د. أشجان نبيل تكتب: علي سلالم المحاكم‎

من واقع عملي في ملف الأسرة المصرية وقوانينها والمشاكل علي مدار ٦ سنوات قدرت أطلع بملخص بسيط وهو كالأتي ؛؛؛

•المحكمة عمرها ما حلت مشاكل الأسرة ولا هتقدر تحل في ظل قوانين في الظاهر متحيزة لطرف وهو (المرأة) علي حساب (الرجل) والضحية في الأخر هما (الأطفال)
•الخامة المجتمعية بتاعتنا لما اتجرفت من الأصول والكبير ومعاملات الدين بقينا في مكان تاني خالص لا بقينا طايلين السما ولا حتي الأرض ،،، رقصنا علي السلالم
•لما شكل البرامج والمسلسلات والسينما أتحول ١٨٠ درجة بقينا بنعلم الأجيال الجديدة وبكل سهولة معني عدم المسئولية وانعدام الضمير وإزاي نبهدل بنات وولاد الناس

*طيب مين هما اللي بيدخلوا المحاكم ؟

•الست الغلبانة اللي وقعت في شخص أبن حرام وعديم التربية ودخلت علشان تطلق وتجيب نفقه ولادها ،،، ودة للأسف مبتقدرش تصمد كتير علشان معهاش أتعاب المحامين
•الراجل اللي حاول يحل بالود ومعجبش واتاخد قرار أنة لازم يتمرمط في المحاكم ويتحبس وميشوفش عياله بالرغم أنة بيدفع النفقة
•الست اللي قررت ترفع طلاق للضرر وأحيانًا يتحول للخُلع بقي وحتي وإن اختلفت الأسباب ،،، ومش هحكيلكم بقي عن ألاعيب بعض السادة المحامين
•الأب اللي بيدخل علشان رافع رؤية علشان يشوف عيالةوبيحاول بكل الطرق وفي النهايه القانون يديله ٣ ساعات رؤية في الأسبوع وفي مراكز شباب واحمد ربك لو حتي عرفت تنفذهم بما يرضي الله
•الست القادرة اللي معاها فلوس ومخضرمة في المحاكم وربنا يبارك في شطارة المحامي اللي معاها وكل هدفها تبهدل طليقها وتحبسه لو تقدر وشعارها هو المكتسبات
•شبيه الراجل اللي معندوش قلب ولا رحمة ولا مقدر يعني اية عياله وبيهرب من نفقتهم وكل همة ازاي يبهدل طليقته علشان ماتطولش ولا جنية،،،، وسلمولنا علي بتوع التحريات

بس بعد الخناقه الطويلة والعريضة دة ومابين ظالم ومظلوم سواء إن كان راجل ولا ست بقي
هتلاقي إن الضحية في الأخر هما (الأطفال) اللي المفترض هما حته مننا ونتاج مشترك مابين أم وأب

ودة بقي وصلنا للمشكلة والحرب اللي بقينا فيها
وحكاية تعديل القوانين اللي واقعه مابين معارض ومؤيد ورفع شعار مكتسبات المرأة ونسينا خالص (مكتسبات الطفل والعيشة السوية لية )

وأنا لاحظت بقي إن اغلب الرافضين للتعديلات مابين بيسمعوا إن التعديل مش في صالحهم لكن مش عارفين عنة حاجة خالص ومابين ناس بتعمم تجربتها الشخصية علي الكل ومابين ناس ليها توجهات ومصالح في خراب المجتمع

وأخيرًا اللي عايزة أقولك ليكم إن تعديل القوانين هو مجرد مرحلة أولي لكن مش هو الحل الكامل ،،، احنا محتاجين حملات كامله من التوعية الشاملة لمفهوم يعني أية جواز وأسرة وأطفال من خلال ( إلاعلام والصحافة والدراما والفن بشكل عام )،،، محتاجين برامج للتأهيل النفسي مابعد الطلاق وللطرفين علي أيدي المتخصصين وبأشراف كامل من الدولة ،،،، محتاجين حملة علي معني الأصول وعودة سلوكيات الدين وأزاي نتعامل مع بعض بما يرضي اللة من خلال مؤسساتنا الدينة العريقة ( الأزهر والكنيسة )

احنا محتاجين تصحيح مفاهيم كتير اوووووووووووووي
وأهمها نتفق أننا حتي لو مختلفين ياريت نتفق علي مصلحة (أولادنا)
مع الأسف لما أتعودنا نطلع سلالم المحاكم خسرنا في كل سلمة استقرار وحياة طفل من أطفالنا