شهر العزومات.. صفحات الأكل البيتى على فيس بوك كومبليت

تشعر بعض الأمهات بمعاناة خلال شهر رمضان، فيما يتعلق بتجهيز وجبات الإفطار، خاصة إذا كن من العاملات، اللاتي يضطررن للرجوع للمنزل قبل موعد الإفطار بساعة أو أقل، بسبب ضغط العمل وصعوبة المواصلات خلال الشهر الكريم، وهناك فئة أخرى تشعر بالمعاناة خلال العزومات الرمضانية، حيث لا يتمكن من تدبير "عزومة" الفطار لعدد كبير من الضيوف، ورغم ذلك لا يجدن في وجبات المطاعم الجاهزة حلا لتلك الأزمة، حيث تفقد "العزومة البيتي" بريقها، حسب وصفهن.

أكل بيتي "دليفري"
ولهذا ازدهرت ما تعرف بوجبات أكل بيتي دليفري، حيث اتخذت بعض السيدات اللاتي يجدن فنون الطبخ بأنواعه، مهنة عمل وتجهيز وجبات العزومات للعائلات، والطلب والتوصيل للمنازل، وتزدهر أعمال تلك السيدات خلال الشهر الكريم، حيث يضعن قائمة بالأطعمة المختلفة وأنواعها وأسعارها حسب الكمية، عبر صفحات بموقع "الفيس بوك".

مفيدة للغاية
ووجدت صباح محمد، ضالتها في تلك الفكرة "بصراحة أكثر من مرة أنقذتني في رمضان بالأخص، لأني بكون راجعة علي البيت قبل الفطار بساعة، بس بحجز من الصبح أو قبلها بيوم، الست اللي بتشتغل بتضطر تجهز الفطار لرمضان قبلها بيوم، وأوقات طبعا من التعب مبتقدرش، وفكرة وجود صفحات الأكل البيتي لستات زينا فادتنا جدا، والأكل ييجي ويادوب على التسخين، عشان رمضان مش بيحب الأكل الجاهز بتاع المطاعم".

غير مضمون

فيما اعترضت منار محمد، ربة منزل، قائلة: "ولادي متعودين على أكلي، مضمنش اللحمة أو الفراخ دي إيه جودتها، كمان لو عزومة مقدرش أجازف وأجيب أكل من بيدج على الفيس ويعدي الألف جنيه، وممكن يكون مش كويس أو بايت أو معمول بخامات مش كويسة، والأفضل للعزومات، بجهز قبلها بيوم، لكن عمري ما فكرت أستعين بأكل أي بيدج، لأنه ممكن يكون منظر والأكل ملوش طعم".

تجمعات رمضانية
"بتفكرى هتعزمي ولا لأ مع أكلات شهية اعزمى براحتك وسيبى الباقى علينا.. عشان مهما كانت المناسبة اللى عندك.. تجمعات عائلية.. وجبات رمضانية وإفطار الشركات وموائد الرحمن، هتلاقى كل حاجة جاهزة، أكلات شهية بنقدمها لها.. أكل بيتى فريش مضمون وصحى جدا لأن الطهى فيه بالسمنة البلدي وزيت الذرة واللحوم كلها بلدى يعنى أكل مضمون ١٠٠٪ عشان تطمنى على صحتك وصحة أولادك عشان راحتك تكمل معانا، متوفر التوصيل لأى مكان.. والحجز قبلها بيوم"، تعلن مسئولة إحدى صفحات الأكل البيتي.

وجبات مجمدة
وأضافت: "عندنا أكلات جاهزة على التسوية للتفريز، يعنى تطلعى وتسوى فى أقل من نصف ساعة وتوفرى وقتك وجهدك للعبادة وبأسعار مخفضة جدا ومخصص، والأهم من كل ده لمحبى الخير والمشاركة في تقديم وجبات إفطار صائم وموائد الرحمن وإفطار الشركات معانا وجبات تبدأ من ٢٥ جنيه ومشبعة جدا".

وجبات للخير
"مرحب شهر الصوم مرحب لياليك عادت فى أمان.. رمضان أحلى مع عزومات رمضان مع لمة العيلة.. واللمة مش هتحلو غير مع أكل بيتي هبة، كل عام وأنتم بخير، وبدأنا حجز وجبات إفطار الصائم، سعر الوجبة تبدأ من 28 جنيه، أقل عدد للحجز 30 وجبة للي عاوز يعمل خير، وللحجز للبيوت، الأسعار حسب الأنواع، كيلو المحشي ورق عنب بـ 50 جنيه، والكرنب بـ 45 جنيه، والممبار بـ 75 جنيه، وطبق سمبوسك جبنة 12 قطعه بـ25 جنيه، وكبيبة 12 قطعة بـ50، والفراخ بانيه الكيلو بـ 85 جنيه".. تعلن إحدى الصفحات الإلكترونية للأكل البيتي.

أسعار الأكل
ووضعت الصفحة الإلكترونية مزيدا من الأسعار لأنواع الطعام من "كفتة الأرز بالكفتة البانيه والشيش طاووق وبطاطس محشية لحمة مفرومة، والصواني للبطاطس والأرز المعمر ومكرونة البشاميل والجلاش باللحم المفروم"، بالإضافة لقائمة من الحلويات الشرقية وأسعارها حسب الحشو والوزن.

عروض شنط مجمدات
صفحة إلكترونية أخرى عرضت مجموعات من الأكل البيتي لعزومات رمضان "على سبيل السعاده بقرب رمضان عملنالكم عروض شنطة رمضان للمجمدات، املأ ثلاجتك بأصناف متنوعة ولذيذة، وخليكي مستعدة، عرض شنطة رمضان، سعر العرض لوزن الكيلو ٩٣٠ جنيه، ووزن نصف كيلو ٤٦٥ جنيه، وتشمل أي شنطة ورق عنب، وممبار، وسمبوسك جبنة، وسمبوسك لحمة، وكبيبة شامي، وكفته على الشوي، وفرخة متبلة للشوي، وشاورما لحمة، وشاورما فراخ، وتتخزن طول رمضان للاستخدام اليومي على الطبخ على طول، وفي عرض بنفس المكونات ولكن 2 كيلو لكل صنف وتشمل ١٢٣٠ جنيه".

عشرات الصفحات الإلكترونية تعلن عن عروض لوجبات جاهزة أو مجمدة للاستخدام طوال الشهر الكريم، عبر موقع "فيس بوك"، وتقبل عليها السيدات لتجهيز العزومات أو للاستخدام اليومي.