عزت أبو عوف يكشف سر دخوله 3 مصحات نفسية وإصابته بالقلب.. نوستالجيا

حل الفنان عزت أبو عوف، ضيفاً في حوار سابق مع الإعلامي الراحل وائل الإبراشي في برنامج “العاشرة مساءً”، وتحدث عن زواجه وسبب دخوله مصحات نفسية.

وأوضح عزت أبو عوف، أنه كان متزوجا من بنت تُدعى "فطيمة" ولكنها توفيت، قائلاً: "فطيمة كانت بالنسبة لي كل دنيتي لأني اتعرفت عليها وهي عندها 15 سنة، وأنا كنت عندي 19 سنة، فهي اللي ابتديت معاها وعيشت معاها كل حاجة".

وتابع الفنان قائلاً: "فطيمة كانت ملاك فعلا أُنزل من السماء، واستحملتني كتير رغم إني صعب أتعاشر، لأني متقلب المزاج جداً، ومش كل حاجة بتبسطني، وحاجات صغيرة أوي أوي ممكن تنرفزني وتزعلني، فعشرتي مش سهلة".

وأضاف: "وفطيمة كانت مستحملة كل ده بصدر رحب وعمرها ما اشتكت خلال الـ 37 سنة اللي عشناهم سوا، لأني كنت متزوجها وأنا عندي 23 سنة".

وأردف "أبو عوف": "خلفنا جمال ومريم، وأنا كنت كائن بيتوتي، لذلك فطيمة كانت محور حياتي كله، ومكنتش حاطط سيناريو إنها تموت قبلي ديه خالص، لأن سناً أنا اللي أكبر منها، ولكن الأعمار بيد الله".
وكشف الفنان عن سبب دخوله مصحة نفسية وعصبية، قائلاً: "مكنتش عامل حسابي إنها هتموت علشان كده جاتلي صدمة قوية جداً يوم وفاتها، علشان كده دخلت مصحة أمراض عصبية ونفسية".

واستطرد عزت أبو عوف: "ومكنتش مصحة واحدة لأ، ده أنا دخلت حوالي 3 مصحات نفسية، وصحابي الدكاترة قاموا معايا بالواجب في الحوار ده".

ونوه الفنان قائلاً: "كانت بتجيلي تشنجات، وعدم ثقة بالنفس، وعدم ثقة في الحياة والناس، علشان كده دخلت مصحات نفسية، وكانت فترة صعبة أوي عليا، لدرجة إني تأثرت جسدياً مش نفسياً بس، وأُصبت بالقلب، وخضعت لعملية قلب مفتوح بعد وفاتها بـ 3 سنين، لأني اكتشفت إن الشريان كان مسدود على الرغم إن مكنش باين أي علامات أو أعراض عليا أساساً".

وتابع: "كنت بجري وبلعب تنس ومكنش فيه أي حاجة خالص، لكن لما عملت الفحوصات طلع عندي شريان مسدود وقالولي لازم تعمل عملية قلب مفتوح وعملتها فعلاً، وفترة تعبي ديه كانت بعد وفاتها، يعني من 2012 حتى 2015، لذلك بعتبرهم من أسوأ 3 سنوات في حياتي".