوني خطيته
قلت يمكن يأثر فيه
ويرجع لي
ويقول لي عليا ما تهوني

وأنا أستنى طلوع الفجر
من الشباك
عنيا علي الطريق
اللي أنا وانت مشينا فيه
وأقول أكيد فيوم يرجع
وأتاري القلب لما يفارق
بيتعلم القسوة
وحتى العين
تنسى إنها تدمع

وتاخدك مني الأيام
وأنا أستنى
أعد النجم فوق راسي
وأشوف القمر وأقول
أكيد راجع ومش ناسي

كيف ينسى يوم اتقابلنا فيه
وطوقني بدراعه على خصري
وحط إيده على شعري
وقال لي إنتى أحلى واحدة في الدنيا
وقال لي كلام ما انيش فاكراه
لكن فاكرة
إني بكيت من الفرحة
وقلت له يومها
اوعى تاخدك الغربة
وقال لي إزاي
وانتي القلب جوايا
وانتي النبض جوه القلب
وانتي الطعم للعيشة
وانتي لدينتي السكر
وأنا هبعد يدوب يومين
مش أكتر
وأكيد راجع
وأخدك لدنيتي الحلوة
ونرسم حلمنا الأخضر
ومن يومها وأنا أستنى
وأتاري الوعد
أسهل منه مفيش
يموت الوعد
لما القلب يتغير