عبقري البرمجة.. حكاية طالب بـ كفرالشيخ سادس العالم في مسابقة مايكروسوفت |شاهد

حباه الله عقلية فذة فريدة، متميز في علوم البرمجة وتقنيات الحاسب الآلي الحديثة، إنه محمود طلعت الخشت، الطالب بالصف الثالث الثانوي بمدرسة فوة الثانوية بمحافظة كفر الشيخ، والحاصل على المركز السادس عالميًا في مسابقة تطبيقات برامج مايكروسوفت الدولية «MOS championshin»، بعد أن مثل مصر في هذه المسابقة الدولية الأشهر في مجال البرمجة.

«حياة كريمة».. جامعة كفر الشيخ تنظم قافلة طبية وبيطرية في «برمبال»| صور

رئيس جامعة كفر الشيخ يتابع تنفيذ حظر دخول غير الملقحين بكورونا

يقول محمود الخشت، السادس عالميًا في تطبيقات برامج مايكروسوفت الدولية، لـ«صدى البلد»: الحمد لله ربنا أكرمني ووفقي في هذه المسابقة، مضيفًا: «هذا الإنجاز ليس نتاج مجهود اليوم فحسب، بل تم على مدار سنوات عديدة من المجهود المضني والتدريب والممارسة والمحاولات المتكررة».

 

وأضاف، البداية كنت في الصف الثاني الإعدادي ولسه صغير لقيت بابا داخل بجهاز كمبيوتر، وكنت من صغري فضولي جدًا عندي شغف بمعرفة الكمبيوتر، لأنى كنت بدأت أتعلم كورسات مايكروسوفت MOS و MTA ، ودا بدأ يفتح ذهنى على حاجات جديدة زى البرمجة وكدا وبدأت فى الفترة دى أصلح الكمبيوتر بتاعى بنفسي.  
 

وتابع، فى أولى ثانوى عملت «ويب سايت» تعليمى كامل قبل ما تظهر موجة المنصات التعليمية مع ظروف كورونا ، ودا ليه قصة معايا الحقيقة ، فى أولى ثانوى فاتتنى حصة رياضيات فاتفرجت عليها على اليوتيوب ، يصادف إنى فى الفترة دى شوفت كورس إزاى أعمل ويب سايت بسيط بدون برمجة.
 

واستطرد قائلاً : فجاتلى الفكرة ليه ما أعملش ويب سايت يكون عليه حصص الدروس بحيث لو فاتنى حصة أقدر أعوضها بدل ما ألف شوية على اليوتيوب ، فبدأت أتعلم تطوير مواقع وبدأت أتعمق فى مجال تطوير الويب وبدأت أنفذ «بروجيكت» الحصص بس ربنا ما أرادش إن المشروع يتم للآخر ، بعد كدا على آخر شهر إبريل 2021 كدا لقيت بوست بيعلن عن المسابقة وتفاصيل الاشتراك وكدا من تطوير الإدارة وكان فيه لينك للتسجيل ، فسجلت فى المسابقة".

وتابع، دخلت الاختبارات العادية اللى بتدى الشهادة أكتر من مرة قبل كدا ، بس ماكنتش أعرف عن المسابقة أى حاجة لأنها لم تكن موجودة فى مصر ، فسجلت فى الفورم وبعد كدا حد تواصل معايا من التطوير وبدأنا نتدرب على البرنامج على تيمز ، وبعد كدا آخر شهر 7 الأستاذة راندا قرقورة تواصلت معانا (الطلبة المشاركين من الإدارة) وبلغتنا إن الامتحان على المحافظة هايكون فى شهر 8 .
 

واستكمل قائلاً: فالصراحة اعتذرت بسبب الثانوية العامة، لكن يشاء الله إن الدروس والمجموعات تقف قبل موعد المسابقة بأسبوع، وبعد كدا روحنا الامتحان والحمد لله ربنا وفق واتأهلت على مستوى الجمهورية ، بعد كدا روحنا 3 أيام فى المدينة التعليمية في 6 أكتوبر واتعرفت فعلاً على مجموعة مميزة، تانى يوم كان فيه امتحان لتحديد الأوائل على مستوى الجمهورية ، والحمدلله طلعت الأول على «موديول» الوورد والسابع على الجمهورية بين كل الموديولات، بعد كدا سيرتى بورت بلغونا إننا هنشارك في نهائى العالم فى شهر 11.

وقال الطالب محمود الخشت:  بعد ذلك جاء موعد المسابقة فى الأربعاء 10 / 11، وشارك من الوطن العربى مصر ولبنان فقط ، ودى كانت أول مرة مصر تدخل فى المسابقة على مستوى العالم ، كانت حاجة جديدة وماحدش يعرف الامتحان هايبقى شكله إزاى بالظبط، تدربنا فى المدينة التعليمية على الامتحان أكثر من مرة علشان نتعود أكتر على الأجهزة اللى هانستخدمها وإن الامتحان هايكون عن بعد مش على الكمبيوتر اللى فى مصر .

وأضاف، أن المسابقة العالمية عرفنا إنها عبارة عن اختبار 30 دقيقة ومشروع والحقيقة تفاجأنا إن أول امتحان بعكس المتوقع كان اختيارات نظرى ، والمشروع كان جديداً علينا ، لكن الحمد لله بدأت أنظم أفكارى على ورق أبيض وبدأت أصفى ذهنى ونظمت تدفق التفكير ، وبدأت أشتغل المشروع والحمد لله ربنا وفقنى ولأول مرة مصرى يحقق المركز السادس على مستوى العالم في هذا المجال.