عايز تسيب إيه في 2017 وتخلي إيه في 2018؟

كلنا وصلنا بالسلامة لآخر أسبوع في 2017، السنة دي حصل فيها حاجات حلوة مكناش نتوقعها وأكيد برضه أحداث مضطربة، وفوضى وقرارات معرفناش ناخدها ووجع قلب، كلنا عايزين نقول باي باي 2017 وأهلا 2018 وكلنا عندنا حماس الأطفال لغموض سنة جديدة مخبيالنا حاجات لسه منعرفهاش.

كتير منا بيحب كل سنة يجيب notebook ملونة وشكلها حلو ويكتب فيها أمانيه والحاجات اللي نفسه يحققها في السنة الجديدة، أنا كل سنة بعمل كده، واللي مبيعملش كده، طلع الطفل اللي جواك، وحياة ربنا هتلاقيه، دور كويس، وإنت بتدور بقى عندي ليك 10 أسئلة، خد وقتك وجاوبهم قبل ما آخر أسبوع في 2017 يخلص، وعلى فكرة هما مش سهلين، أنا لحد دلوقتي جاوبت على نصهم عشان كل إجابة من دول هتحدد دوافعك من جوه، من جوه خالص مالص.


إذا أردت أن تفعل شيئا ستبحث بكل تأكيد عن الطريقة المناسبة ، أما إذا لم ترد فعله فستبحث عن عذر ...  ! "جيم روهان"
الأسئلة:
1- إيه الحاجة اللي بتكون مبسوط وإنت بتعملها لدرجة إن ممكن الوقت يعدي من غير ما تحس به؟

Hint:
حاجة بتستمع وإنت بتعملها ومبتاخدش عليها فلوس أو أي مقابل، دماغك وقفت؟ طب وانت صغير كنت بتحب تعمل إيه؟

2- إيه الهدف من حياتك؟ عايش عشان إيه؟ إيه اللي انت عايزه فعلا من حياتك؟ وليه؟

Hint:
عندك أحلام إيه وأمنيات فاكر إنها بعيدة بس مصدق إنها ممكن تحصلك في حياتك وتكون سعيد.

3- إيه الحاجة اللي بتحلم تعملها في يوم من الأيام؟

Hint:
أي حاجة في إيدك ومأجلها عشان فاكر هتفشل.

4- إيه الحاجة اللي لو ضامن 100% إنك هتنجح فيها كنت هتعملها؟

Hint:
يعني تخيل مثلا إن مفيش عوائق مادية أو وقت، كنت هتحب تعمل إيه في حياتك؟

5- مين الحد اللي تعرفه أو تسمع عنه بيعمل الحاجة دي اللي نفسك تعملها وتنجح فيها؟

Hint:
فكر في حد بتحب ـتبص على صوره وحياته وبتقول في نفسك ياااه لو عندي نفس الحياة دي، أو بتسأل نفسك هل ممكن أعيش زيهم في يوم من الأيام؟ حدد الأشخاص أو شخص واحد بس.

6- هل البيئة اللي انت عايش فيها مساعداك تكون أحسن واحد ممكن تكونه؟ هل بتخرج أحسن ما فيك ولا العكس؟ ولو العكس، عملت أي حاجة قبل كده عشان تحسن الوضع اللي انت فيه ده؟

Hint:
محدش بيختار أهله ومحدش بيختار صحابه بس عندنا الاختيار دايما في حياتنا إحنا وعندنا لوحدنا القرار نوقف وضع اتفرض علينا بطريقة تفكيرنا في حياة جديدة غير اللي الظروف فرضتها علينا.

7- هو انت تستحق تعيش سعيد؟ إنت شايف ومؤمن إنك شخص يستاهل السعادة؟

Hint:
بتجلد ذاتك كتير وبتنسى تسامح نفسك وتديها فرصة تانية؟ بتزعل من حاجة بتحصلك كل شوية؟ لو آه.. عملت ايه عشان تبقى سعيد وتغير اللي بيزعلك؟

8- إيه أكتر المشاكل بتواجه العالم دلوقتي من وجهه نظرك؟ ولو اتحلت الناس هتبقى حياتها أحسن وسعيدة؟

Hint:
السؤال ده ممكن تلاقي نفسك بتجاوبه من منظورك للحياة ويكشفلك سبب تعاستك في اتجاه معين في حياتك.

9- لو عرفت إن حياتك هتنتهي في خلال أسبوع واحد.. هتعمل إيه؟ وهتندم إنك معملتش إيه؟

Hint:
محدش فينا ضامن النفس اللي جاي خلال خمس دقايق، هو انت ضامن نفسك وحياتك والناس اللي في حياتك أوي كده ليه؟

10 - لو فكرت في المستقبل.. عندك استعداد تطلع أحسن ما فيك وتخرج أحسن إنسان جواك؟

Hint:
إنت أصلا عندك الاستعداد والنية؟

هات ورقة وقلم، وإقرا سؤال سؤال بالراحة وشخبط كتير، اكتب كل اللي ييجي في بالك، كل الأسئلة اللي جواك انت، كل اعتراض، كل لمبة جواك نورت، حتى كل موقف افتكرته وانت بتجاوب، اكتب إنت حاسس بإيه، مش لازم تجاوب بنظام، مفيش قواعد، بس اكتب، عشان هتتفاجئ من اللي كتبته في الآخر.

ها حسيت إنك مش عارفك ولا لسه؟ كتير مننا مش متعود يفكر أو يخطط لحياته، ممكن تلاقي سؤال ضايقك، أو فيه سؤال مفكرتش فيه قبل كده، أنا عارفه اللخبطة اللي جواك، أنا زيك، بس مش عيزاك تقلق، الإجابة هتيجي لوحدها لما من جواك تقرر تجاوبها فعلا.

لما رحت لكذا life coach أول حاجة كل واحد فيهم قالهالي: "إنتي مسئولة عن حياتك 100%، كنت بقولهم يعني إيه الكلام ده؟؟"، كانت إجابتهم ماشاء الله نموذجية بس حقيقية جدا جدا.

"أي تعاسة أو شعور أو نتيجة سلبية وصلتي ليها في حياتك في أي يوم هي عبارة عن حدث معين وتعاملي أنا مع الحدث ده أو طريقة تفكيري ورد فعلي تجاهه هو اللي مخليني تعيسة".

يعني مثلا شخص شرير في حياتي وبيعاملني وحش، معناه أنا اخترت اتعامل باستسلام وسلبية لاستغلاله وشره، لو بقيت عايزة أغير التعاسة اللي أنا حساها من الشخص ده عندي حلين ملهمش تالت:
يا هفضل ألوم في الشخص ده أو الحدث ده وطبعا اللوم مش بيغير حاجة! يا اما هحاول أغير رد فعلي وأقرر إن من هنا ورايح مش هستسلم لأي استغلال عشان موصلش للنتيجة التعيسة دي تاني!

المشكلة بقى إن إحنا دايما بنختار الحل الأسهل، الحل الأول بنلوم على الحدث أو الشخص نفسه، لأننا للأسف اتربينا على ثقافة اللوم، أو ثقافة الضحية! كلنا ضحايا لحد أو لحاجة، ظروفنا بقى، أهلنا، جوازنا، البلد، الشغل، لازم شماعة نعلق عليها تقصيرنا في حق نفسنا وسعادتنا، عشان ميبقاش كلام إنشاء وحقيقي، ساعات ظروفنا اللي بنتحط فيها مهمة فعلا وممكن تعطل الواحد من إنه يوصل لهدفه بسهوله ويبقى سعيد بس مينفعش نقف كتير بسبب الظروف، بنحاول نغيرها، أنا وانت بنحاول كل يوم، جايز بس مينفعش نعتمد اعتماد كلي على الظروف عشان ننبسط أو ننجح في حياتنا.

يعني مش هتعرف تتحكم في ظروف حصلت زي إن جوازك فشل، أو زي إن أهلك منفصلين، أو زي أنك اتولدت فقير، بس ممكن تتحكم في حاجات تانية كتير، أفكارك وتصرفاتك، الحياة أصلا عبارة عن اختيارات وانت لازم تبدأ تبقى مسئول عن اختيارتك.

لازم تقتنع قبل أي خطوة أي كان إيه اللي حصل في حياتك قبل كده ومين ظالم ومين مظلوم ومين جاني ومين ضحية، اللي حصل حصل خلاص، حتى لو لسه بتعاني من أثره عليك دلوقتي، عشان الأكيد الأكيد الأكيد (3 أكيد) إن اللي جاي قدام انت بس اللي مسئول عنه، ومسئول عنه يعني مينفعش تكمل الباقي من حياتك مجرد ضحية للظروف اللي بتتحط فيها وتفضل تلوم وتشتكي، أنت الفاعل في حياتك مش المفعول به.

مفيش قواعد، القواعد اتعملت أصلا عشان نكسرها، إنت الاستثناء في حدوتك، إنت مش زي ميشو ولا إنتي زي سوسو، انت وإنتي نفسك وبس، دور على طريقة بنفسك تتحكم فيها في أفكارك وتصرفاتك وأول خطوة تبطل تلوم وتشتكي الظروف وتسيب أي شماعة موقفة حياتك، إنت بس المسئول عن حياتك.

يعني أعمل إيه؟ اااااااعمل الصح (الإفيه حكم.. آسفة والله)
ابدأ أسأل نفسك إيه اللي بعمله غلط وممكن أصلحه في حياتي؟ إيه محتاج أزوده في حياتي وإيه محتاج أبطله؟ براحة على نفسك وقرر النهارده تتحمل 10% زيادة مسئولية تجاه حياتك، إيه القرار اللي هتاخده مهما كان بسيط؟

آخر HINT: عايز تخس؟ هتبدأ تروح الجيم عايز تبدأ تقرا؟ هتقرا 5 صفحات كل يوم من كتاب اشتريته وراكنه.

بلاش تخش السنة الجديدة وانت زي ما انت محلك سر، لو فضلت تلوم وتشتكي وبس مستني الظروف (اللي هي أصلا مش بإيدك)، هي اللي هتتغير عشان تبقى سعيد، يبقى بتعجز نفسك وبتحكم عليها تفضل طول عمرها بتلعب دور الضحية في الفيلم.

ولو ظروفك مرتبطة بشخص ممكن تديه فرصة، سامحه، بس كل واحد لازم يقابل التاني وهو حر من غير شماعات من الظروف أو المواقف وابتدوا من الأول على نضافة، مش هتعرف تجامل في حاجات وجعاك من الشخص اللي واجعك بس لو الطرف التاني قرر يوقف كل اللي بيوجعك ويعمل الصح، سامح وادي لنفسك وله فرصة.

"اختزان الغضب يشبه القبض على جمرة بنية إلقائها على شخص آخر، لأنك أنت الشخص الذي يكتوي بها أولا".

2017 مش لازم تبقى هي هي 2018، إنت المسئول الوحيد عن حياتك، الشماعة تقلت، ارميها وادخل برجلك اليمين على 2018 وانت خفيف.