EN 
علق الإعلامي خالد عليش على إلزام طليقته، بدفع تعويض مادي ومعنوي قدره 50 ألف جنيه لصالحه، وذلك لعدم تنفيذها حكم المحكمة بتنفيذ رؤية نجلته الصغيرة.
وكتب خالد عليش عبر حسابه بموقع فيسبوك: من شهر مايو اللي فات وأنا كسبان قضية إني أشوف بنتي 11 ساعة في الأسبوع وبالتالي أقدر أخدها وأخرجها زي ما كان الاتفاق اللي تم وقت الانفصال واللي على أساسه بدفع المبالغ المالية المطلوبة مني، وبالمناسبة أنا كنت بشوفها فعلا أول كام شهر بعد الانفصال زي الاتفاق ولكن فجأة بدأت حجج كتير لمنعي ومنع أهلي واضطريت أطلب حقي بالقانون مع إني مش غاوي بهدلة.
وتابع عليش: من وقت الحكم في شهر مايو اللي فات وبعت بطرق غير رسمية ورسمية إني أطلب أنسق عشان آجي أخدها وأفسحها وأرجعها ومفيش فايدة، ولجأت لطرق قانونية تثبت عدم رؤيتي والنهاردة خدت حكم جديد بتغريمها مبلغا ماليا لعدم تنفيذها الحكم، حكم كل معناه إني أب بيدفع اللي عليه واللي متفق عليه ومحروم من بنته برضه.
وأضاف “خالد”: ولحد دلوقتي مستغرب جدا إن في حد موافق إن أم تمنع أب عن رؤية طفلة وتكون بتتشرط عليه وتمسكه من إيده اللي بتوجعه ويتسقفلها كمان، ومتعجب جدا أن في أم بترفع استئناف وتقاتل عشان تمنع حكم بيقول إن بنتها تستمتع بـ باباها ويخرجها ويفسحها ومصممة أنه ينفذ رؤية قانونية فقط ويقعد معاها ساعتين زي المسجون في مكان مقفول.
واختتم خالد عليش، حديثه قائلا: آخر حاجتين كنت أتمناهم في حياتي إن أنا وأم بنتي نقف في المحاكم قدام بعض وإن بنتي تعيش أحلى أيام طفولتها محرومة من فسح وحنان أبوها، ولسه عندي استعداد للحلول الودية بدون ابتزاز أو استغلال.
