الصندوق الأسود بتاعك

كل واحد فينا وراه حدوتة فيه أجزاء منها دافنها وكأنها لم تكن وفيه أجزاء عايش بيها مهما عدت أيام وسنين لازم هيحكيها ويتباهى بيها..

الجزء المدفون ده بيكون حاجتين.. يا حاجة بتوجع قوي فلازم تتنسي وتتدفن عشان تبدأ حدوتك على نضافة يا جزء منسي من وأنت صغير بس لو افتكرته هيوجع فبتنساه وبتكمل عشان متخليش تفصيلة في طفولتك تأثر علي حاضرك اللي أنت دلوقتي عايشه ..

الصندوق الأسود بتاعنا علي قد ما هو مرعب و ضلمة بس لو وقفت قصاده حتلاقيه مش بيخوف خالص .. حتلاقيه فاضي ..الجزء اللي بيوجع عدى وأنت دلوقتي قادر تكمل بيه.

الصندوق ده مليان اختيارات .. اختيار واحد ورا التاني .. بكل الاشكال والاحجام.. صح أو غلط مش مهم
عشان كله بيعدي وعدى خلاص .

دايما لما بنقابل حد جديد بنفكر مليون مرة في الصندوق ده .. واللي قدامنا لو قلنا بصراحة اللي جوانا الطرف التاني حيتقبله ؟

حيسامح ؟
حيشوفك زي الأول؟
قبح الماضي ممكن يغير رأيه فيك؟

كلنا بنفكر ايه اللي حنقوله وايه اللي بنفكر مليون مرة نخبيه وإيه عواقب إنك تكون صريح أو بمعني اوضح..عريان بمشاعرك و كل تفاصيلك ..

بنقسى على نفسنا كتير وبننسي اننا بشر .. وخير البشر التوابين .. اللي بيغلطوا وبيتعلموا وبيتوبوا ويغلطوا تاني .. ما إحنا بشر ..

افتكر إن حدوتك بتاعتك ..هي جزء منك لا يتجزأ مهما حاولت .. غلطك عمره ما يعيبك .. ماتقساش على نفسك وحبها .. هيقولي.. سامح غلطك عشان أنت منه اتعلمت واتشكل جواك ملامح قوة حتفضل جواك وعمرها ما هتضعف .

متخافش من حدوتك مهما كنت شايفها وحشة .. اللي بيحبك هيحبك بعيوبك وبوحشك قبل حلوك .. واللي مش شايف غير عيوبك ميستاهلش لحظة من حلوك . أنت غالي اوي اوي.. ومهما كان قبح الجزء المستخبي حيفضل جزء منك .. لو غلط غلطته و ندمت عليها ..فهو غيرك من جوه وخلاك أحسن واقوي وقادر تعمل حاجة معرفتش تعملها زمان .. حاجة تقدر تعملها صح !

ولو فيه يوم اتجرحت اوي واتوجعت..في الاخر حتلاقي نفسك اتعلمت واقتنعت بالتجربة إن مفيش حد بيموت من الحب وإنك قادر تعيش وتحب تاني وتشوف حاجات حلوة كنت فاكر ان آخرها الشخص ده.