شهد موقع التواصل الاجتماعي فيس بوك ، إخطارا عاجلا من إحدى المدارس الخاصة لأولياء الأمور جاء نصه كالتالي: برجاء إرسال وجبة إفطار صحية للطفل تتناسب مع الفترة الصباحية، وعدم إرسال أطعمة تستهلك طاقة الطفل في الهضم مما يؤثر على تركيزه صباحا، وعدم إرسال اطعمة دسمة مثل (قطع الدجاج - كبدة - مكرونة بالصلصة - كوارع) لأن هذه الوجبات لا تتناسب مع الوقت والمكان.
وقد تفاعل رواد موقع التواصل الاجتماعي فيس على صورة الإخطار المتداول السابق ذكره بعدد من التعليقات الساخرة التي جاء أبرزها كالتالي:
قالت مريم جرجس : الله يرحم سندوتشات الجبنة بالخيار اللى بيبقى زى العجينة جوه الكيس
وقالت إيمان يعقوب : انا كنت باخد ساندوتشات بطارخ ورنجه واشتري ام الخلول وفول نابت من قدام المدرسة أكمل بيهم الوجبة
وتساءلت مها إبراهيم : مالها الجبنة الرومي والكيري و اللانشون
وقالت مي سامي : احنا بنشوف حاجات غريبة فى اللانش بوكس دة بجد ممبار و رنجة وكفتة بالصلصلة وحاجات بجد بتقلب ريحة الفصل والمدرسة كلها
وتساءلت ايمان فارس : هو الفول والطعمية قصروا معاكم في حاجة؟
وقالت جنة محمد : ابنى بيقولى انا الوحيد اللى بااكل جبنه وبيض ياماما كل صحابى بيجيبوا فراخ مشويه وكفته ولحمه مش فاهمه ده حتى غلط الفطار فطار والغدا غدا
وقالت حنان أنور : اومال العيل بيتغدا إيه بياكل لحمة نايه ولا ذراع حد ف البيت
وقالت نجلاء فرغلي : السندوتشات طول عمرها جبنة وبيض ومربى او حلاوة ولو حد مميز بيجيب بسطرمة او كيرى واللى على قده فول وطعمية وبطاطس، ايه اللى حصل بقا علشان الاوفر اللى بيعملوه ده.