حاجات تجربها في 2018

أول يوم في السنة.. وأول يوم في كل توقعاتك وأحلامك وأهدافك وكل حاجة نفسك تحققها وإحساس جواك بيقولك تبدأ تشتغل على اللي نفسك تحققه في السنة الجديدة ..

بس فيه وقت بيعدي عليك وعندك مليون حاجة نفسك تعملها بس مش رايق .. مش في الموود أو بتحاول تهرب من فكرة في دماغك فمخلياك مشتت ..

النهارده مفيش مقالة ولا نظريات ولا أي كلام مكلكع .. المرة دي جمعت LIST للحاجات اللي بتظبط الموود واللي ممكن نبتدي نعمل كل يوم حاجة منها واللي يبسطنا اوي نعيده في أي يوم نحبه .. يلا جوود موود ON

1 – نام بدري
2- اصحي بدري
3- اعمل رياضة الصبح
4- اختار تعمل أو تجرب حاجة جديدة كل شهر
5- اعمل صفحة امتنان يوميا

(Gratitude journal أو صفحة الامتنان هي حاجة بسيطة جدا كل يوم اختار 10 نعم في حياتك واشكر ربنا عليها .. ممكن تبقي حاجة عندك أو حاجة حلوة حصلتلك في نفس اليوم ..المهم إنك تفتكر النعمة دي وتفرح بيها وتشكر ربنا عليها .. ودي حاجة فعلا بتظبط النفسية وبتعمل shift اتوماتيكي من غير ما تحس من تفكير في مشاكل لتفكير في حاجات حلوة عندك وربنا كمان بيزيدك لما تشكره .. فدبل كيك).

6- وقف عادة وحشة (أي حاجة)
مثال : لو بتشرب علبتين سجاير .. قلل وخليها علبة فأقل فأقل.. لحد ما توقف .

7- قلل فرجة علي أخبار وكل نشرات الأخبار في العموم.
8- اقرا أكتر.

9- متقارنش نفسك بحد.

10 - روح مكان جديد عمرك ما رحته قبل كده حتي لو كان كافيه .

11- قول للناس اللي بتحبهم إنك بتحبهم .. اتعود تقول بحبك لما تحسها ! مفيش حد مبيحبش يسمعها.

12- روح العب ألعاب زي الـ  Rooms و اللعب اللي بقت موجودة للكبار و PlayStation طبعا. 

13 – روح السينما كتير حتي لو لوحدك .

14 – كل فطار بتحبه .

15- اعمل قهوة علي الكنكة (لمحبي القهوة)

16 – ارقص – ارقصي (بيطلع أي طاقة سلبية وكمان بيخلي المود رااااايق)

17 – جرب تعمل مسااااااج مرة كل شهر أو أنت ومقدرتك .

18- اعملوا تنضيف بشرة (رجالة وستات والله ( حضرتك البشرة دي بتتنفس وبتاكل وبتشرب ونفسها تقولك كلام كتيير .. كل شهر بالكتير اعملوا ده حتلاقوا احساس كده إن البشرة بتتنفس وشكلكم أحلي وبيلمع من الحلاوة.

19 – كلوا شوكولاتة وحاجات حلوة ! أحيانا جسمك فعلا بيحتاج حاجة حلوة بلاش الحرمان ولا الطفاسة.. فرحوا نفسكم عادي !

20 - للمتجوزين / المخطوبين / فيه علاقة لذيذة من أي نوع اخرجوا خروجة حلوة A Date حيخليكم تحسوا بنعمة وجودكم في حياة بعض وحيقربكم أكتر وحتبقوا فعلا مبسوطين انكم لقيتوا بعض ومع بعض!

21 – اعملوا Movie Nights في البيت واطلبوا order بتحبوه.

22- هاتوا أي حاجة جديدة تتلبس كل شهر مهما كانت بسيطة .. الهدوم الجديدة بيبقي فيها طاقة حلوة !

23 – العبوا مع اطفال ! لو مفيش ؟ روح ملجأ والعب وهزر معاهم .. جرب تروح مرة هتفرحهم وهتفرح انت والله!

24 – هاتوا طرق أكل بتحبوها وعكوا واطبخوا مع حد بتحبوه.

25- اعمل قرعة ! اكتب حاجات بتحب تعملها وحمس نفسك إن اللي حيطعلك في الورقة اللي هتختارها عشوائي حتكافئ نفسك بيها لما تنجز حاجة بتأجلها!

26 – اشتري هدايا من غير سبب وفرح حد بتحبه أو حتي حد هيفرح بحاجة أنت عارف انه هيفرح بيها. 

27 - كل آيس كريم وانت سقعان. 

28 – اشرب شاي وانت في الشارع (ممكن كافيه outdoor مش عيب).

29 – خد شاور دافئ قبل النوم والبس بيجاما بتحبها. 

30 – جيب ملح ولافندر واملأ البانيو ميه دافية و RELAAAAAAX (حتلاقيه عند العطار أو من أي مكان بيبيع منتجات طبيعية). 

ابدأ جرب أي حاجة تعجبك هنا .. وكل الطرق متجربة ومضمونة.
هاااااابي نيووووووو ييييييييييير