دماغ الراجل ودماغ الست

ليه فيه كتب عن الراجل و الست ؟ ليه عملوا كتاب كأن كل واحد من كوكب زي أشهر كتب عن العلاقات "الرجال من المريخ والمرأة من زحل" من تأليف الطبيب النفسي الأمريكي جون غراي. الكتاب ده بيرصد المشاكل اللي ممكن تحصل بين الراجل و الست نتيجة الاختلافات بينهم. وترجم إلى عدد كبير من اللغات، وبيعت منه ملايين النسخ.
الكتاب ده بيحكي عن ….
ماتيجوا نشوف ..؟
لو دخلنا دماغ الرجل ودماغ الست هنلاقي ايه ؟

دماغ الراجل فيها BOXES :
• صندوق لكل شيء
• صندوق ل العربية
• صندوق ل الفلوس
• صندوق ل للشغل
• صندوق ل للعيال
• صندوق ل للست (ليكي )
• صندوق ل امك (جمب اوضة الكراكيب )

النصيحة لأي ست : متلمسيش الولا حاجة صندوق

• لما الرجل يناقش حاجة بيطلع الصندوق بتاعه و بيتناقش في اللي جوه الصندوق ده بس (بسسسسس (

نيجي بقي للدماغ المتكلفة و ألبس جوانتي و كمامة و انت جاي تبص عشان مفيش حاجة تضرب في وشك..
دماغ الست :

• دماغ الست كلها اسلاك وكل سلك متصل بكل حاجة و كل حاجة متوصله بكهربا (المشاعر ) و هو ده السبب إن الستات بيفتكروا كل...كككككل حاجة - عشان لو فيه حدث واحد و وصلته بالمشاعر هتفضل في الذاكرة و حتفتكرها للأبد
• الرجالة عكس كده تماما ..ليه ؟ بكل بساطة عشان هما مش بيفرق معاهم – مش بيهمهم التفاصيل اللي بنقعد ننكت نفسنا فيها ..
• الستات بتهتم بـككككككل حاجة
• و بتحب تربط كل حاجة بحاجه و كهربا و مشاعر زززززز

(الرجالة) زي ما قلنا عندهم صندوق : اسمه : NOTHING - اسمه : صندوق الولا حاجة

ده لوحده محتاج شرح .. ورقة و قلم يا ست الكل ..

• صندوق الولا حاجة هو الصندوق المفضل عندهم و اهم صندوق
• عشان كده الصيد هواية مفضلة للرجالة – بيعملوا اللا شيء
• أو ممكن يقعد بالساعات ماسك الريموت بتاع التلفزيون و بيتفرج علي لا شيء
• الستات عندهم مشكلة عشان طول الوقت ززززززز كل حاجة شغالة و عشان كده مش فاهمين يعني ايه صندوووق الولا حااااااجه
• و عشان كده الستات بيتجننوا لما الرجالة بتكون بتعمل الا شيء

بنيجي احنا بقي نعمل ااااااايه ..
تيجي الست للراجل تقوله : ممكن اخش معاك جوه صندوق الولا حاجة ؟
الراجل : لااااااا
الست : ليه لأ ؟ و دايما حنترجم و نفكر : كده يبقي فيه حاجة ؟
من جوه عقل الراجل : لاااااا اطلعي بره محتاج أعمل ولا حاجة
و ده بيوصلنا نفهم الفرق بين احنا الستات و الرجالة لما نكون مضغوطين نفسيا ..

لما الراجل بيكون STRESSED – مضغوط نفسيا

• كل اللي عايز يعمله يخش جوه صندوق اللا شيء
• آخر حاجة عايز يعملها و هو مضغوط (إن يتكلم عن اللي ضاغطه )
• هو مش عايز يتكلم ..هو عايز يبحلق في الحيطة و يشوف الدبانة و هي تحلق من سقف للحيطة! والله زمبقولك ..
• تيجي الست بقي : "بتفكر في ايه ؟ "
• يرد الراجل بعد لحظات ... "ولا حاجة "
• الست : أكيد بتفكر في حاجة !
• الراجل : "ولا حاجه ..ولا حاجة "

لما الست بتكون مضغوطة نفسيا – STRESSED

• بتبقي عايزه تتكلم عن اللي ضاغطها.. لو متكلمتش دماغها حرفيا حتنفجر
• الحل دايما الأمثل لحل كل مشاكل الراجل : تعاااااالي نتكلم - اتكلم معايا

النصيحة الذهبية للست اللولبية لما يكون الراجل مضغوط : سيبيه لوحده - مش حيموت - سيبيه يخش صندوق الولا حاجة حيرجع كمان شوية!





حاجة كمان حتريحك تعرفي الفرق بينا و بينهم في استخدام الكلمات ..
الرجالة و الكلمات :
• الرجالة بتستخدم كلام اقل من الست
• بيقولوا لو الراجل محتاج 10,0000 كلمة في اليوم الست محتاجه 20,000
• و حتلاقي الست تبررلك و أنا من مكاني هنا ببرلك برضه :
"عشان بنحتاج نعيد كل حاجة بنقولهالك ! "

عملوا تجربة كان بيحكيها جون جراي أن حطوا في الحضانة كاميرا و ركزوا علي البنت لقوا إن البنت لو ملقتش حد تتكلم معاه ..حتكلم نفسها ! و أنا شخصيا خلاص خلصت حضانة و لسه بعمل كده !
آه صحيح ولو البنت ملقتش حوار تقوله لنفسها لقوا في الحضانة إنها عماله تدندن "لالالالالالا مامعمم لالالالالالا" مش بنسكت يا ماما ! طبيعة بشرية هنعمل ايه ؟!

فيه قاموس للكلمات و حتي التنهيدة ليها معني مختلف عند الراجل و الست اكتشفه جون جراي بيوضح الإختلافات دي زي مثلا ..
ال 5 دقايق
• للراجل يعني 5 دقايق
• للست لوقت طويل المدي غير محدد
أكيد كل الرجالة سألت السؤال ده لمراتتهم قبل ما يخرجوا :
أنتي جاهزه ؟
5 دقااااااايق
و تمر فترة .......


ال ولا حاجة معناها عند الراجل = ولا حاجة
انما لو الست قالتلك ولا حاجه : خااااااااف و اقلق .. ااااااااااجري

ال هححح - التنهيدة

• عند الراجل : كل شيء تمام و مبسوط
• عند الست : جابت اخرها و فيه مصيبه
• لما الراجل يقول "اتفضلي " فهو مؤدب
• لما الست بتقول "اتفضل " : هي بتديك فرصة تشرح أي حاجة نيلتها و دي فرصتك الأخيرة للنجاة و خلي بالك و أنت بتشرح عشان آخر ماهتشرح حتلاقيها "هحح"
• و ده حيوصلك لنتيجة = ال ولا حاجة

• تيجي الست تسألك : يومك كان عامل إزاي ؟
يرد : كان يوم عادي ! كان يوم كويس
آه بس ايه اللي حصل ؟
الراجل : مفيش حاجة ! مفيش حاجة جوه دماغه الصندوق فاضي يا صندوق !

لما يجي راجل يحكيلك حاجة كذا كذا حصل و بعدين قام كذا حصل و خلاص ! الملخص
لما تيجي ست تحكيلك : هي بتعييييييييييش اللي حصل تاني و هي بتحكي
و ده كان ملخص بسيط للخريطة اللي في دماغ الست و الراجل و ربنا يقدرنا علي فعل الخير.. سلام مؤقت!