الوصايا العشرة لابنتي المستقبلية

نجد أنفسنا بعض الأحيان نشعر بالوحدة حتى لو اكتظت غرفتنا بمن نعرفهم.. نجد أنفسنا عندما تتملكنا الوحدة معزولين تماما عن كل الضوضاء وكأننا وحدنا في العالم بأكمله.. نجد أنفسنا كطفل لم يتعلم المشي بعد.. فنتعثر كل صباح وكأننا تائهون.. لا نعلم إلى أين وجهتنا.. أستيقظ كطفلة تبكي في منتصف الليل وكل من حولها لا يعلمون سبب بكائها، فأجدهم يبحثون عن أسباب ثانوية كما كنت طفلة.
هل أحتاج لمزيد من النوم؟
رعاية؟
اهتمام؟
أكل؟ أدخل الحمام؟

لكن تلك الاحتياجات الثانوية هي ليست ما أحتاج، ولكني أجد نفسي لا أستطيع وصف حقا ما أحتاج ولا تفسير واضح لي عن تلك الفجوة التي أشعر بها.

سألت نفسي: ماذا لو لي ابنة وشعرت بما أشعر؟ كيف سأكون بجانبها؟ هل أتركها تتحرر من تلك الحالة وحدها دون مساعدة مني؟ ماذا لو طلبت هي المساعدة؟

وجدت نفسي أكتب لها جوابا، لعل في يوم سأكون أما وستقرأ ابنتي تلك السطور، ولعل تلك السطور تصبح كتالوج يجعلها بأمان حتى لا تشعر بما أشعر ما يوما.

ابنتي.. اعلمي أنك جميلة من الداخل ومن الخارج، ضحكتك هي البهجة، وجمالك هو ما يبعث لحياتي وللعالم بأكمله النور، متخليش حد يطفي نورك ولا يعرف يطفيكي، إوعي تخلي الدنيا تقسي أو تغير قلبك، مهما حصلك . كوني واثقة في الله، و في صنع يديه.. أنتي.

1 - حبي جسمك
خلي بالك منه.. ده ملكك وأمانتك وهدية من ربنا عشان تشكريه عليه لازم تحافظي عليه، اتعلمي من غلطات أمك (اللي هو أنا)، كلي أكل كويس والعبي رياضة عشان جسمك يتنفس، وروحي الجيم ده أنا بروح الجيم ودلعي نفسك وروحي ساونا وجاكوزي عشان تبقي مفرفشة زي أمك، وافتكري مهما كان شكل أو حجم جسمك، إنتي كفاية، إنتي كاملة وأحلى حاجة في الدنيا زي ما انتي.

2 - اجري ورا أحلامك.. خليكي مؤمنة بنفسك
"لا أحد يستطيع أن يجعلك تشعر أقل شأنا دون موافقتك".
خلي عندك أحلام واشتغلي على كل حلم ربنا حطه جواكي، لو مشتغلتيش كفاية على حلمك، متستسلميش، خليكي مصرة توصلي، هتوصلي، متخليش حد يقولك مش هتقدري، أي حد حيقولك مش هتقدري تعملي حاجة هو بيقولك رأيه اللي على قد قدرته (هو) مش قدرتك (إنتي)، متصدقيش، لو عارفة من جواكي إنك هتقدري.. إنتي هتقدري.

3- اضحكي دايما.. عيطي لما تحتاجي.. حبي من قلبك
الضحك بيريح القلب والعياط راحة، تنفيث عن ألم جواكي والحب في الآخر هو اللي حيشفي الألم، قدري قلبك وعقلك، فكري قبل ما تتكلمي، بس اتكلمي من قلبك، اللي هتقوليه حيتنسي، بس الإحساس اللي سبتيه في حد تاني عمره ما هيتنسي، حافظي على فطرتك، ربنا خلقنا بنحب من غير خوف ولا حدود ولا شروط، قلب الطفل بيتغير ليه ليه لما يكبر؟ من مواقف حصلت وناس وحشة وجعته، خليكي زي سوبر ماما، متخفيش تتجرحي مهما شفتي ناس وحشة ومهما حصل، حبي من قلبك، لو لا قدر الله حد جرح قلبك هتلاقي ربنا بيجبر الجرح ده وأنا خجيبه من قفاه وصدقيني هترجعي تاني بقلب طفل.

متخليش قلبك يكبر ولا يعجز ولا يخاف ولا يبقى جد، التفاهة حلوة والله، متخافيش من وجع، إنتي جواكي أقوى من أي وجع وخليكي تافهة زي ماما، الجد ده نكد وملوش لزوم والله، وآخر حاجة في النقطة دي، إوعي توعدي وعد وتخلفي بيه، متوعديش بأي حاجة مش هتعرفي توفي بيها، عشان لو كسرتي وعد هتكسري ثقة الشخص اللي وعدتيه، ولما الثقة بتتكسر بتكون أصعب حاجة تتصلح.

4- متحكميش على حد
حافظي على طاقتك اللي هتحطيها في حكمك على حد، لما تلاقي نفسك غصب عنك قربتي تحكمي على حد، خليكي إنتي المثال اللي نفسك هما يبقوا عليه، وقولي الحق ولو على رقبتك، الحق بينجي، عشان ربنا اسمه الحق، اعملي اللي شيفاه صح واوعي آراء الناس واللي حواليكي يضغطوكي تتصرفي بشكل معين، حتى لو بقيتي لوحدك، اللمة بتروح، بس الصح هيفضل معاكي والراحة اللي معاها بالدنيا كلها.

5 - ساعدي غيرك دايما
عيشي حياتك وانتي عندك هدف، ومعنى، متغمضيش عينك أبدا لحد محتاج مساعدة منك، لو لقيتي حد كبير في مكان وانتي قاعدة قومي وقعديه، فرحي أطفال صغيرة، لما هتعملي خير ولو بسيط ربنا هيرده ليكي، ربنا ماداكيش المهارات اللي عندك لنفسك إنتي بس، لازم تستخدميها عشان تسيبي بصمة في الدنيا وكل واحد حسب قدرته وظروفه، شوفي إيه المهارات اللي عندك والعلم والخبرات اللي في حياتك ودوري إزاي تنقليها لغيرك.

ما تحوشيش علمك ومهاراتك لنفسك، انفعي غيرك باللي عندك مهما كان بسيط أو في وجهة نظرك تافه، أقولك على سر؟ لما يبقى نفسك في حاجة اوي اعمليها لحد.. نفسك في حب؟ اعملي أي حاجة بتعبر عن حب جواكي لحد بتحبيه، نفسك في فلوس؟ ادي حد محتاج صدقة، واطلبي من ربنا الحاجة اللي نفسك فيها، يا هيديهالك زي ماطلبتي، يا هتستني وهيديكي حاجة أحلى من اللي كانت نفسك فيها.

6 - خليكي طموحة
لو عندك موهبة نميها، كل واحد ربنا اداله هدية جوَّاه عشان يدور عليها ويفيد بيها الغير، حبي شغلك حتى لو مش بتشتغلي الشغلانة اللي نفسك فيها، الشغلانة اللي انتي فيها حتعلمك حاجة حتفيدك لما توصلي للشغلانة اللي نفسك فيها، آه واوعي تسيبي شغلك وطموحك عشان حد، هي دي قوتك وجزء من شخصيتك متتخليش عنها.

7 - متبقيش ضحية لأي حاجة ولا أي حد
متلوميش وتشتكي وتستني الظروف (اللي مش بإيدك) هي اللي تتغير عشان تبقي مبسوطة، كده بتعجزي نفسك وبتحكمي عليها تبقى ضحية، ممكن ربنا يقدرلك يحصلك مشاكل كتيرة وكبيرة في حياتك، بس رد فعلك تجاهها مسئولية مين؟ محاولتك إنك تغيري الوضع؟ مسئوليتك إنك تحاولي تخرجي من الماضي وتغيري المستقبل وتاخدي قرارات مختلفة عشان متكرريش نفس المشاكل.

"نحن ضحايا أنفسنا.. الآخرون مجرد حجة"

8 - السعادة رزق
السعادة رزق من ربنا، السعي ليها بيبدأ من جوه لبره مش العكس، بيبدأ إنك تبقي راضية عن حياتك ومش عايشة بكلاكيع جواكي، يعني إيه؟ يعني تبقي نفسك، تبقي انتي من غير ماسكات ولا تمثيل، تبقي حابه نفسك زي ما هي بمميزاتها وعيوبها ولما تقدري توصلي لقلبك وفطرتك الجميلة وتفهمي مشاعرك وأحلامك ومعتقداتك وتسيطري إنتي عليها عشان متعطلكيش هتنجحي ومفيش سبب خارجي هتعتمدي عليه عشان تكوني مبسوطة.

9 - خليكي مختلفة! يعني.. خليكي إنتي زي ما انتي.

مش اتفقنا إن كل واحد عنده بصمة؟ إنتي مش زي حد ولا حد زيك! إنتي مميزة (مش عشان أنا أمك طبعا.. بس دي من أهم الأسباب)، اللي أقصده مش لازم تبقي زي كل الناس، ممكن تختلفي، عادي تبقي كريتيف كده! عيشي حياتك بطريقتك إنتي مفيش حاجة اسمها مفروض مدام مش حرام ومفيهوش إساءة أو أذى لحد.

"الإنسان المبدع فعلا هو اللي بيختار إنه يتبع فضوله أكتر من مخاوفه".

لازم تجربي حاجات جديدة تخليكي تكتشفي نفسك أكتر وتعرفي عنها حاجات مكنتيش تعرفيها قبل كده، جربي حتى طريقة عمل الكيكة الاسفنجية بالمحشي؟ مش جايز تطلع حلوة ونأكلها لأبوكي؟

10 - إنتي قوية يا بت!
إوعى تكوني بنت بمليون راجل، لأن الراجل اصلا مش أقوى منك، مش مقياس للقوة أو الجدعنة.