لغات الحب الخمسة

هو للحب لغة ؟ آه تصور ؟ و كمان خمسة ؟ آه أنا لسه عارفة و منبهرة والله.. و يمكن المشكلة إن احنا منعرفش بس المشكلة الأكبر أن احنا نعرف و نصر نعمل نفسنا منعرفش ..الفكرة كلها إن ربنا خلقنا مختلفين و دي مش حاجة وحشه بس هي حاجة بتخلي لكل واحد فينا كتالوج معين في التعامل .. و التصادم دايما بيحصل مع اقرب الناس لينا لأننا دايما بنتعامل وفق كتالوجنا من غير مانبذل مجهود و نقرا و نعرف كتالوج اللي قدامنا عشان نريحهم و احنا كمان نستريح ..

The 5 Love Languages هو أحد الكتب المشهورة جدًا في مجال العلاقات الزوجية و حقق أفضل مبيعات على المستوى العالمي، بـيكشف الدكتور ” جاري تشابمان” عن الكيفية التي يعبر بها أشخاص مختلفون عن حبهم بطريقة متباينة.. و في الحقيقة هناك خمس لغات متعددة للحب شرحهم واحدة واحدة بالتفصيل بس أنا حاولت اختصرهم في سطور اللي جاية دي ..

رغم إنه من الطبيعي أن يكون الناس بيستقبلوا الحب بطرق مختلفة إلا إن الكتاب ده وضح بطريقة حتساعدنا عمليًا على التعرف على طرق الحب المختلفة للناس و إزاي نمارسها معاهم ، وهو بـيعبر عنها بأنها لغة ..

هي خمس لغات للحب ، وكلٍ واحدٍ فينا يتحدث إحدى هذه اللغات الخمس ، وعلينا لكي يصل حبنا للطرف الآخر أن نتحدث بلغة الحب التي لديه ، وأن نخبر الطرف الآخر عن لغة الحب التي لدينا لكي نسهل عليه مهمة توصيل حبه إلينا بالطريقة التي تناسبنا فعلًا والتي نحتاجها، وليس بطريقة حب مختلفة وهذا ما يفعله أكثر المحبين.. و هم من يمارسون الحب بطرق مختلفة عن ما يحتاجها محبينهم وهذا ما يؤدي إلى تلك المشاكل الزوجية/العاطفية اللي بيكون مختصرها : " أنت مبقتش بتحبني / بتحبيني" "إنتي مش فهماني / أنت مش فاهمني “ "أنت مش مهتم بيا “ "إنتي خنقتيني و مش مقدرة “
و طبعا يا يسرية " أنا عايزة ورد يا إبراهيم “.

بيتكلم الكاتب في البداية عن الفرق بين الحب الرومانسي اللي بـيكون في بداية الجواز ، والحب اللي بـيعيشه الأزواج بعد مرور سنين كتير من المشاكل والتحديات والعشرة ، وهو بـيقول بأن الحب الرومانسي مؤقت .. و عشان يكون في حب دائم ومستمر فلازم نتعلم لغات الحب الخمسة وهي كالآتي:
مستعدين ؟ بسم الله الرحمن الرحيم ..

1- كلمات التشجيع

وهنا تتعدى المسألة كلمة (بحبك ) إلى كلمات من قبيل (أنت أحسن واحد/ واحدة )
(لولاك مكنتش وصلت للي أنا فيه - من غير وقفتك جمبي أنا مكنتش هعرف أكمل ( (وجودك في حياتي اجمل حاجة ..انتي مهمة و غالية عندي .. انت مهم و مفيش أهم من راحتك عندي )

هنا بـيحتاج الشخص إلى الكلمات اللي بـتعبر له فيها عن مكانته الكبيرة و غلاوته عندك و جواك ..

كلما سمع منك كلمات مشجعة وكلمات حلوة كلما أمتلئ قلبه بالحب أكثر.

يعني بالبلدي : الكلمة الحلوة بتفرق .. الكلمة ليها قوة يا تجيبك سابع سما ..يا ترزعك سابع أرض لو من حد بتحبه .. لو مشجعتوش بعض بكلام حلو علي أساس إن كل واحد عارف أو بديهيات ! أو بلاش تلزيق وكلام فارغ ..البطارية بتخلص و بـتشحنها بشوية كلام حلو و ده هيشجع الطرف التاني انه يعمل أكتر و نفسه تتفتح انه متقدر ..متبخلوش بالكلام ما انتوا لكلكلكلولك في التفاهات و الخناقات ..الكلمة الحلوة حلوة !

2- تكريس الوقت

الشخص ده عايزك تكون رفيقه ومعاه و صاحبه اللي بـيتكلم معاه و يخرج معاه و تقضي وقت معاه، تروحوا النادي ، تروحوا الجيم ، تعملوا shopping ، تاكلوا مع بعض في أحد المطاعم لوحدكم بس ، و يكون بينكم كلام كتير و حوار عنكم بس ، أن يكونوا في جدولكم اليومي وقت مخصص ليكم ..و هو ده اللي هيسعد الشخص ده .

يعني بالبلدي : خليكوا صحاب . (نقطة ) مش حتلاقي أحسن من شريك حياتك أو حبيبك إن يقوم بدور ال Best Friend ..مينفعش طرف يحس بوحدة و التاني موجود الشخص ده محتاج وجودك بشكل يومي و مش معني كده انه يخنقك و مش مديك مساحة بس هو عايز يكون له مكان في جدولك اليومي مع الحاجات التانية المهمة اللي بتعملها .. الشخص ده بيحب يخلق معاك ذكريات في كل يوم و محتاج يحس إنه مهم في يومك .

3- تبادل الهدايا

هذا الشخص سوف تجد على مكتبه مجموعة التذكارات والهدايا التي تجعله يستشعر بالحب عندما يحتاجه، المناسبات الجميلة تكون فرصة للتعبير عن الحب من خلال هدية، والهدية تعني وجود مناسبة جميلة، وإنها جميلة لوجود هذا الشخص في حياتك المال ليس عائقًا هنا ..
المهم أن يكون هناك ما يناله منك بعنوان المحبة والتقدير والفرح لوجوده معك في حياتك.

يعني بالبلدي: "تهادوا تحابوا" الهدية دايما معناها إنك بتفكر في الشخص التاني و عايز تفرحه ..مش شرط تكون غالية في قيمتها .. هي غالية في معناها . عيد ميلاد / عيد جواز / Anniversary / شغل جديد / ترقية / عيد شرطة / طهور / سبوع .. أو حتي من غير مناسبة مش لازم تدفع دم قلبك كفاية إنك فكرت و قررت تفرح شريكك و تعبر بحبك عشان الشخص ده لغته في التعبير مختلفة بيحس بالحب لما تفتكره في مناسابته الخاصة بهدية و يا سلام لو من غير مناسبة دبل كيك و انت الكسبان أنك حسسته بالحب و فرحته .

4- أعمال خدمية

هذا الشخص يرى الحب بالأفعال لا بالأقوال، إنه ينظر لقيامك بالأعمال المنزلية على إنه شيءٌ في غاية التعبير عن الحب، كلما ساعدته في إنجاز بعض المهام وتعاونت معه في تحقيق بعض الإنجازات، فذلك تعبير كبير عن الحب، تختلف طبيعة هذه الأعمال من شخص لشخص .. ولكن الأهم أن يراك تضع يدك في يده أو تسعى لأن تنجزها بالنيابه عنه ليدرگ مقدرًا لدوره ومقدرًا لقيمته في حياتك.

يعني بالبلدي: متبقاش بروطة لامؤاخذة ! و أنتي متبقيش لازقة في الكنبة ! يعني كل واحد يساعد في البيت . هي تغسل الاطباق هو يرصها. هي تطبخ هو يغرف أي حاجه تحسس الطرف التاني انه مقدر المجهود اللي بيتعمل في البيت حتي لو الحاجه دي تافهه زي إنك ترص شوية اطباق علي السفرة . الفكرة في مساعدة مشتركة من أي نوع في البيت ده "للمتجوزين “.

5- الإتصال البدني

هذا الشخص وبكل عفوية يريد أن تكون يدك في يده، ان يلمس شعرك، أن تحتضنه وتقبله، العلاقة الحميمية تعني له الكثير، جلوسك بقربه وأن يلامس جسمك جسمه بطريقة ما هو ما يجعل ذرات الحب تنتقل منك إليه، أن تدرك إن هذا الأمر هو غاية التقدير والأهمية بالنسبة لهذا الشخص.

يعني بالبلدي: كن محب. عبر عن حبك باللمس .. متتكسفش تمسك ايديها بحب مش حتتكهرب والله. لما ترجع من شغل بوسها مش معني إنها عايشه معاك كل يوم انه إزيك و تخش تغير روتين لذيذ ! حتلاقيها هي حتستقبلك بحضن و حب و مستنية ده منك .. و ممكن يبقي العكس ممكن يكون الراجل نفسه حلوة و عايز أول حاجة يخش ياخدك في حضنه متبقيش انتي بقي لابسه جلابية كستور و بتقوليله أنت شرفت شايف الساعة كام ! هنا لغة الحضن و اللمس هي اللي بتعبر عن كل كلام الحب اللي جوه الشخص اللي بيعبر عن حبه باللغه دي .

كل اللغات هي لغات حب، ولكننا كبشر نميل إلى إحداها دون الأخرى وهي التي يرى فيها شريك حياتنا قيمة أكبر من غيرها.
و عشان كده مش حقدر أختم بحاجة أحلي من اللي قاله سيد الرجال جبران خليل جبران :

"اذا بلغت غاية مايجب أن تعرفه, فأنت على عتبة ما يجب أن تشعر به.”
"ما اجهل الناس الذين يتوهّمون ان المحبة تتولد بالمعاشرة الطويلة والمرافقة المستمرة.
ان المحبة الحقيقية هي ابنة التفاهم الروحي وان لم يتم هذا التفاهم الروحي بلحظة واحدة لا يتم بعام ولا بجيل كامل".

" لا تخافي الحب يارفيقة قلبي، علينا أن نستسلم إليه رغم ما فيه مِن الألم والحنين والوحشة."
"البعض نحبهم لأن مثلهم لا يستحق سوى الحب ولا نملك أمامهم سوى أن نحب نرمم معهم أشياء كثيرة نعيد طلاء الحياة ونسعى صادقين كي نمنحهم بعض السعادة. "
"ولكن أيسوغ للمرأة أن تشتري سعادتها بتعاسة زوجها ؟ فأجابتني نفسي قائلة : وهل يجوز للرجل أن يستعبد عواطف زوجته ليبقى سعيدا ؟"