الإشراف العام
إلهام أبو الفتح
رئيس التحرير
أحمــد صبـري
الإشراف العام
إلهام أبو الفتح
رئيس التحرير
أحمــد صبـري

عمرو عادل يكتب: سر اليوتيوب.. 18 ثانية في حديقة الحيوان

صدى البلد

يوتيوب هو موقع الفيديوهات الشهير والغنى عن التعريف ويعتبر واحد من أقوى المواقع المتواجدة على الشبكة العنكبوتيه وانا بشكل شخصى بعتبره واحد من الفرسان الاربعة " يوتيوب والفيس بوك وتويتر وجوجل " واللى بيتربعوا على عرش الويب 2 او الجيل التانى للانترنت لان تقديرى ان المواقع دى لو دخلت على واحد منها ممكن تقضى يومك بالكامل عليها من غير ما تفكر انك تروح لمواقع تانيه ودا نتيجة لطبيعة محتوياتها اللى ممكن تجذب أى زائر ليها.

طيب ايه تاريخ الموقع دا ؟ .. وإزاى قدر يوصل للمكانة اللى هو فيها دلوقتى ووصل لدرجة رصد شركة جوجل مبلغ 1.65 مليار دولار لشرائه .. تعالوا ناخد نبذة سريعة عنه.

بدأت فكرة الموقع على ايد ثلاث أصدقاء شباب وبيشتغلوا موظفين فى شركة باى بال المالية وهما " ستيف تشين وجاود كريم وتشاد هيرلي " .. تشاد كان بيدرس التصميم اما ستيف وجاود كانوا بيدرسوا علوم الكمبيوتر .. فيه روايتين لسبب نشأة موقع اليوتيوب واحدة على لسان ستيف 
وتشاد انهم كانوا فى حفلة عشاء وصوروها فيديو و كان عندهم صعوبة فى رفع فيديو الحفلة دى ومشاركتها مع الاخرين على الانترنت.. لكن صديقهم جاود بينفى الرواية دى و بيقول ان فكرة الموقع كان سببها حفلة لجانيت جاكسون وحصل فيها حادث ما هو حاول يبحث عن فيديو للحفل دا لكن مكانش متوفر على الانترنت فكان مصدر الهام ليهم انهم يعملوا موقع اليوتيوب للتسهيل على المستخدمين رفع الفيديوهات الخاصه بيهم و مشاركتها مع الاخرين ... وبدأوا بالفعل فى تصميم الموقع و برمجته و قدروا يحصلوا على تمويل من شركات مختلفه بقيمة 19.5 مليون دولار .. ووقع اختيارهم على شقة صغيره كمقر مبدأى للشركة فوق مطعم للبيتزا فى كالفورنيا .. و اختاروا اسم للموقع و هو يوتيوب و دا كان فى فبراير 2005 .. وبدء البث التجريبى عن طريق رفع اول فيديو فى تاريخ اليوتيوب فى ابريل من نفس السنه و كان اسمه " انا فى حديقة الحيوان " وكان فيديو مدته 18 ثانيه مسجل لجاود كريم فى حديقة "سان دييجو" للحيوانات و لازال الفيديو موجود على الموقع لغاية دلوقتى.. و بدء يبقى فيه اقبال بشكل تدريجى على اليوتيوب رغم انه تحت التجريب و تم رفع فيديو تانى دعائى لشركة "نايكى" للملابس الرياضيه و اللى كان فيه لاعب الكرة البرازيلى رونالدينيو ووصلت نسبة مشاهداته لمليون مشاهدة.. دا بدء يلفت انتباه الناس اكتر للموقع دا.. و بدء مصمميه يتنقلوا من مرحلة التجريب لمرحلة الافتتاح الرسمى واللى كان فى 15 ديسمبر 2005 .

الموقع بعد افتتاحه كان بيحقق 8 ملايين مشاهدة فى اليوم و بدء ينمو نمو خرافى مع إقبال الزوار فى الاشتراك عليه و رفع فيديوهاتهم المختلفة 
وبعد سنة واحدة أعلنت الشركة انه بيتم رفع 65 ألف فيديو فى اليوم مع معدل يومى للمشاهدات وصل لـ 100 مليون .. انتوا متخيلين الرقم ؟ .. النجاحات دى دفعت اليوتيوب أنه يطور من نفسه إداريا و تقنيا زى انه اتنقل لمكتب أكبر فى "سان برونو" بكالفورنيا واللى يعتبر المقر الرئيسى الحالى و بدء يخرج من عرض الفيديوهات لتقديم خدمة البث المباشر للأحداث واللى بدأت بتقديم مباريات للكريكيت فى الدورى الهندى فى مارس 2010 و بعدها افسح المجال للقنوات التلفزيونيه على مستوى العالم انها تنشأ عليه حسابات و تقدم خدمة البث المباشر لبرامجها عن طريقه و حفظ كل فيديوهاتها ومحتوياتها المرئيه عليه ولأن زوار اليوتيوب من مختلف دول العالم قرر الموقع انه ينزل بلغات مختلفه تناسب جنسيات زواره و دا عن طريق التعرف على دولة الزائر بالاى بى الخاص بيه فيقدم ليه الموقع بلغة الدوله دى بشكل ألى لتسهيل تصفحه.

يوتيوب مش مجرد موقع لمشاركة الفيديوهات لكن كان كمان بوابه لنقل ناس كتير من عالم الهواه للمحترفين و دا كان عن طريق السماح بعرض فيديوهات خاصه بيهم سواء كوميديه او مقاطع فنيه او حتى مناقشة اراء سياسيه .. دا غير ان ليه افضال كبيرة فى زيادة شهرة اعمال فنيه زى اغنية جانجام ستايل فى 2012 للمغنى الكورى الجنوبى "ساى" و اللى وصلت لاكتر من 3 مليار مشاهدة محققه اعلى نسبة مشاهدات فى تاريخ الموقع الا ان الرقم دا تم تخطيه بكليب جديد اسمه ديسباسيتو فى 2017 و اللى تخطت مشاهداته 5.5 مليار مشاهده .

الموقع بيحط شروط لرفع الفيديوهات عليه .. يمكن البعض شايف انها مجحفه لكن من رأيى ان الشروط دى هى السبب فى المحافظة على نجاحه لغاية دلوقتى .. منها عدم الموافقه على رفع اى فيديو ليه حقوق ملكيه فكريه و دا عشان يحفظ حقوق المالك الاصلى ليه و دا يساعد مستخدميه على الاستمرار فى رفع فيديوهاتهم لان حقوقهم مصانه عليه .. و كمان بيرفض اى فيديوهات اباحيه و دا بيزود الثقه بينه و بين المستخدمين انه موقع أمن للاسره دا غير انه مش بيسمح باى فيديوهات بتروج للعنف و الارهاب.

و يظهر ان كل لما نجاحاته بتزيد لازم تلاقى المشاكل حواليه بتزيد هى كمان لان ادارة اليوتيوب واجهت مجموعه من المشاكل بدأتها بشركات لان كان فيه موقع بنفس الاسم اسمه utube و كان لشركة انتاج مواسير و اضطر صاحبه انه يقاضى الموقع لتشابه الاسماء و انتهى الموضوع بالتراضى بتغيير اسم موقع الشركة لـ utubeonline و بعدها اتنقلت المشاكل من الشركات للدول زى مثلا ازمة حجبه فى البرازيل لمدة 3 ايام بقرار محكمه لعرض الموقع فيديو فاضح لمذيعه برازيليه شهيره اسمها "دانييلا سيكاريللي" و اللى كانت خطيبة لاعب الكرة رونالدو و من البرازيل لايران اللى حجبت الموقع بالكامل لانها بتعتبره موقع لا اخلاقى و فى تايلاند تم حجبه لسبب سياسى و هو عرض افلام بتسئ للملك .. اما السعوديه فبتسمح بمشاهدة الموقع لكن بتمارس سياسة الحجب الانتقائى لاى فيديوهات بيكون محتواها مخصص للبالغين . 

دا ملخص بسيط عن موقع اليوتيوب ولو هنقدر نكون مجموعة من الانطباعات عن تاريخه والأحداث اللى مرت بيه فممكن نلخصها فى مجموعة من النقط. 

- انت لما تزرع بذرة و تهتم بيها اكيد فى يوم هتبقى شجرة ضخمة و دا اللى حصل مع موقع اليوتيوب .. من مجرد فكرة بسيطه لتلات شباب لمؤسسه ضخمه مؤثرة عالميا بيشتغل فيها عدد مهول من الموظفين و اعتقد ان دا مش بيحصل الا بتوفر شرطين اساسيين .. الايمان بالفكرة و الاصرار عليها و كمان الاهتمام بتطويرها.

- اليوتيوب مش مجرد موقع اليكترونى بس لكن سلاح من أسلحة الولايات المتحده لضمان هيمنتها على مستوى العالم فى المجال التكنولوجى .. اى انسان فى العالم بيستخدم الانترنت ميقدرش يستغنى عن الموقع دا و بالتالى ميقدرش يستغنى عن الدوله اللى بتستضيفه و قيس على كدا باقى المواقع التانيه .. ويمكن دا اللى دفع دول زى روسيا و الصين انها تعمل مواقع مشابهه عشان يتحرروا من القيد الامريكى فى المجال دا .

- اخيرا نيجى لسؤال مهم جدا .. هل اليوتيوب هيكون فى يوم من الايام بديل عن الاعلام المرئى؟ .. المؤشرات بتقول احتمال كبير جدا .. لأن معدل الاشتراكات والمشاهدات عليه بتزيد يوم عن التانى دا غير انه بيوفر امكانيات للأفراد انهم يستعرضوا افكارهم و مواهبهم عن طريق الفيديوهات اللى بيقدموها عبر قنواتهم الخاصه .. ومش بس كدا دا بيشجع الناس انها تعمل دا وبمقابل مادى كمان عن طريق اعلانات بتصاحب الفيديوهات و كل لما المحتوى اللى انت بتقدمه يكون قيم كل لما تزيد المشاهدات عليه وتزيد ارباحك.