EN 
مني ابو شنب ورضوى الشربينى سيدتان مختلفتان كليا فى الآراء والنشئة والشخصية، ولهم أراءهم المتباينة حول علاقة الانثى بالرجل وكيفية التعامل مع الطرف الآخر.
السيدة ابو شنب قررت أن الراجل من حقه يدى الست بتاعته بالجزمة والله قالتها لفظيا كدا وان من حقه يتجوز عليها فى اى وقت وشايفة أن نساء مصر معندمهمش اى ميزة مستحقة للتقدير وان الراجل المصرى الست بتاعته مبهدلة حياته وشقيان وتعبان.
وبغض النظر انها بتعترض على فكرة ربنا وهى أن الطبيعى أن الراجل يتعب ويشقى لأهل بيته إلا أن الإحصائيات كلها أثبتت أن اكتر من 40% من العائلات المصرية تعيلها النساء وان النساء هن الأكثر تحملا الآن لمشقة الحياة التى اصبحت مميتة للرجل والمرأة.
السيدة ابو شنب تخرج علينا يوميًا بفيديو تنصح فيه الرجال بالزواج من أخرى فى وقت وزمن وظروف هو اصلا مش قادر يتزوج الأولى.
السيدة المتعلمة معندهاش اى معلومة كم جوازة باظت علشان كم الف جنيه ولا تدرك تماما ..تماما أن أعباء الحياة جعلت شبابنا وبناتنا يصرفوا نظر عن الزواج اصلا كمشروع اجتماعى.
ابو شنب بغض النظر عن لغتها العربية السيئة ومعلوماتها المغلوطة عن الدين وإلقائها لآيات القرآن خطأ وطريقتها السوقية وبتقول انها إعلامية الا أنها تصر بشكل مرعب وعدائى على التحريض ضد المرأة اللى قانونا لو قررت ارفع عليها قضية تحريض اجمع لها كم توكيل يقاضيها فعلا وقانونا اقدر اخليها تسكت خالص لكن انا من الناس اللى بتحب تتفرج كتير وده مؤذى جدا ليا.
الذكور تتزرع فيهم النرجسية من طفولتهم زرعًا.. بيتنفسوها مع الهوا ، انت عندك أم بتربى ابنها إنه ماينفعش يجيب لنفسه كباية ماية.. فما بالك بتنضيف مكانه وأكله واحتياجاته ، وعندك أب بييسمح لابنه يؤمر ويتحكم وأحيانًا يضرب أخته الكبيرة.. ويسهر ويصاحب ويتحرش.. ويتقاله برافو عليك انت كده راجل.
وعندك زوجة بيوصلها من طفولتها إنها ماينفعش تلبس ولا تخرج ولا تشتغل ولا تنام ولا تصحى إلا بأمر وموافقة ومباركة زوجها أو والدها أو اخيها.
ده يطلّع إيه بقى؟
ابن السيدة ابو شنب
وكائنات ذكورية تكاد تنفجر من تضخمها وانتفاخ ذاتها.. وزومبيز بشرية تعطى لنفسها حق الحياة.. وتحرم غيرها من مجرد الإحساس بالوجود.
يطلّع بنى آدم مصدقين إنهم من درجة أعلى ومرتبة أسمى ولديهم عقل أرجح من بنى آدم آخرين زيهم..اللى هو احنا.
يطلّع واحد يشتم مراته ويهينها كل يوم.. ولما أقوله: “لو هى عملت زيك هاتعمل إيه” يقولى: “هاضربها على وشها بالقلم طبعًا.. إزاى تهين جوزها؟”.
يطلّع حد يخون مراته كل ليلة ولما أسأله: “لو اكتشف إنك مرة مراتك بتخونك هاتعمل إيه؟” يقول: “هاطلقها أو هأقتلها بدون تفكير".
السيدة رضوى الشربينى على النقيض تماما قررت أن تجعل برنامجها منارة للسيدات المغلوبات على امرهن وتقوم بتقوية السيدات وزرع ثقتهن بأنفسهن ولكن بشكل عدائى ايضا جدا ونسيت أن هناك بعض الفتيات والسيدات غير متعلمات ولن تدركن ما تقصده من تعزيز نفسك كأنثى ورضوى اتفق معاها فى البعض اختلف فى الكثير أولها طريقة الإلقاء المبالغ فيها احيانا وربما يكون سببه الحماس والايمان بقضيتها لكن ده برضه احيانا ممكن يتفهم تحريض ضد اولاد ابو شنب وفى بنات هتطبق كلامها خطأ حسب فهمها.. وبالتالى هيبقى عندنا سيدات عنيفة وقاسية ومع الوقت هيطلعلها شنب برضه ومعقدة ونرجسية.
الخلاصة
قال تعالى "ومن آياته أن خلق لكم من أنفسكم أزواجا لتسكنوا إليها وجعل بينكم مودة ورحمة أن فى ذلك لآيات لقوم يتفكرون".
الزواج آية كونية وآية من آيات الله
فطر الله كل من الزوجين على حب الآخر، وطلبه والجد في البحث عنه
ذلك لأن الفطرة البشرية هادية إلى الزوجية، فهي تسوق كل رجل إلى طلب الازدواج بامرأة، وكل امرأة إلى قبول الاتحاد مع رجل، وهي التي تربط قلبيهما وتمزج نفسيهما وتوحد مصلحتيهما، وتجعل الصلة بينهما أقوى من كل صلة بين اثنين في هذا العالم، حتى يسكن كل منهما إلى الآخر عند كل اضطراب، ويأنس به ما لا يأنس بالأهل والأصحاب
لذا عبر عنه سبحانه وتعالى بأنه آية من آياته
تكوين الأسرة ياسيدات يا إعلاميات يا مسموعات يا مؤثرات قائم على الحب والرحمة والاحترام مش بالجزمة وغور مع السلامة يجى غيرك مش ممكن نعرف نربى اولادنا تحت مظلة صراع الكرة والندية دى.
المرأة يعنى الدلع والحب والحنان وفى نفس الوقت لها شخصيتها وكرامتها ومستقبلها وقدوة لأولادها والرجل يعنى الامان والنخوة والسند.
عندنا أجيال محتاجة اهل بيحترموا بعض مش بيدوا بعض بالجزمة يامدام ابو شنب.. ولا بيبيعوا العشرة فى غمضة عين يا رضوى.
