الابتلاء مش حب

كل ما كان بتحصلي حاجة وحشة أوي .. ألاقي اللي حواليا بيواسوني ويقولولي معلش ربنا عشان بيحبك بيبتليكي عشان يشوف حتصبري وتفقدي ايمانك في رحمته ولا مش حتشوفي غير رحمته جوه المحنة ..
 
كنت بتجنن !! يعني ربنا عشان بيحبني هيعمل حاجة تؤذي مشاعري وتخليني زعلانة ؟ مش ربنا ده حنين؟؟ وبقلب طفلة أروح أكلمه وأسأله.. أنت يارب مش بتحبني ؟ لو بتحبني أنا مش قادرة وأنا عارفة إنك مش حتديني حاجة أنا مش قدها .. أنا مش فاهمة حاجة يارب .. بس عارفة إنك أنت اللي عارف وفاهم …

مين زرع في دماغ الناس ان الغني لازم يكون مبتلى او هيموت على حاجة في إيد الفقير ؟ أو ان ربنا مبيديش كل حاجة ؟ أو إنك لما تدعي ربنا بحاجات تصيب في حاجات وهتبظ منك في حاجات لأن ربنا مبيديش كل حاجة ؟! مش هو اللي قال ( ادْعُونِي أَسْتَجِبْ لَكُمْ )

مقالش شروط .. مقالش حاجات وحاجات .. مقالش حاجات كبيرة وحاجات صغيرة .. مين أقنعهم ان رب العالمين بندعيه مساومة ؟! "يارب خدني وخليه يعيش"، مين فهمهم ان ربنا بيحب الفقرا وان الغني دا حسابه عسير ؟

حتلاقي واحد يسألك ..هو لو ربنا بيحب الفقرا كان هيفقرهم لِيه ؟

هو انت لما تحصلك حادثة وبعد كده تخسر فلوسك وتقوم تلاقي بيتك اتحرق يبقى كده ربنا بيحبك فبيبتليك علشان يختبرك ؟

ليه ميجيش في بالك مثلا ان ده ممكن يكون نتيجة الاختبار.. مثلا يعني ؟
او انك ماشي غلط ومحتاج تعدل حياتك وأفكارك ؟

بذمتك دي طريقة تفكير واحد مؤمن ان ربه كريم ورحيم ورزاق ؟
ولا طريقة تفكير ان ربه ايده مغلولة وبيحاول يبرر كده بمليون مبرر ؟
يا جماعة مين حط الأفكار دي جوانا وخلانا نصدقها ؟؟

اليهود قالوا ان يد الله مغلولة ، ربنا لعنهم وقال "بل يداه مبسوطتان"

ربنا قال عن نفسه ان يديه مبسوطتان...

"وَقَالَتِ الْيَهُودُ يَدُ اللَّهِ مَغْلُولَةٌ ۚ غُلَّتْ أَيْدِيهِمْ وَلُعِنُوا بِمَا قَالُوا ۘ بَلْ يَدَاهُ مَبْسُوطَتَانِ يُنفِقُ كَيْفَ يَشَاءُ ۚ"

قال عن رحمته :

"قُلْ يَا عِبَادِيَ الَّذِينَ أَسْرَفُوا عَلَى أَنْفُسِهِمْ لَا تَقْنَطُوا مِنْ رَحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ".

قال عن رزقه :

"اللَّهُ يَبْسُطُ الرِّزْقَ لِمَنْ يَشَاءُ مِنْ عِبَادِهِ وَيَقْدِرُ لَهُ"

ارتقوا في طريقة تواصلكم وفهمكم لله وحكمته ، التبرير ان الأنبياء مبتلون هيخليني اقولك انك مش نبي ، الرضى قصة تانية .

أنا مش منطقية في دعواتي ، ولا حكون منطقية .. رحمة ربنا فوق أي حاجة ممكن تحصلي و تحصلك ووراها رسالة .. افهم الرسالة عشان هو مش حيسيبك غير لما تفهمها .. وهو ده الحب .. وهو ده المنع اللي جواه عطاء..