إزاي تبقى كويس ؟

كتير منا بيلاقي نفسه مش كويس .. بيلاقي سؤال بسيط زي عامل ايه ؟ تقيل .. و بيقول الحمد لله وهو حاسس بتقل السؤال و الجواب .. كتير بيفتكر أن أعراض الاكتئاب بعيدة عنه .. أو لازم تكون أعراض شديدة عشان يتقال عليه "مكتئب “ ..

التعب النفسي مش وباء و كل واحد معرض له تحت أي ضغوطات و مش لازم يروح لدكتور نفسي عشان يبقي كويس ..لازم يبقي عايز يبقي كويس عشان يبقي كويس ..حتقولي بالبساطة دي ؟ اتفذلكي و اتفلسفي .. بس الحقيقة أنا بعيدة كل البعد عن الفذلكة أنا عشت مرحلة كنت فيها مكتئبة و كنت عايزة اوقف حياتي و ادوس علي زرار STOP و شفت حواليا كتير وصلوا للمرحلة دي و لظروف مختلفة ..

دي أعراض علماء النفس شخصوها علي أكتر من 500 ألف شخص من أعمار مختلفة وصلوا للحالة دي "الأكتئاب" بس رفضوا التشخيص .. كانوا بيقاوموا ضعف جواهم .. يعيطوا بالليل و الصبح ينزلوا يبتسموا و علي وشوشهم آثار بكاء علي عنيهم و ملامحهم ..

أعراض الاكتئاب:
1- عدم وجود رغبة في عمل أيّ شيء.
2- فقدان الرّغبة في ملذّات الدّنيا.
3- الانطواء والعزلة وكثرة التفكير السّلبي.
4- التشاؤم والنّظر إلى الأمور بمنظار أسود (عدم وجود أي نوع من الأمل في حل المشاكل)
5- الشّعور بالذّنب ولوم النّفس وتأنيب الضّمير.
6- قلّة النّشاط الجسماني والجنسي.
7- قلّة النوم أو الميل إلى النوم والرّاحة.
8- قلّة الشهيّة أو الإفراط في الأكل.

لو انت لقيت نفسك عندك أي حاجة من النقط اللي فوق .. عادي! الاكتئاب ده زي البرد .. ممكن يصيبك كده زي الزكام .. لو قاعد مع حد و طول الوقت بيشتكي و زعلان و صعبان عليه نفسه سهل جدا تتأثر بحالته و تلبس نضارته و تبتبدي تشوف حياتك بنضارته .. بس ده مش معناه إن اللي شايفه صح .. ممكن كل اللي محتاجه تشوف الموقف اللي مأثر فيك بنضارة تانية .. مش أكتر..

مش بقلل من إحساسك ولا بالتقل اللي في صدرك .. بس بطمنك انه هيروح زيه زي البرد.

ليه أنا بـبسطهالك؟ علشان كلنا معرضين في وقت نحس بالوحدة و نحس بتقل مش عارفين نعمل فيه ايه .. و لو دخلت علي عمك جوجل و كتبت في ويكيبيديا الاكتئاب هيطلعلك الكلام المجعلص ده اللي حيخوفك و يخليك تدور علي دكتور هادي خشبة و تكع فلوس علي الفاضي ..

الاكتئاب (ويكيبيديا) : الكآبة أو الاكتئاب النفسي هو اعتلال عقلي يعاني فيه الشخص من الحزن والمشاعر السلبية لفترات طويلة، وفقدان الحماس وعدم الاكتراث ويصادفه مشاعر القلق والحزن والتشاؤم والذنب مع انعدام وجود هدف للحياة مما يجعل الفرد يفتقد الواقع و وجود هدف للحياة.

هو أحد أكثر الاضطرابات النفسية شيوعًا. وهو يصنف ضمن الاضطرابات النفسية التي تتسم بخلل في المزاج. وأهم ما يميز الاكتئاب هو الانخفاض التدريجي -أو الحاد والمتسارع أحيانًا- في المزاج والنفور من الأنشطة.

يمكن أن يكون لها تأثير سلبي على أفكار الشخص، و سلوكه، و مشاعره، ونظرته إلى العالم والرفاهية المادية. قد يشعر المعانون من الكآبة بالحزن، والرغبة في البكاء، والقلق، والفراغ، وانعدام الأمل والقيمة، وقلة الحيلة، والشعور بالذنب، وتعكر المزاج، والألم المعنوي، والاضطراب. ويفقد العديد منهم حماسه واهتمامه بالعمل والحياة الاجتماعية وبنشاطات كانت محببة لهم. قد يعانون أيضًا من فقدان الشهية أوالإفراط في الأكل. لديهم مشاكل في التركيز و تذكر التفاصيل واتخاذ القرارات، و قد يقدموا على إلحاق الأذى بأنفسهم أو بمحاولة الانتحار أو التفكير فيه.

وحتلاقي علي شمالك صورة ست حزينة تجيب البؤس و تؤدي للإنتحار. أنا برحمك تشوفها والله .. زعل زعل يعني   ..

الغريب واللي ممكن تلاحظه إن ممكن تبقي كويس .. و فجأة تظهر عليك أعراض الاكتئاب و تحاول تبقي كويس .. بس مش عارف.. فتنام .. أو تهرب من التفكير و من الحالة دي و تقعد تتفرج علي أفلام أو تخلص حلقات مسلسل و انت قاعد بس بمجرد ما بتخلص حالة التشتيت دي تلاقي الاكتئاب قاعد جنبك و مربع و بيمسي عليك كمان ..مستنيك ، ماهو ضيف تقيل و انت متخلصتش منه .. مش هيروح لوحده ..

فتعالي نعرف أنواعه واحدة واحدة عشان نعرف نتخلص منه و نسلم عليه و نقوله ميزورناش كتير ..و جايز لما نعرف طريقة صرفه يبقي سهل علينا لما يظهر منستسلمش لوجوده و نمشيه من علي الباب ..

أنواع الاكتئاب:

الاكتئاب المزمن الخفيف: وهي عبارة عن حالة هم تصيب الشخص وتغير من مزاجه ليصبح معكّرًا وعصبيًّا، وتكثر هذه الحالة عند المراهقين والأطفال، وتتفاوت مدتها حسب وجود عوامل تؤثّر عليها، ويؤدّي إصابة الشخص بهذا النوع إلى ظهور العديد من الأعراض المصاحبة له، كعدم الرغبة لتناول الطعام أو الرغبة الشديدة لذلك، وعدم المقدرة على النوم بشكل طبيعي وسليم، الشعور بالإرهاق، وعدم مقدرة المصاب على التركيز، والشعور بأنّه عديم الفائدة وأنّه عاجز وقليل الحيلة.

الاكتئاب الشديد: وهو عبارة عن حالة تعكر شديد في المزاج، يسبّب فقدان الشعور بأيّ متعة في الحياة وعدم الرغبة بممارسة أي نشاط، بحيث ان كافة الأمور تصبح بالنسبة للمريض مملة وغير مشوقة.

الاكتئاب الموسمي: وهو عبارة عن حالة كسل وتعكر في المزاج، يصبح المريض فاقدًا لرغبته بالعمل والجنس، ويشتهي تناول الحلويات والأغذية المليئة بالدهون بشكل كبير. 

ده علميا الأنواع التلاتة اللي بتصيب أي انسان..كلنا معرضين ليها بلا استثناء..طب بعد ما عرفنا أعراضها و أنواعها.. هنعمل قراطيس بالمقال ده ؟ لا والله ما حسيبك الا و انت فلة شمعة منورة.

عندي ليك 4 طرق برضه تطلعك من الهم اللي أنت فيه بس ولا واحد فيهم هينفعك لو أنت مش ناوي تساعد نفسك .. عشان اللي مش بيساعد نفسه ربنا مش بيساعده. فقبل ما تقرا ال الأربع طرق دول قرر من جواك إنك عايز تساعد نفسك لو مش مقرر .. بطل قراية و ربنا معاك.

1 – فكك من الماضي .. إنك تعدي بأزمة حصلت .. مش سهل ..أنا معاك ..بس لو انت مش كويس بسبب "الماضي “ بسبب حاجة "مضت" خلصت / حصلت .. ده الوقت اللي تبص فيه للماضي عشان تودعه . اتكلم معاك . اتكلم مع نفسك ..ايه اللي حصل ؟ و خلاك تحس بأيه؟ إزاي اثرت عليك ؟ و ازاي أثرت علي اللي حواليك؟ ايه الحاجة الكبيرة المكلكعة اللي مخليه صعب تعدي الأزمة دي بعينها ؟

ممكن الكتابة تساعدك ترتب أفكارك.. لو الأزمة دي زي المرض اللي مكلبش فيك بيسموها TRAUMA يعني صدمة و بتكون زي المرض المزمن ممكن يكون سببها موقف حصل في الطفولة و انت لحد دلوقتي فاكره بس مش عارف إن مأثر عليك لحد انهاردة و مسبب في مشاكل تانية جواك ..و مع اللي حواليك.. ساعتها مش عيب تشوف دكتور مختص يتكلم معاك فيها . هو ساعتها اللي حيساعدك من الحمل ده.

2 – دلع نفسك و هشتكها .. ايوه هشتكها متستناش اللي يهشتكهالك ..

املا البانيو ماية دافية و بطل تفكير طول مدتك في البانيو ، كل ايس كريم ( فكك من الريجيم دلوقتي .. بقول دلع نفسك  ، اتفرج علي فيلم حلو و ياريت ميبقاش نكد يفضل يعني .. ، غير ديكور اوضتك اعمل حاجة جديدة في أوضتك ، أعمل حاجة في شعرك جديدة و عيط..ايوااا عيط.. دي نعمة من ربنا إنك تطلع طاقة سلبية جواك من خلال العياط حتستريح ..خطط للويك اند تعمل حاجة بتحبها .. اعمل سريرك و خليه مريح ونام بهدف إنك ترتاح مش بتهرب . أنت محتاج تستشعر حزنك متهربش منه عشان تقدر تفكك من الماضي و تعمل خطوة واحد لازم تعمل خطوة 2 و هي تخلي مشاعرك براحتها و تتقبل إنك مش كويس و بتحاول.

لو لقيت نفسك بتغرق و مش عارف تطلع من العياط و الشحتفة مود بعد ما خرجت مشاعرك و سمحت بيها يبقي في حاجة غلط .. يبقي محتاج ترجع للخلف برضه و تشوف دكتور نفسي أو لايف كوتش و المجال ده فجأة بقي موجود و بكثره و فيه ناس كتير موثوق فيها مش تجارية.

3- أعمل حاجة حلوة لحد جرحته . لو هما متقبلين يشوفوك ..هات معاك هدية .. اكتب كلام حلو في كارت أو اعتذر للشخص ده وهو قدامك مش برسالة واتس اب. لو حاسس اللي بينكم اتكسر و انت عايز تصلح .. اسأل لو ممكن تصلح اللي فات .. عشان الوقت مافتش.. لسه فيه وقت مدام فيك نفس . ممكن تصلح علاقات اتكسرت و تعدي الإحساس بالذنب لما تبقي أنت كويس في تعاملك.
 
لو الموضوع فيه انفصال تام . خليه انفصال رحيم بدون تجريح . احترم المسافات ساعات أحسن طريقة إنك تسمعهم لما بيقوللك عايز ، عايزة ابقي لوحدي.

ركز علي اللي محتاجينه منك .. مش علي إحساسك بالذنب . ده لا هيساعدهم ولا هيساعدك أنت.

4- سامح الماضي . سامح يا سامح ونبي .. الماضي جزء منك هو اللي خلاك أنت دلوقتي , اللي انت شفته صعب بس خلاك أقوي.. لما تتقبل الحقيقة و تاخد بالك منها حتخليك تبطل تبص علي الماضي .. خد بالك أنت عملت أحسن حاجة ممكن تقدر تعملها في الوقت ده..

آخر حاجة دي مني أنا .. أنا عملتها معايا و نفعت .. جايز تنفع معاك أنت كمان ..

ركز علي إن تبقي نفسك . أنت مخلوق كامل و مفيش زيك . عندك الحرية تحب اللي تحبه و تبقي زي ما أنت .. اللي يقولك انت اوفر / تخين / غلس / مش كفاية .. قوله دي خالتك ، أنت كفاية أنت كنت محتاج تصالح نفسك بس و تقولها اتس اوكيه .. غلطتي؟ معلش كلنا بنغلط ، أنت مسموحلك تغلط . كلنا بنغلط . اتعلم من غلطتك و امضي في حياتك.

MOVE ON الله لا يسيئك ماشيين بعلاج والله .. الناس اللي بتحكم عليك و بتقول رأيها فيك و اثرت عليك و علي قرارتك هما ماشيين في حياتهم و انت اللي موقفها .. المقالة اللي جاية حخليها بس عن طرق الدلع و الهشتكة و يبقي زي الــ GUIDE كده و الكتالوج اللي ترجعله عشان تدي نفسك حقها و تدلعها بس انت دلوقتي مدام قررت تساعد نفسك قابل مرحلة الوحش و أتخلص من الوحش عشان أنت شفت اللي أوحش منه و تستحق تشوف حلو و دلع و هشتكة و بشتكة.