فاترينة إزاز

هتعمل إيه لو شفت كلاكيعك وكلاكيع الناس اللي حواليك من بره.. من فاترينة إزاز؟

لما بنقول كلمة كلاكيع جوانا أو جوه ناس نعرفهم، أول حاجة بتيجي في بالك إيه؟ العلاقات؟ ولا علاقة أهلك بيك؟ (أبوك وأمك) اللي هي أول علاقة شافتها عينك! ولا علاقتك اللي فيها كلاكيع؟ ولا اللي ناس بيطلعوه عليك من كلاكيع في شكل نصايح لكلاكيعك؟

تعالوا نفك كلكوعة كلكوعة من ورا فاترينة إزاز، يعني من بعيد، يا حتلاقي حاجة شبه كلكوعة عندك يا حتشاورلك على طريقة لفك كلكوعة عندك، أو حتشاورلك على كلكوعة تانيه مكنتش واخد بالك منها، إقرا على مسئوليتك الشخصية!

الندم: الندم هو أول حاجة بتخبط في وشك وأول حاجة بتسمعها في نصيحة "هتندمي لو عملتي كذا، هتندم لو قلت كذا"، آه وأروعهم "كل المتجوزين ندمانين"، وفي نفس الوقت حتسمع: كل العزاب هتموت وتتجوز! عندي واحدة صاحبتي هددت أهلها بالانتحار وإنها حترمي نفسها من البلكونة لو متجوزتش حبيبها اللي كان أهلها رافضينه، دلوقتي هي ندمانة وعايشة على سور البلكونة ودايرة النصايح اللي كانت بتسمعها بأنها تسمع كلام أهلها وتسيب الشخص ده لأنه مش مناسب بقت: "اصبري! تعيشي ندمانة وزعلانة و متجوزة أحسن ما تبقي لوحدك وتتجنني ليه محدش بيحبني ليه! ليه محدش بيتجوزني؟"، وده خلاها محلك سر لا هي سعيدة وواخدة اللقب اللي كانت فاكرة إنه سبب فرحتها ولا هي فكرت بخمسة جنيه بعقلها إن الشخص ده مش مناسب وإن عادي ممكن تكون مش متجوزة وسعيدة وممكن تتجوز تاني شخص أنسب وأكيد الـ90 مليون فيهم شخص هيحبها وتحبه وتعيش مبسوطة معاه!

الحرية: فيه ناس بتختار الجواز وسيلة للهروب من أهلها! بتفتكر إنها كده هتكون مستقلة وهتخرج وتروح على مزاجها بس بتنسى إن فيه مسئولية هتكون عندها، مسئولية بيت وأكل وغسيل وتنضيف وعيال وعادي حيكون فيه أسئلة رايحة وجاية منين! الحرية لو متفهمتش على إنها حرية الأفكار وإنها تصدق إنها حرة حتى لو تحت ظروف معينة مع أهلها حتتأكد انتقالها لبيت تاني بحثا عن الحرية مش حتلاقيه عشان جواها هي عقلية "المسجون"!

الجنس: بيبقى فيه FANTASIS وخيالات عند الاتنين أول ما بيتجوزوا، توقعات ممكن متحصلش فتتسبب في خيبة! أو هاجس خوف للرجالة وللستات وآه الرجالة حتى لو عندهم تجارب بيكونوا خايفين ميكونوش مبهرين! أما الست، فيه اللي بتتكسف وفيه اللي بتخاف يزهق من كسوفها وفيه اللي عندها ثقافة وبتخاف تقول لا يقول عليها صايعة والاتنين بيخرجوا بره أهم حاجة، "الكيميا" وهي دي كل حاجة، يا موجودة يا مفقودة مفيش في النص!

الجنس المشوه: الست لما بتمثل إنها مبسوطة التمثيل ده بيتحول لغضب واحتياج مش عارفه تشبعه، لما بتعمل كده نقلا عن تجارب سمعتها ودراسات، فيه حتة جواها بتموت وبيموت بينهم الشغف، الصدق في المشاعر والاحتياج هو الكيميا، وهو اللي بيخلي الست تحس إنها ست والراجل إنه راجل قادر يبسطها!

الأكل والجنس: دول أهم هدفين عند الراجل من الجواز، مينفعش تتجاهلي أي منهم ولا بقولك تخليهم محور حياتك بس تفهمي أهميتهم وتفهمي إنه عادي توصلي لمرحلة الروتين وحناكل إيه النهارده؟ وممكن تسمعي الإجابة اللي هتعصبك أي حاجة! وممكن تاخديها عادي واعملي فعلا أي حاجة من الموجود! وعادي اطلب دليفري أو خدها ON A DATE هتاكل أكل حلو وحتبقى عملتلها حاجة حلوة وبسطها وحتنبسط من انبساطها!

الحمل: مفيش حاجه جاية في الطريق؟ طب الحاجه جت! طب إيه مش هتخاويه؟ حتلاقي مجتمع زنان محشور في بطنك! طول الوقت بيزقوكي لغريزة الأمومة زق بدون أي أدنى إحساس بأهمية إنك الوحيدة اللي هتحمل وتولد وترضع وتضحي، عشان كده متسمعيش كلام أي حد في دنيا! متحمليش غير وإنتي عايزة ومستعدة تبقي أم والراجل كمان لازم يكون عايز ومستعد ماديا ونفسيا لده.

العيال: هما السبب اللي حتلاقي نفسك بتعيشي عشانه وحتة منك ماشية على الأرض فيها مرمطة بس لما تحصل مش حتندمي إلا لو سمعتي الكلام الناس الزنانين اللي هما نفسهم مش حيقدروا يتحملوا زن عيل من عيالك ساعة واحدة! (ده بالنسبة للستات للرجالة المسئولية المادية والمعنوية لو مش مستعد ليها الطفل حيبقى نصه حلو والتاني خنقة مسئولية وده حيوصل لخلافات كتير وسببها الأول نفسي).

الطلاق: مع كل أزمة بين اتنين متجوزين بيشوفوه "المنقذ"، مينفعش مع كل مطب يبقى هو ده الحل الأوحد وخصوصا لو فيه أطفال، بس لو الأطفال هيعيشوا معاكم ضغط ونكد وجو غير صحي يبقى ده المنقذ لنفسيتهم قبل نفسيتكم إنتم، وفي حالة عدم وجود أطفال نفسيتكم رقم واحد الروح بتموت مع الشخص الغلط، اللمعة اللي في عينكم بتبهت فمتضيعوش يوم واحد مع حد مش شايف قيمتكم ومقدرها.

الطموح: ناس كتير بتتدعي إن الجواز والطموح دونت ميكس وده أكبر غلط! لما بتخلي دنيتك راجل والراجل بينشغل في شغله بتلاقي نفسك فاضية قلبا وقالبا ومفيش هدف، فيه كتير ستات اختارت تكرس حياتها لجوزها وعيالها وده مش تقليل منهم بس مع الوقت العيال بتكبر والمسئولية بتقل وكله بينشغل والست حتلاقي نفسها مش فاكرة هي بتحب إيه وبتعمل إيه وبتبدأ مرحلة البحث عن الذات متأخر أوي، نماذج كتير في حياتي عملت كده وبيقولوا حاجة واحدة "ياريتني ما نسيت نفسي وأحلامي".
 
المسئولية: غلطة عمرك إنك تشيلي مسئولية البيت لوحدك والعيال وأبوهم وتعملي عشر رجالة في بعض، الزوج مش ضيف في حدوتك، هو شريك حياتك، هـاتككككك على شرييييك متحسيش بوحدة وهو معاكي عشان ضهرك في الآخر حيتقطم، شريك حياة معناها إنتوا الاتنين سند لبعض.

الأهل: أكتر ناس بيخافوا عليكي بس أكتر ناس برضه حيزنوا عشان تتجوزي وتخلفي وتعملي حاجات إنتي مش عيزاها، افهمي المغزى وهو حب وخوف عليكي بس إوعي تاخدي قرار مزقوق ولما تتجوزي متدخليش حد بينكم، النفوس بتشيل، اللي إنتي ممكن تعديه ممكن هما يوصلوه لطلاق!

الخنقة: في الجواز بلاقي اللي اعرفهم من الطرفين راجل وست مخنوقين، زي ما أنتي مخنوقة هو كمان مخنوق من خنقتك، حتى لو انتي زوجة COOL هو مخنوق من مسئولية الجواز المادية والمعنوية ودي كانت شكوى من أغلبية الرجالة المتجوزين، واحدة صاحبتي سبب طلاقها إنها معرفتش تبقى صاحبة جوزها! هتيجي إمتى؟ اتأخرت ليه؟ مبتردش ليه؟ كنت فين؟ طريقتها في السؤال يوميا مكنتش في نطاق إنها صاحبته ولا حتى مراته كانت في نطاق ظابط وطبعا المسجون.. هرب!

الخلافات: القرب بيكشف العيوب ولما بتكتر المسئوليات بيكبر الصراع وكل واحد بيدافع عن وجه نظره في الحياة والبيت وتربية العيال وده بيوصل لمرحلة الزهق.

مرحلة الزهق: بتبقى المرحلة الصادمة من الحميمية المطلقة والاتنين منبهرين ببعض وبينهم اشتياق وونس في أول مرحلة للجواز لخلافات تافهة لو مفهمتيش إنها تافهة وعديتيها حتخلقي مرحلة الوحش! نص صحابي ما شاء الله رجالة وستات مطلقين ولقيت إن السبب المتفق عليه بالإجماع إن الراجل مش عايز بعد الجواز حد يخنقه، وده اللي حيرجعني أقولك طموحك طموحك طموحك، اعملي لنفسك حياة واهتمامات ومتبقيش نكدية واحدة واحدة حد فيكم بيتنازل عشان متهزقوش وتموتوا كل حاجة جميلة بينكم، صاحبوا بعض! تخيلي نفسك عايشه مع أنتيمك الـBESTFRIEND وده حيلطف الدنيا بينكم وحيخلي الدنيا أسهل والكلام ده منقول من ناس ندمت إنها معرفتش تعيش حلاوة الصحوبية في الجواز.

الحب الحقيقي بين الحقيقة والخيال: هو مش خيال، هو حقيقي بالرغم من كل البلاوي اللي بتسمعوها من المتجوزين، مرحلة الحميمية ممكن يتعملها إنعاش مستمر وده بيحصل في حالة واحدة بس، لما كل واحد بيعترف بأهمية التاني وبـيتقبله وبيتأقلم مع عيوبه.

أيوه، فيه حب حقيقي بيدوم لآخر العمر، كل وجع الدماغ ده فيه حاجة حلوةا سمها "الونس" يعني حد تلاقيه يشاركك لحظات السعادة والحزن،
عيالك في عيد الأم وفي عيد الأب حيرسمولك كارت ويحوشوا من مصروفهم ويجيبولك هدية.

مسكة إيد مراتك في المستشفي وانت تعبان وبتقولك أنا بحبك، كل دي لحظات بتستثمروا فيها تعب الأيام.

أي لحظة حلوة بتمنحوها حتلف تلف وترجعلك أضعاف ولو مش حاسس بأي سعادة أمشي وأعرف إن كل يوم بيروح منك بتدفع تمنه النفسي والجسدي من روحك.

دي شوية كلاكيع من فاترينة المتجوزين والمطلقين، فيها خلاصة كلاكيع كتير جدا ممكن تكون بتحصلك أو خايف تحصلك أو حصلتلك وخايف تحصلك تاني، دايرة الكلاكيع موجودة ومش هتروح حتة! معاك فين ما تروح بس الكرة في ملعبك يا تغير طريقتك وتلعبها صح وتتعلم من الكلاكيع اللي فاتت يا تفضل ورا الفاترينة الإزاز بتتفرج وعمرك بيروح وإنت مستني تلعب بس متردد وفي الآخر الماتش حيخلص وتبقى ضيعت فرصتك تلعب وتضيع على نفسك متعة الأهداف اللي حتخلي لحياتك طعم حلو غير المر اللي دقته أو سمعت عنه.