كتالوج الهشتكة والبشتكة والدلع

اختلفنا أو اتفقنا ..الزعل مش هيروح لوحده طول ما السبب موجود ..طول ما فيه مشكلة ملقتلهاش حل ..جواك حيفضل مش مرتاح مش هتعرف تضحك عليه .. حتحاول تهرب و تعمل فيها فتك و هتخرج مع صحابك شوية أو تتفرج علي تلفزيون و أفلام بمجرد ما الخروجة حتخلص و الفيلم يخلص .. زعلك حيرجع تاني .. ما انت مش كويس و السبب اللي مزعلك …حتعمل ايه ؟ عشان كده المقالة اللي فاتت شرحت الأعراض و الأسباب و الحلول و ده بقي الكتالوج اللي ترجعله و انت بتحاول تبقي كويس .. وانت بتاخد الخطوة عشان تساعد نفسك .. و أكيد إن شاء الله حيساعدك مع أول خطوة بتعملها عشان تساعد نفسك .. يلا نبتدي برنامج الشخلعة و الهشتكة .. دي مش حلول دي حاجات حتساعدك وانت بتساعد نفسك و انت بتحاول و انت بتقوم نفسك بالعافية عشان تبقي كويس ..

1 - فكك من الدايت حتبقي جعان و زعلان ؟
2-  ضميرك انبك ؟ خلي عندك ارادة و خليك متمسك بالدايت حتبقي زعلان و تخين ؟
3- أعمل دايت (تغيير ده ولا مش تغيير في روتين حياتك ؟ )
4 - ادعي ربنا و انت متوقع إجابة. يعني ادعي و أعمل الحاجه اللي هتعملها لو ربنا استجاب .
علميا: في حاجة اسمها قانون الجذب .. و ان القانون ده عبارة عن ذبذبات الراديو كده لو ظابط قناة الراديو علي سعادة استحالة يجيلك نكد . لو مش فاهم حاجة من اللي بقوله.. ده كلام كبار حشرحه باستفاضة عشان حياخد وقت و مساحة كبيرة بس دينيا ربنا قال في حديث قدسي "أنا عند ظن عبدي بي" يعني ربنا بحاله عند ظنك .. لو ظنيت خير حيجيلك و لو ظنيت شر برضه حيجيلك .. أنت اللي بتختار .

5- أعمل حاجة تبسط حد بتحبه . أعمل حاجة تبسط حد متعرفوش و ميعرفش أنك أنت اللي عاملها.
6 - دلع نفسك و روح أعمل مساج لمدة ساعة
7- اطفي تليفونك علي اقل 5 ساعات متواصلة و أنزل اتمشي أو روح الجيم
8 - فتش كده في تليفونك أو في صحابك اللي علي الفيسبوك شوف مين شكله مبسوط و مش بيعمل شير لأغاني جرح و عتاب و جراح .. دوللو لقيتهم اعملهم بلوك و أنت مستريح .. لقيت حد من صحابك لذيذ و فرفوش كده و بقالك كتير مشفتوش ؟ كلمه و اتفقوا تخرجوا. صاحب السعيد تسعد .
9 -  أجري كأنك بتجري من مشاكلك..حتطلع طاقة سلبية رهيبة و هتحس نفسك خفيف .

"معلومة طبية : يطلق الجسم بعض المواد الكيميائية مثل “الاندروفين" التي تحسن من الحالة المزاجية و تحارب هرمونات التوتر . لذلك فإن الرياضة تساعد علي التخلص من الإكتئاب و تساعد علي الاسترخاء ."

10- مش قادر تعمل رياضة ؟ أرقص! عايز تعرف فوائد الرقص ؟ غير الليونة طبعا *بصوت سعيد صالح *
- بيقلل التوتر و الضغوط النفسية المتراكمة
- بيدي إحساس بالسعادة و الثقة
- هتخس
- بطنك ووسطك حيخسوا و انت مشغل مهرجانات .. اطلب بيتزا لارج و أرقص قبل و بعد و ادعيلي
- لو أنتي حامل.. في دراسات أكدت إن الرقص بيسهل عملية الولادة لانه بيساعد علي المرونة في منطقة الحوض و عشان كده بينصح الأطباء بالرقص 3 ساعات في الأسبوع للحامل.

11 – افردها . اضحك . ابتسم .. يعني حاول تبطل التكشير شوية و اضحك و دي طريقة فعالة لمحاربة الشيخوخة و الخطوط و تجاعيد الوش , اضحك كركر اوعي تفكر .
12 -   خليك تافه . يعني مش كله جد .. اتفرج علي كارتون / اقرا ميكي (حلوة جدا قبل ما تنام ( اتفرج علي فيلم كوميدي و بيضحك و مفيهوش تفكير . حتلاقي موسوعة من الأفلام و الكارتون ..عن تجربة كل أفلام هنيدي بلسم جروووح.. أفلام أحمد حلمي مرهم أحزان ..أفلام محمد سعد شاش و مكركروم .. زوووووق معايا اليوم عشان دي حاجة مؤثرة جدا و هات فشار و نقي فيلم بسرعة و اوعي يغرك جسمك .
13- الشمس . الشمس يا بدير...فيتامين D لما بيقل من الجسم ممكن يسبب اكتئاب .. لو اتمشيت في الشمس أو قعدت شوية هتحس أنك أحسن عشان جسمك و روحك محتاجة الفيتامين ده و الاحساس ده بس اوعي يجيلك ضربة شمس .. يعني 10 دقايق 20 دقيقة كده اخرك ..
14 – افتح اليوتيوب – أكتب YOGA أو تمارين يوجا للاسترخاء للمبتدئين . بتريح الأعصاب و بتساعدك تبطل تفكر و تركز علي أي حاجة زي نفسك , السقف , الأباجورة المهم أي حاجة غير اللي مضيقاك .
15 - هاتي ورد لنفسك يا يسرية.. إبراهيم مشغول و سمعه تقيل .
16 - هاتي روايح يا روايح .. و انت كمان أي PERFUME او BODY SPLASH فيه حاجة فروتي توتي يعني فراولة / خوخ / لمون ..الدراسات اثبتت انها بتقضي علي المود السلبي و خصوصا لو خدت شاور و جبت زيت فيه ريحه بتحبها ..بتهدي الأعصاب و بتخلي السلبية تجري من الريحة الحلوة دي !
17 -  اقرا كتاب بتحبه . اسحل نفسك في رواية حلوة .
18 - احضن حد بتحبه .
فيه دراسات عن موضوع الحضن ده .. فيه سبع فوائد للحضن..سبعة !!!
1- يزيد من مستوي هرمون الأكسيتوسين: يسمح البعض هرمون الأمان..و يسميه البعض هرمون الدلال و هو في الحالتين يشعر الشخص بالحب و الأمان و السعادة.
2- يعزز مناعة الجسم: تأثر الجهاز المناعي للإنسان بمدى سعادته ولذلك فإن هرمونات مثل الأوكسيتوسين والأندروفين قادرة على تعزيز الجهاز المناعي والتفكير الإيجابي في جسم الإنسان ونفسه وفكره.
3- يخفف الألم: إن قوة الجهاز المناعي وكفاءته وزيادة هرمون الأوكسيتوسين يقلل من مستويات الألم، وكثيرًا ما يشعر أحد الزوجين ممن يعاني من آلام معينة كآلام العظام والرقبة بالتحسن.
4 - يساعد على تعميق التواصل: العناق بين الزوجين وخاصة الحضن الطويل ما قبل النوم والحوار بينهما عن يومهما وعن مستقبلهما وعن مشاعرهما يزيد من التواصل بينهما ويعمقه. ويصبح كلٌ منهما شديد القرب من الآخر قادرًا على فهمه أكثر. إن هذا هو وقت المشاعر والدلال والتعبير عن الحب.
5- يزيد من الرغبة الجنسية:إذا داوم الزوجان على حضن ما قبل النوم فإن مجرد التلامس بينهما حتى لو كانت اللمسات غير مثيرة تزيد من إفراز هرمون الدوبامين مرة بعد مرة، ولذلك ينصح الأطباء حديثي الزواج أو السيدات اللواتي يشكين من البرود بزيادة التلامس بينها وبين زوجها، فالضمة الحلوة والشعور بيدي شريك الحياة وهي تربت على الظهر وتشعرك بالأمان يزيد من رغبتك به.
6- يساعد على الاسترخاء والنوم العميق ويقلل من التوتر والقلق: إن هرمونات السعادة قادرة على منح الشخص الاسترخاء والراحة والنوم العميق، وهي أيضًا تُلهم التفكير الإيجابي وتشعر الشخص بالسعادة والأمان وتقلل من العصبية والقلق والتوتر.
7- يقلل من خطر الإصابة بأمراض القلب وضغط الدم: وذلك بسبب تقليله للتوتر وآثار الإجهاد والمرض والألم وتحسين مستوى الهدوء والراحة وهو ما يؤثر على الصحة الجسدية بالطبع فيقلل من خطر الإصابة بأمراض القلب وضغط الدم.

بعد الأسباب دي حتقولي بس أنا مش متجوز ! حقولك ولا انا ! اتس اوكيه ! احضن ابوك / امك / اختك / اخوك/ اختك / صاحبك / صاحبتك / قطك / كلبك .. لو فيه بيبي في أي حتة .. حضن الأطفال بيدي مشاعر حلوة ممكن تخليك ناسي كنت زعلان من ايه اصلا .. بقولك اتس اوكيه !
19 – جرب تقول اللي حاسه من قلبك .. لو غضب .. اغضب و حس بمعني إنك تبقي حقيقي .. كن أنت بكل اللي جواك و بضعفك .. و زعلك و قول علي اللي مضايقك بوح بيه .. أي وضع مزعلك و متغيرش ممكن يكون بسبب سكوتك.. سكوتك يعني قبول .. وانت من جواك مش قابل .. متخليش خناقة جواك تبات.. عشان حتفضل وراك لحد ما يبقالها صوت و ساعتها حتبقي قنبلة موقوتة .
20 – تعرف تقول بحبك ؟ قولها ! قولها لحد بتحبه / مراتك / جوزك/ خطيبك / ابوك / امك / اخواتك / اصحابك .. كلمة ليها مفعول سحر .. بتخليك حاسس إنك عارف تحب و بتتحب .. و روحك محتاجة ده .. لأنها جيس واط؟ روحك جت عن طريق الحب ! مهما الايجو منعك .. قولها عشان انت هتفرح لما تقولها و تسمعها ..
21 – كل شوكلاتة . الشوكلاتة الداكنة Dark Chocolate بيقلل التوتر وبيساعد علي هدوء الأعصاب.
22- الكافيين . اشرب قهوة ..فيه فوايد كتير للقهوة أهمها المزاج أن بـيزيد من حرق الدهون في الجسم.
23- العبي يا ألعاب! أنت بطلت تلعب ليه ؟ فين أيام الاتاري الكلاسيكية فين ؟ مش حوصيك PlayStation / كوتشينه /Games من علي الموبايل / العب كورة / اكتشف الألعاب اللي فيها ألغاز الجديدة ..متبطلش تلعب والله .. فيه طفل تافه جواك هيقرفك و يقريفك لو ملعبتش معاه !
24 - هات كلب –قطة – أي حيوان أليف..جيس واط؟ ليها فوايد !
"اثبتت الدراسات أن الأشخاص الذين يملكون حيوانات أليفة لا يعانون من الاكتئاب بالمقارنة مع غيرهم من الذين لا يربون الحيوانات الأليفة، وذلك لأنهم يمتازون بالرفق واللين عند تعاملهم مع هذه الحيوانات، كما أنها تخفف من الإحساس بالانفراد والعزلة لديهم، بالإضافة إلى أنهم يشعرون بالرضا العام عن أنفسهم بسبب تقديمهم الرعاية لهذه الحيوانات"

25 - بطل تبص وراك : اللي حصل حصل .. و اللي حصل امبارح مش لازم يحصل انهاردة ! آه ممكن تحصل حاجة مختلفة .. و مش اللي عشته في طفولتك .. هيعيشه عيالك .. هي وقفت عندك .. سامعني؟ سمعاني ؟ وقفت عندك انت المرض/ التجربة الوحشة أي حاجة سلبية حصلت وقفت عند ك و مش حتتكرر .. ألا لو ظنيت كده .. (راجع نقطة رقم 4)
26 – كل مكسرات ..بس متحفش عشان حتتخن و حتبقي حزين و تخين ! المكسرات من الدهون المفيدة لو كلت كبشة يوميا هي بتساعد علي الإسترخاء و بتخليك تشعر بسعادة و لو كبشة يوميا مش حتخا بالكعس سناك مفيد و بيساعد علي الحرق.

27 – سافر ! لو معرفتش و مكنش سهل .. خد Day use في حتة! اتجنن و خد قطر و روح اسكندرية صد رد ! أنت محتاج ده .. و في اليوم ده ممكن تقفل موبايلك ..و لو هتاخد حد معاك خد حد بتحبه و قضوا وقت بعيد عن التليفونات.
28 – اشرب مية كتير ! نقص المية في جسمك ممكن يخلي مودك مش حلو و متقلب .
29 – فكر كل ويك اند في حاجة جديدة تعملها - مكان جديد تروحه – مطعم جديد تجربه .. دايما خلي عندك حاجة تستناها بحماس .. حاجة عارف إنك حتتبسط لما تعملها .
30 – الصدقة . في حاجة جربتها شخصيا و مش هجيب ايات أو أحاديث عنها دور أنت لو حبيت .. انا كل ما أكون مفلسة .. اتصدق ..ربنا يبعت فلوس أو يخليني ادفع اقل في حاجات كان ممكن ادفع فيها أكتر..حتلاقي ربنا لازم بيديك حاجة في المقابل .. لدرجه ساعات حتقوله طب بص مش عايز فلوس بس كان فيه دعوة كده من الاسبوع اللي فات استجيب دي و مترجعش فلوس ! و علي فكرة الفلوس اللي بترجع دايما أكتر ..

عندك 30 فكرة تجربوهم كلهم في يوم واحد .. تعملوا كل يوم واحدة .. ده كتالوج لما تحس إنك محتاس و عملت اللي عليك و مفيش حاجة في ايدك .. ده وقت انتظار ايد ربنا في مشكلتك .. اعمل أي حاجة من كل الأفكار دي .. عشان هو مش عايزك تفضل مكانك .. هو عايزك واثق فيه و فرحان و بثقة عارف انه حينجيك من أي مشكلة . بس اعمل اللي عليك !
هشتك يلا .. العب يلا .. فرفش يلا